14 October, 2009

الاسبرين مش لاى حد


اسبرين
يعنى مصدع .... خد اسبرين
سخن .... خد اسبرين
سنانك بتوجعك ... خد اسبرين

اسبرين ... زمان ايام الرخص كنت تشترى كبشه منه ب25قرش
دلوقتى ال5 بربع
ويمكن يغلى ياعالم
كنت تلاقيه فى كل بيت بيعالج كل حاجه
الحمد لله

بس بما أننا بقى على وش شتا
وكله ياخد اسبرين للبرد
طب عمرك بقا سمعت عن حد خد اسبرين جاله اعراض الم فى المعدة وقئ بدم
طب سمعت انه ممكن يحس بدوخه وتوهان واحتمال قئ واسهال

واحتمال الموضوع يكبر معاه ويدخل فى تغيرات نفسيه وتغيرات فى الشخصيه يعنى يأثر على دماغه يعنى ويدخل فى غيبوبه كمان

لاااااااا طبعا حد يحصله كده من شويه اسبرين
ههههههههههههه انتى اكيد بتهزرى

لا ياسيدى مش بهزر ده ممكن يحصل فعلا دى اعراض
reye syndrome

ده صحيح مرض نادر ويصيب الاطفال تحت سن 18 اللى بياخدوا اسبرين لعلاج الامراض الفيروسيه
وبما ان سن 18 ماعدوش اطفال وممكن ياخدوا الدوا من نفسهم دلوقتى فكان لازم يعرفوا ان الاسبرين مش برئ اوى زى اسمه كده

ده مش تفكيرى لوحدى كده بس انا سمعتها فى الراديو
وزاره الصحه تحذر من استخدام الاسبرين

غير بقا الاعراض اللى فاتت دى واللى بتحصل للصغار
الاسبرين نفسه ممكن وبسهوله جدا يعمل قرحه فى المعدى تؤدى لنزيف داخلى حاد ممكن يوصل للموت
لانه ببساطه عباره عن حمض
salicylic acid

بياكل فى جدار المعده ....ودى كانت طريقه خايبه كده بينتحروا بيها زمان .. حد يتألم كل ده عشان يموت نفسه


عشان كده لما باجى اخد اسبرين لازم اكون اكلت قبله وكمان بكسر القرص لاربع اربع واشرب معاه ميه كتيييرعشان يعوم مايلزقش
وده كلام بجد مش هزار

بس اعترافا بفضل الاسبرين هو مش دوا وحش فى كل حاجه يعنى
ده مفيد لكبار السن اللى بياخدوه عشان يحميهم من تجلطات الدم ومشاكلها
وكمان بياخده مرضى الغسيل الكلوى واى حد مركب صمامات فى القلب
واى حد بيعدى سن ال40 لازم ياخد قرص اسبرين يوم ويوم وقايه

كووووووووووووووووووووووووووول ده عشان قرص اسبرين



18 comments:

  1. الاسبرين مبيحوقش فيا :rolleyes:

    بس بجد اول مره اعرف الاعراض دى
    ربنا يحفظنا

    ReplyDelete
  2. سكة الأسبرين ديه سكة تعبانه اوي
    الحمد لله سبناها من زمان

    ReplyDelete
  3. مبخدوش لما بصدع باخد باي بروفينيد مكانه

    بالنسبالي دوا هفأ ملوش اي لازمه الا لكبار السن عشان الوقايه من الجلطات غير كده هفأ فعلا

    ReplyDelete
  4. انا - على ما اتذكر - عمرى ما خدت اسبرين :D

    ReplyDelete
  5. شكرا علي هذه المعلومات القيمة
    المشكلة مش في ان اغلب الناس بتاخد اسبرين ةمن غير استشارةطبيب دول بياخدواادويةاشد من كده بكتير
    انا عن نفسي الاسبرين مش بيأثر معي مش اقل نت بروفين اوفولتارين بس بحرص ما اخدهمش علي معدة خالية زي ما قلت

    ReplyDelete
  6. كلام مظبوط يا بندقه و للاسف الناس بتستهل دايما و بتاخده و تقولك ده دوا بتاع كله و محدش عارف حاجه

    انا بتاخده كل يوم بس اسبوسيد عشان تبقى جرعه اقل و يحميها من الجلطات
    و ربنا يحمينا كلنا

    و يارب تكونى بخير يا بندقه

    هو انتى ف امتياز دلوقتى و لا ف سنه سادسه ؟

    ReplyDelete
  7. شكرا على المعلومات القيمة
    بي الحمد لله مش من هواة الاسبرين
    تحياتى

    ReplyDelete
  8. بجد انتى ميه ميه انا باخد الاسبرين ده كل ماييجيلى صداع و ده حاجة عادى او لما اعطس و دي بقى فى ايامنا ده كتيييييييير
    هو انتى طب ولا صيدلة ولا ده معلومات عامة

    ReplyDelete
  9. اسبرين مين يا حاجه

    انا لو مكنش اتنين بنادول اكستر مياثرش فيا

    بس بينى بينك الم المعده والقرحه والحركات دى اهون من الصداع

    الحياه فى القاهره صعبه اوى

    ايوة هى تكفير للذنوب
    بس صعبه اوى والله

    وبعدين الاسبرين بيحيب سيوله وبيمنع الجلطه

    صح ولا لاء؟

    البوست جميل
    ونصايح فعلا ناخد بيها واحنا بنشترى علبه اسبرين من الصيدليه

    سلمك الله

    تحياتى

    ReplyDelete
  10. انا اعتقد
    والاعتقاد مهم جدا
    ان الريفو احسن من الاسبرين
    وذلك لوجود بعض الطلبه بتتعاطاه
    مش بتاخده تعب
    مما يدل على ان الريفو او البنادول باين
    ميه ميه
    والاسبرين بصراحه
    عامل زى حبه الدره
    ويمكن اصغر
    وبقوا يصغروا فيه اكتر
    وبيزود الصداع
    دول مجانين
    هتبقى الواحده بربع
    اصل البترول غلى
    اهم سبب لغلاء الرز
    ان البترول غلى
    ومساء الخير
    انا باين انى اتجننت
    صباح الخير بليل

    ReplyDelete
  11. كل ده يطلع من الاسبرين ؟!

    وانا اللي فاكره طيب وجدع

    هههههههههههههه

    عموما انا الحمدلله عمري ماستعملته ابدا

    وانا شاء الله مش ناوي لأني عارف انه زي الادمان لما حد بيتعود عليه

    عندي اخويا الكبير متعود عليه زي الشاي

    ربنا يستر

    المهم حضرتك نورتي مدونتي

    وانا جي ارد الزيارة

    احنا برضه بنفهم في الواجبات

    دمتمي في حفظ الله

    ReplyDelete
  12. كل ده يطلع من الاسبرين ؟!

    وانا اللي فاكره طيب وجدع

    هههههههههههههه

    عموما انا الحمدلله عمري ماستعملته ابدا

    وانا شاء الله مش ناوي لأني عارف انه زي الادمان لما حد بيتعود عليه

    عندي اخويا الكبير متعود عليه زي الشاي

    ربنا يستر

    المهم حضرتك نورتي مدونتي

    وانا جي ارد الزيارة

    احنا برضه بنفهم في الواجبات

    دمتمي في حفظ الله

    ReplyDelete
  13. MONA:
    عشان كده انا قلت اكتبهم
    وربنا يبعد عنك التعب يا سكر

    --------------------------------
    احمد ابو العلا:
    الحمد لله يا بشمهندس

    بتتعاطى ايه دلوقتى؟؟؟؟
    ههههههههههه

    ReplyDelete
  14. DR DEAD:
    صحيح هو دوا ضعيف بس هو دا ان السبب بتاخد منه بكتير جدا
    لانه مابيأثرش

    -----------------------------
    عمرو فكرى:

    كويس
    صحتك حديد يعنى
    "وش عينه مدوره " هههههه

    ReplyDelete
  15. ام احمد المصريه:
    نورتى المدونه
    والف سلامه عليكى من اى تعب

    ---------------------------------
    NEFERTITI:
    اهلا اهلا بالناس اللى بتختفى
    هو استخدامه عشان سيولة الدم متهيئلى السبب اللى مخليه لسه موجود لحد دلوقتى

    انا لسه فى سنه سادسه
    عاااااااااااا
    ادعيلى

    ReplyDelete
  16. همس الاحباب:
    اهلا بيك

    بنوته صغيوره:
    لا لا لا كفايه دوا بقى
    وخصوصا انك "صغيوره" ههههههه
    ايوه انا فى طب يا جميل


    MOMKEN:
    البنادول غير الاسبرين
    هو ليه مضاعفات تانيه ممكن ابقى اقولكم عليها
    ونفتحها صيدليه هنا بقى

    ربنا يعافينا من كل الامراض

    ReplyDelete
  17. The illusionist:
    الاعتقاد برضه بيقول ان الريفو والاسبرين حاجه واحده
    انما البنادول مختلف
    وعموا كل الادويه مش حلوه ومش لازم نتعود عليها

    وصبح النور بعد العصر

    --------------------------------------
    قلم رصاص:
    كلنا كنا فاكرينه طيب
    طلع غشاش هههههههههه

    هو مش بيعمل ادمان انما جرعته مش بتاثر وعشان كده الناس بتاخد منه اكتر كل مره

    شاى واسبرين حاجتين وحشين اوى ومتعبين جدا
    انصحه يخفف شويه

    نورت المدونه ويارب نشوفك كتير

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)