24 February, 2011

بحبك يا مصر








جميل لما تلاقى حتى الغرب اغنيته قويه ومعبره

مش تقولى
لما تروح تصلى العصر ... يبقى انتى اكيد فى مصر

12 February, 2011

الشعب خلاص ...... اسقط النظام

خطاب الرئيس الاخير واللى جه الساعه 12 بالليل رغم انه متسجل
واقعدنا كلنا نتابعه باسبهلااااااااال لانه كان رغاى جدا وهاتك يا لوك لوك وتوهان
وبعد ماخلص 
بصيت للناس حواليا وقلتلهم : هو احنا نفهم من كدا ايه بالظبط؟؟؟
اتاريه قال انه فوض عمر سليمان 


وطبعا كان اقل مايقابل به الخطاب ده هو اللى عمله ابطال التحرير وهو 


وساعتها  نجح الريس انه ينيم مصر كلها فى نكد واحباط يكفى العالم كله
كان باين على شكل الناس فى الشارع
والاعلاميين فى التليفزيون


والحمد لله  بعد اقل من 24 ساعه كان الشعب كله فرحان ومش مصدق
بيان تنحى الرئيس
هيييييييييييييييييييييييييييه

بجد ماصدقتش
يعنى ايه سافر؟ يعنى ايه ساب البلد؟
يعنى هو مش راجع؟
يعنى خلاص؟؟؟

الله اكبر الله اكبر
الحمد لله
واقعدت اتنطط
هيييييييه هييييييييييه
مش مصدقه انه مشى
يعنى الناس فعلا قدرت تنفذ حاجه فى نفسها
يعنى ربنا اخيرا نصرنا

احمدك يارب




واخيرا .... سقط مبارك
11\2\2011

ومصر للمصريين
يعنى مصر مش مبارك

 دلوقتى بس نقدر نقول 

مصر فوق الجميع

10 February, 2011

افرجها يارب

يارب انصر الحق فى كل مكان
يارب انصر المظلوم
يارب لا تشمت بنا عدوا ولا حاقدا
يارب اجعل ايامنا الجايه احسن من اللى راحت


يــــــــــــــــــــــــــا رب


06 February, 2011

عشان نفضل فاكريين

دى هى مطالب ثورة شباب 25 يناير
عشان بعد 6 او 7  شهور او حتى سنه 
لو اتحققت يبقى كان عندكم حق تقولوا ارجعوا بيتكم 
ولو ماتحقققتش يبقى كان عندنا حق نقول احنا انضحك علينا بسبب تخاذلكم



03 February, 2011

ناشطه مصريه تعترف : تدربت على ايدى يهود وامريكان لقلب نظام الحكم فى مصر

بتفرج على التليفزيون  وبقلب فى القنوات لاقيت الخبر ده شغال على المحور فى برنامج 48 ساعه


قعدت اتفرج واسمع
بتقول انها وشباب كتير بقالهم سنتين فى امريكا  وقطر بيتدربوا على اشياء وطرق للمظاهرات وقلب النظام 
وانهم دافعين لكل شاب 50 الف دولار فى التدريب ده
وجالهم التعليمات بالبدأ يوم 25 يناير بالتنفيذ
وهو ده اللى حصل بالظبط
والشباب اللى نزل نفذ التعليمات من حرق وتخريب وضرب

بس هى لما سمعت خطاب الرئيس الاخير
ضميرها صحى وحست قد ايه هو" بابا
انا اسفه يا بابا" كان ده تعبيرها"

وكنت هبكى وانا بسمع كلامها

ولما ضميرها صحى اتفقت هى والناشطين اصحابها انهم مايعملوش كده  وانهم ينسحبوا
ويروحوا ميدان مصطفى  محمود عشان يتمسكوا بالنظام اللى كادوا يطيحوا بيه

وطبعا هى زعلانه من كل الاحزاب والساسه اللى حاولوا "يركبوا الموجه" كلمه مستفزه جدا على لسان النظام كله

ودلوقتى شيماء" كما تدعى ان ده اسمها " بتقول لكل الشباب .... اعقلوا زى مانا عقلت

*******
شفت الكلاب عملاء مريكا واليهود هما اللى خططوا لكل ده
وعايزين يولعوا فى مصر
وخلوا الشعب يضرب فى بعضه ويموت بعضه
حسبى الله ونعم الوكيل
هما ساكتين عليهم ليه 
مفروض ينزلوا يلموهم من ميدان التحرير ويعدموهم .. دول خونه

ده رأى الشارع
الشارع اللى صدق التمثيليه العبيطه دى
عشان واحده تطلع تقول كده وتعيد وتزيد فى كلام ماحدش يصدقه غير لو كان عبيط هو كمان
طب ليه ماحدش يصدقه؟؟

نقول ليه

اولا...
الدول التلاته اللى هى اختارتهم عشان تقول انهم متآمرين علينا
1- امريكا مش محتاجه تعمل اى حاجه عشان تقلب النظام فى بلدنا
لانها بتتعامل مع مصر من مبدأ " كن فيكون

2- اسرآئيل اكبر دوله مستفيده ان مبارك يكون رئيسنا
واول دوله خافت على النظام ومعاهده السلام 

3- قطر؟؟؟ قطر مين دى
ولا عشان برضه قناة الجزيره اللى واقفالهم فى الزور

تانيا...
نظريه المؤامره اللى الرئيس معلق عليها ومش راضى يعترف برغبة الشغب ومصمم يدخلها دماغنا بالعافيه
مره يقولك منشورات
مره وجوه اجنبيه فى المظاهرات" قال يعنى امريكا هابله بتنزل بنفسها فى الشارع
مره تمويل خارجى ... دول بياكلوا وجبات كنتاكى ياجماعه .. دلوقتى افتكروا ان كنتاكى امريكى

ثالثا...
اختيارهم للالفاظ و العبارات و"بابا مبارك" و"يركب الموجه"
واختيارهم لبنت عشان تطلع تبكى على الشاشه
خطاب عاطفى وليس عقلانى

رابعا...
اشمعنا شيماء اللى قدرت توصل للتليفزيون يعنى؟؟؟؟
مالشباب متظاهر من اسبوع واكتر .. مافيش فار عرف يوصل للتليفزيون
ولا هى الحكايه خيار وفقوس

خامسا...
مازال النظام والرئيس بيراهن على سزاجه الشعب وعاطفيته



وانا بقول للناس 
حرام عليكم تضيعوا دم الشباب 
حرام تثبطوهم
اللى مش فاهم يسمع كلام الناس اللى بتفهم
الشباب ده ضحى بروحه عشان مستقبل افضل لينا

انا عن نفسى لما سمعت الخطاب الاخير تعاطفت وقلت خلاص
بس لما سمعت التحليلات للخطاب لاقيت انه برضه بيضحك علينا
وانا مووتى وسمى حد يستغبانى

انا بحترم اللى يحترمنى
كان كفايه وشكرا وكتر خيرك عملتلنا حكومه جديده 
احترم رغبتنا بقى وامشى
الكام شهر اللى باقيين دول مش هيزودوا فى انجازاتك حاجه
الانجازات اللى بدأتها بخروج البلطجيه على المتظاهريين

بالعكس الكلم شهر دول باين انهم فرصه لتفكيرات وخطط جهنميه تانيه منك


واخيرا

بكل ادب

سيادة الرئيس ........... ارحل

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)