06 May, 2009

اهداء لكل اللى بيذاكر


بما اننا داخلين على امتحانات والمفروض اننا بنذاكر
قلت افكركم بالمذاكره واهو اخد فيكم ثواب يمكن افتكر انا كمان واذاكر
:(


كلنا سمعنا بابا وماما بيقولوا
"ذاكر عشان تنجح"
"لو ماذاكرتش ابقى قابلنى لو نفعت"
عادى يعنى كلام مكررررررر ومابيجيبش نتيجه
مش عارفه ليه مصممين يقولوه برضه
المهم بقى بعد الفحص والتفكير والنعكشه فى معانى الكلام توصلنا لايه؟؟؟؟؟؟
هما بيقوله : هتذاكر هتنجح
مش هتذاكر هتسقط

وبما ان هتنجح = مش هتسقط

اذن


هتذاكر= مش هتسقط ------------ (1)
مش هتذاكر= هتسقط ------------ (2)

بجمع (1) و(2)


هتذاكر+ مش هتذاكر = هتسقط+مش هتسقط

ناخدعامل مشترك

هتذاكر(1+مش ) = هتسقط(1 + مش)

بالقسمه على (1+مش)

النتيجه النهائيه : هتذاكر = هتسقط

ههههههههههههههههههههههه
عرفتوا بقى احنا مش بنذاكر ليه
عشان مصلحتنا طبعا

اللى مش عارف المعادلاات دى جت ازاى؟ يبقى فعلا محتاج يذاكر ويستاهل كل اللى يجراله
المعادلات دى منقوله... عشان انا كنت ادبى

وطبعا فى المقوله الشهيره الصائبه فى معظم الاحيان
والتى قالها العالم المشهور المغمور اللى مافيش بعده صاحب الرأى الرشيد والكلام السديد اللى هو اختى

العلم نور
والنور كهرباء
والكرباء خطر
فاحترس من العلم


بعد الكلام الجميل اللى فوق ده بقى اللى جاى على مزاجنا ويريح كتير
نيجى بقى للكلام اللى بيوجع
زمان قالو:

شكوت الى وكيع سوء حفظى .. فارشدنى الى ترك المعاصى
وقال ان العلم نور.............. ونور الله لا يهدى لعاصى

حد فكر قبل كده فى معنى الكلام ده
وان سبب اننا بنتعب فى المذاكره هو ممكن يكون حاجه غلط عملناها
الغلط ده ممكن يكون كبير زى عقوق الوالدين او النظره الحرام و...
او يكون صغير زى الكلام الخارج والاغانى الهابطه و...
والرسول عليه الصلاة والسلام قال:"اياكم ومحقرات الذنوب"
يعنى انك تعمل ذنب وتقول ده صغير .. مش مشكله

اكيد كلنا عارفين المقوله دى وعارفين معناها او على الاقل عارفين العكس,
عارفين اننا لما بنيجى نذاكر وعايزين ربنا يكرمنا بنعمل خير ونصلى فى الجامع
والجامع شاهد علينا فى امتحانات الثانويه العامه
:)
ربنا يتقبل منا جميعا ويعينا على عمل الخير
ونفكر قبل مانعمل اى حاجه غلط ان ده هيضرنا بشكل مباشر

يعنى ايه مباشر
يعنى هتلاقى نتيجه عملك امامك وبسرعه
لاننا كتير بنفكر ان لسه بدرى على الموت والحساب

يارب اكون عرفت اوصل وجهة نظرى
عشان انا قرات البوست وحاسه انه ملخبط خالص
المهم
نفتكر
شككوت الى وكيع سوء حفظى فارشدنى الى ترك المعاصى
وقال ان العلم نـــــــــــــــــــور ونور الله لا يهدى لعاصى

18 comments:

  1. ايه المعادلات النار دى
    هتذاكر بتساوى هتسقط؟؟
    هههههههههه
    معادلة حلوة اوى
    طب انتى عارف الحكمة المشهورة اوى اللى بتقول من سهر الليالى بات للعام التالى ومن نام وارتاح نال النجاح؟؟
    طب انتى عارفه الحكمة اللى بتقول " if you want to happy" ارمى الكتاب وصلى ع النبى
    والبيتين بتوع الامام الشافعى دول حلوين اوى
    ربنا يهدينا
    ويفقكو ياللى مبتذاكروش.
    هههههههههه

    ReplyDelete
  2. وكمان اول تعليق؟؟
    اى خدمة

    ReplyDelete
  3. شكوت الى وكيع سوء حفظى
    فارشدنى الى ترك المعاصى
    وقال ان العلم نور الله لا يهدى لعاصى

    هي دي فعلاً المشكلة اللى الكل بيقع فيها

    وفقكم الله

    ReplyDelete
  4. ههههههههههههههههه

    معادله جاااامده

    انا فهمتها طبعا :D

    ومتفقه معاها جداا

    ربنا يستر علينا ياختشي

    ادعيلنا بقى

    موواه

    ReplyDelete
  5. المعادلات دى

    مهعادلات منتطقيه يعنى مكرره على ادبى

    اسمه قياس منطقى
    بحذف العامل المستغرق او المشترك


    يعنى انتى محتاجه تذكرى كتير اوى اوى اوى


    ربنا ينجح كل الى بيذكروا والى مش بيذكروا كمان


    تحياتى

    ReplyDelete
  6. بالتوفيق للجميع
    وربنا يوفقكم جميعا
    وجميلة قوى المعادلة ربنا يكرمك يا بندقة
    شكوت الى وكيع سوء حفظى
    فارشدنى الى ترك المعاصى
    وقال ان العلم نور ونور الله لا يهدى لعاص
    دى مقولة لامام الشافعى رضى الله عنه
    اللى كان يحجب الصفحة الشمال بيده لكى لا يحفظها قبل الصفحة اليمين
    سبحان الله
    تحياتى

    ReplyDelete
  7. بيت الشعر دة انا كنت كتبه فى ورقه وكنت معلقة فوق المكتب وجزاكى الله خيرا على الكلام الاخير الموجود فى البوست

    ReplyDelete
  8. ههههههههههههههه

    لا بجد معادلة خطيرة وجديدة عليي

    :D

    ربنا ينجحكم يارررررررب

    ReplyDelete
  9. سبحان الله ..

    انا فعلا عمر ما جه فى بالى ان ممكن تكون عدم ثبات المعلومة من ذنوبى ..

    اشارتى لنقطة مهمة جدا ..

    جزاكِ الله كل خير يابندقة وينجح كل طلابة المسلمين يارب ..

    دمتِ بخير ..

    ReplyDelete
  10. اهو انتى كدة بتشجعيهم فعلالالالا على المذاكرة
    الأهالى هتدعيلك الحقيقة
    هههههههههههههههههههههههههههههه

    ربنا يوفقكوا جميعا

    ReplyDelete
  11. بندقه اللي مختفيه عشان المذاكره
    ربنا معاكي ان شاء الله ويعدي الامتحانات على خير باذن الله

    حلو أوي المعادلات ديه
    رائعه
    بس ياريت متستعمليهاش في أي امتحان ولا حاجه عشان ديه تحت بند فهلوة الطلبه والبند ده بيكرهوا المدرسين والدكاتره موووووت

    بالنسبه للجزء التاني
    انتي حطيتي ايدك على الجرح تمام
    الامام الشافعي صاحب الابيات ديه كلامه كان اكتر من رائع. يارب يهدينا ونبطل ذنوب الكبير منها والصغير

    ReplyDelete
  12. ربنا يكرمك يا قمرايا
    بجد بوست جميل ويشجع ع المذاكرة

    ربنا يوفقنا جميعا يارب

    ReplyDelete
  13. اولا دمك زى العسل و المعدلة تحفة مع انها غلط لان الله لا يضيع اجر من احسن عملا
    مبدا اخويا ان العلم ماوش لزمة و انه يشتغل احسن له هو فى 6 ابتدائى نفسى اعرف فين مشكلته بالظبط
    و فعلا عقوق الوالدين اكبر المصائب و هو فعلا اللى بياثر على حياتنا فى المستقبل و فى وقتها
    جزاك الله خيرا على الموضوع الجامد و ادعيلى الله يخليكى انا اعدادية و الامتحانات قربت

    ReplyDelete
  14. نذاكر ليه ده ياما كتير ذاكروا ولا نجحوش
    ونفكر ليه ده ياما كتير فكروا ولا فهموش
    ونتعب ليه ده ياما كتير تعبوا ولا ارتاحوش
    لا نذاكر ولا نفكر ولا نتعب ده كله فاشوش
    رد عليه التانى وقال
    لازم نذاكر ولوحتى ماننجحش
    ولازم نفكر ولو حتى ما نفهمش
    ولازم نتعب ولو حتى ما نرتحش
    ولو نفذنا المعادلة بتاعتك سنصل الى هذه النتيجة
    نذاكر=ماننجحش
    نفكر=مانفهمش
    نتعب=مانرتحش
    ايه رايك بقى فى انتظار زيارتك لمدونتى بعد الامتحانات
    الى اللقاء

    ReplyDelete
  15. :D :D :D :D :D
    المعادلة دى بصراحة جديدة جدا ، بس واضح إن اللى عملها ده كان بيذاكر( على الأقل رياضيات)

    :) :)
    و بالنسبة للنصف التانى من البوست، كلامك صح جدااا، ربنا يكرمك و يوفقك،و فعلا (اتقوا الله و يعلمكم الله) ربنا يرزقنا جميعا التقوى و العلم
    و على فكرة، البوست جميل جدا ومش ملخبط و لا حاجة

    تقبلى مرورى
    تحياتى ليكى

    ReplyDelete
  16. هع
    ممممممممممممممممم
    اللى بيذاكر بقى
    يااااااااااااااااااة
    كنت ايام يابنتى
    ********
    عاملة اية وحشانى
    عوووووووو

    ReplyDelete
  17. السلام عليكم و رحمة الله و بركاته

    بندقة
    ربنا يبارك لك يارب

    بجد بوست رائع جدا
    و معناه وصل

    فعلا للاسف كل شئ فى حياتنا وحش بيكون بسبب دنوبنا
    لكن للاسف متعودناش نربط بين الذنب
    و بين الاحداث اللى بتحصل لنا فى حياتنا


    ربنا مع الجميع يارب
    و بالتوفيق


    خالص ودى يا جميلة

    ReplyDelete
  18. السلام عليكم
    مدونه لذيذه جدا الموضوع حلو ومايخصنيش اه لانى الحمدالله خلصت من المذاكره بس جميل تحياتى

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)