03 February, 2011

ناشطه مصريه تعترف : تدربت على ايدى يهود وامريكان لقلب نظام الحكم فى مصر

بتفرج على التليفزيون  وبقلب فى القنوات لاقيت الخبر ده شغال على المحور فى برنامج 48 ساعه


قعدت اتفرج واسمع
بتقول انها وشباب كتير بقالهم سنتين فى امريكا  وقطر بيتدربوا على اشياء وطرق للمظاهرات وقلب النظام 
وانهم دافعين لكل شاب 50 الف دولار فى التدريب ده
وجالهم التعليمات بالبدأ يوم 25 يناير بالتنفيذ
وهو ده اللى حصل بالظبط
والشباب اللى نزل نفذ التعليمات من حرق وتخريب وضرب

بس هى لما سمعت خطاب الرئيس الاخير
ضميرها صحى وحست قد ايه هو" بابا
انا اسفه يا بابا" كان ده تعبيرها"

وكنت هبكى وانا بسمع كلامها

ولما ضميرها صحى اتفقت هى والناشطين اصحابها انهم مايعملوش كده  وانهم ينسحبوا
ويروحوا ميدان مصطفى  محمود عشان يتمسكوا بالنظام اللى كادوا يطيحوا بيه

وطبعا هى زعلانه من كل الاحزاب والساسه اللى حاولوا "يركبوا الموجه" كلمه مستفزه جدا على لسان النظام كله

ودلوقتى شيماء" كما تدعى ان ده اسمها " بتقول لكل الشباب .... اعقلوا زى مانا عقلت

*******
شفت الكلاب عملاء مريكا واليهود هما اللى خططوا لكل ده
وعايزين يولعوا فى مصر
وخلوا الشعب يضرب فى بعضه ويموت بعضه
حسبى الله ونعم الوكيل
هما ساكتين عليهم ليه 
مفروض ينزلوا يلموهم من ميدان التحرير ويعدموهم .. دول خونه

ده رأى الشارع
الشارع اللى صدق التمثيليه العبيطه دى
عشان واحده تطلع تقول كده وتعيد وتزيد فى كلام ماحدش يصدقه غير لو كان عبيط هو كمان
طب ليه ماحدش يصدقه؟؟

نقول ليه

اولا...
الدول التلاته اللى هى اختارتهم عشان تقول انهم متآمرين علينا
1- امريكا مش محتاجه تعمل اى حاجه عشان تقلب النظام فى بلدنا
لانها بتتعامل مع مصر من مبدأ " كن فيكون

2- اسرآئيل اكبر دوله مستفيده ان مبارك يكون رئيسنا
واول دوله خافت على النظام ومعاهده السلام 

3- قطر؟؟؟ قطر مين دى
ولا عشان برضه قناة الجزيره اللى واقفالهم فى الزور

تانيا...
نظريه المؤامره اللى الرئيس معلق عليها ومش راضى يعترف برغبة الشغب ومصمم يدخلها دماغنا بالعافيه
مره يقولك منشورات
مره وجوه اجنبيه فى المظاهرات" قال يعنى امريكا هابله بتنزل بنفسها فى الشارع
مره تمويل خارجى ... دول بياكلوا وجبات كنتاكى ياجماعه .. دلوقتى افتكروا ان كنتاكى امريكى

ثالثا...
اختيارهم للالفاظ و العبارات و"بابا مبارك" و"يركب الموجه"
واختيارهم لبنت عشان تطلع تبكى على الشاشه
خطاب عاطفى وليس عقلانى

رابعا...
اشمعنا شيماء اللى قدرت توصل للتليفزيون يعنى؟؟؟؟
مالشباب متظاهر من اسبوع واكتر .. مافيش فار عرف يوصل للتليفزيون
ولا هى الحكايه خيار وفقوس

خامسا...
مازال النظام والرئيس بيراهن على سزاجه الشعب وعاطفيته



وانا بقول للناس 
حرام عليكم تضيعوا دم الشباب 
حرام تثبطوهم
اللى مش فاهم يسمع كلام الناس اللى بتفهم
الشباب ده ضحى بروحه عشان مستقبل افضل لينا

انا عن نفسى لما سمعت الخطاب الاخير تعاطفت وقلت خلاص
بس لما سمعت التحليلات للخطاب لاقيت انه برضه بيضحك علينا
وانا مووتى وسمى حد يستغبانى

انا بحترم اللى يحترمنى
كان كفايه وشكرا وكتر خيرك عملتلنا حكومه جديده 
احترم رغبتنا بقى وامشى
الكام شهر اللى باقيين دول مش هيزودوا فى انجازاتك حاجه
الانجازات اللى بدأتها بخروج البلطجيه على المتظاهريين

بالعكس الكلم شهر دول باين انهم فرصه لتفكيرات وخطط جهنميه تانيه منك


واخيرا

بكل ادب

سيادة الرئيس ........... ارحل

3 comments:

  1. برافو عليكي
    تحليل راااااااااااااااااااااااائع




    يار ب النصر لمصر




    جيجي والعالم

    ReplyDelete
  2. أضم صوتى لصوتك وأقوله بابا مبارك يا رمز مصر يا صاحب الإنجازات الفظيعة لو سمحت إرحل بقى من فضلك

    ReplyDelete
  3. يارب احفظ مصر من شر الفتن اللى محواطاها

    يارب احفظها واجعلها بلد الامن والامان دائما

    يا رب ابعد عنها كل سوء وضرر

    يارب اصلح حالها وحال الجميع بها

    مالناش غير الدعاء

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)