06 March, 2009

الامانه يا بندقه

يوم الخميس يوم الجرى العالمى
صاحيه من صبحية ربنا الساعه 6 عشان عندى محاضرات من 8 اللى عمرى ماحضرتها من اولها
ثم راوند فى اخر الدنيا فى المستشفى وجرى جرى عشان نروح نستنى الدكتور لما يجى براحته بعد ساعه ولا حاجه
نقضيها ساععتين رغى وتااااااااااااااااااانى
جرى
back to college
عشان عندنا محاضرات تانى
وجع دماغ وربنا
كان حصل ايه يعنى لو اخدنا المحاضرات ورا بعض بدل الشحططة دى


وانا بقى مش احترم نفسى واروح بيتنا
لا رحت اشترى كتب الجراحه
مهى ماما شايفانى لحد دلوقتى عدى شهرين من السنه وانا ولا جيبت كتاب غير واحد بس
كتاب الغياب
ATTENDANCE BOOK
:)

وشيلت على قلبى عشر كتب عاملين يجى "خماشر" كيلو ...... حد يشترى
حبكت يعنى اشتريهم مره واحده


>_>

انى اروح بقى
ابدااااااااااااااااااااا لازم اكركب الدنيا فوق دماغى مره واحده

رحت البنك احول رصيد لاختى عشان الهانم خلصت الفيزا بتاعتها وقال ايه مكسوفه تقول لبابا
نفسى اعرف على ايه دى حتى ماجبتليش هديه فى عيد ميلادى
الحمد لله البنك كان فاضى رغم اننا اول الشهر
رميت الكتب على اول كرسى و رحت على الموظف قلتله عايزه اسحب من عندى المبلغ ده واضيفه فى حساب اختى قالى ماشى بس هنعملها على انها عمليتين كل واحده لوحدها

قلت فى بالى ياسيدى اعملها اى حاجه ولا قولى ماينفعش وانا اروح احسن

وقعد يكتب فى ورق وقالى البطاقه
اممممممممممممممممم
طبعا انا ماستلمتش البطاقه لسه
وماجاش فى بالى خاااااااااااااااااالص الحكايه دى

اديته صورة البطاقه ووصل التسليم وقلتله لسه هاستلمها كمان اسبوعين

بصلى كده وكان هياكلنى مش عاجبه
طبعا وريته العين الحمرا هو هيخوفنى ولا ايه
ولا قدر يتكلم


خلصت بسرعه الحمد لله بعد مامضيت على دسته ورق
ولاقيته بيدينى الوصل ومعاها المبلغ اللى حولته لاختى كاش

بصيت فى الفلوس وللوصل بتاع الايداع وازبهليت كده
هو فى ايه مانا قولتله ياخد من هنا لهنا الفلوس دى بقى بتاعة ايه؟؟؟؟؟؟؟؟؟؟؟؟


جه بقى شوشو "نعوذ بالله منه" يطنطط عليا
يلا يا بندقه ده باين عليه مسطول واداكى الفلوس وهو مسجل انها فى حساب اختك
يعنى ايه ؟ ...... مهى كده اختى مش هتلاقى حاجه
لا يا عبيطه .. الورق هيمشى صح وهتلاقيهم فى حسابها ,الغلط هيطلع عنده فى الميزانيه اخر اليوم
طب ماكده حرام هو ذنبه ايه
حرام ؟ حرام ليه؟ هو انتى غصبتيه على حاجه؟ هو اللى غلطان يبقى يستحمل

بس ياد يا ........ يا ملعون انت راحت فين الامانه يعنى ؟ اجيبهم منين دول يوم القيامه يعنى لما يقولى انتى خدتيهم وانت عارفه انهم مش ليكى انت عايز تودينى فى داهيه
خسئت

طبعا كل ده حصل وانا واقفه قدام الراجل وهو مش عارف انا واقفه ليه
رحت قولتله: مش برضه هو ده المبلغ اللى مفروض اضيف على حساب اختى

ازبهل هو كمان وقالى اه
قلتله امال ادتهولى ليه؟ المفروض انه معاك مش انا اخده

ضحك -عشان يدارى كسوفه - وقالى شكرا واخد الفلوس
دلوقتى بتضحك


مشيت انا بقى وعلى قلبى الكتب تانى
شوشو: مش كنتى اخدتيهم وتعتبرى نفسك كسبتى جائزه
انا: اه ده انا حتى عمرى ماكسبت فى مسابقه ولا حتى فى كيس شيبسى
شوشو: يا خايبه عملتى ايه يعنى لما رجعتيهم اهو قالك شكرا يافرحتك
انا: شوفت ولا حتى قالى ادينى رقم تلفون بابا اقوله شكرا على التربيه الحلوه دى
شوشو: اهو انتى كده دايما تضيعى الفرص الحلوه من ايدك

فرص فرص ايه يا ناصح امشى ياض اعوذ بالله منك انت عايز تضيعنى
ابدا انا ماسرقش ابدا
دى امانه وانا عارفه صاحبها يبقى لازم ترجعله

وبعدين يعنى كفايه عليا شكرا
هو عنده رقمى فى الملفات
:p

20 comments:

  1. كدة صح يا اوختى يا بندقة

    اوعى ابعدى الشر برة وبعيد دة اللى اسمة شوشو دة ملعون

    بس سبحان الله طول ما احنا عايشين ربنا بيدينا اختبارات كتيرة

    وعايز يشوف هنعمل اية ورد فعلنا اية؟

    يا بنمشى صح وساعتها بنكسب رضا ربنا
    يا بنمشى غلط وساعتها بنخسر رضا ربنا


    ربنا يكرمك وتبعدى عن الملعون شوشو دة

    تحياتى يا بندقتى

    ReplyDelete
  2. هههههههههههههههههه


    شاطره

    بس ولا وطلعتي بتحضري محاضرات يا بندقه

    ده انا معملتهاش من 3 سنين

    الا هي حلوه بقي المحاضرات دي ؟؟

    ReplyDelete
  3. جراحه

    ياوجع قلبي يانا

    انا ماصدقت خلصتها


    عقبالك ياختي يارب

    ReplyDelete
  4. انتى من الصحبه بتاعة الاطباء زى حالاتنا اه ياغلبى
    بس انا خلصت خلاص الحمد الله رغم ان مفيش حاجه بتخلص
    ربنا معاكى وشدى حيلك بقا
    بالنسبه لموضوع شوشو اللعين
    بجد فظيع تحسى انه واقف على الباب مستنى اى موقف ويبتدى زن ورغى مبيرحمش نفسه
    ربنا يكفيكى شر زنه وكلنا كمان ويقوينا على مقاومة وسوسته
    وبرافو عليكى امانتك والاجمل مش الامانه لانها مفروض انها فى اغلبنا وده اساس دينا
    بس الاجمل اكيد احساسك انك قدرتى تقهرى وسوسة الشيطان وقلتيله لا والف لا فى رب شايفنى وبيحاسبى

    تحياتى
    وياريت تنورينا بالزيارة فى المدونه

    ReplyDelete
  5. فاكرها جداااااا الايام المتصلة دى ..

    اللى هى اليوم 24 ساعة وتعملى فيه 48 مشوار ..

    لما دماغك تجيب مايونيز ..

    ربنا ييسر لك امرك ..

    ويخليكى امينة طول عمرك ويبعد عنك الشيطان التيت ..

    دُمتِ بخير ..

    ReplyDelete
  6. نيهههههااهاهاهاهااااا

    عنده رقم تليفوني في الملفات؟
    دلوقتي يتصل ويقولك هاتي الفلوس اللي انتي أخدتيها
    نيهااهاهاهااا

    أو ممكن يقولك الحلقه ديه اتصورت تحبي نذيع؟
    هئ هئ هئ

    بس شوشو بتاعك شكله لسه غلبان وعلى نياته

    لا لا والله بجد وبرافو عليكي
    سعات كتيره بتحصل مصايب في الحسابات

    أنا اعرف محاسب طلع عنده عجز في الميزانيه 10000 ودفعهم من جيبه وكل ده عشان بينسى يحاسب الناس أول بأول

    ربنا يكرمك ويبعد عنك شوشو

    ReplyDelete
  7. زوجه عنيده:
    ربنا يثبتنا على الطريق الصح دايما

    ----------------------------------
    dr.dead:
    والله هى بظروفها كده لما احب انزل بدرى

    حلوه المحاضرات؟؟؟
    تشلللللللللل

    -----------------------------------
    عاشقه وغلبانه:
    يارب ياحبيبتى على خير
    اصلى اتخنقت واحنا لسه فى نص السنه

    ReplyDelete
  8. الشموع البيضاء:
    اهلا اهلا بزملاء العذاب
    نورتى والله

    الحمد لله بنقدر عليه فى حاجات ونستعين بربنا عليه فى الباقى يارب

    شرفتينى واكيد طبعا هتلاقينى عندك قريب
    :)

    ------------------------------------
    لجين ابو الدهب:
    انا بعت الدعوة ياترى وصلت؟؟؟؟؟؟؟


    اه هى فى ايام كده بتبقى مكربسه مشاويير
    ربنا المستعان
    :)

    ------------------------------
    احمد ابو العلا:
    لااااااااااا
    انا عايزاه بتصل يقولى مبروك كسبتى ربع جنيه مخروم حتى
    ههههههههههه

    انا فعلا لما بفتكر انه هيدفع الفلوس دى من جيبه بيصعب عليا
    عارف لو الحكومه هى اللى هتتحملها كان يبقى احسن بالعند فيهم بس الموظف حرام

    كل ده وشوشو غلبان
    بنا يرحمنى منه هيعمل ايه تانى
    يحرضنى اسرق البنك كله
    ;)

    ReplyDelete
  9. انت تستحقي جايزة على خفة دمك بصراحة
    ربنا يكرمك ويوفقك بجد في الدراسة
    وبعدين هانت كلها كام شهر وتبقي دكتورة
    والامانة شيء جميل برضة
    والله يخزيك يا شوشو

    ReplyDelete
  10. انا بقى مره سرحت وكنت


    بشترى شنطه واديت للراجل اكتر من 200 جنيه فوق حق الشنطه وكنت ماشيه
    لقيت الراج مذبهل وبينده عليه وادانى الفلوس
    الدنيا لسه فيها خير
    ربنا يبعد عنك الشيطان وينجحك

    ReplyDelete
  11. الايميل بتاعي اهو يا سمو الاميرة
    fhikal@hotmail.com
    تحياتي

    ReplyDelete
  12. ربنا يكرمك
    جدعه ساقمر ويااحلى دكتوره
    على فكره البوست اللى فات راااااااائع بس ماكانش عندى وقت ارد عليه
    بس انا هنا على طووووووووووووووووووووووووووووول

    ReplyDelete
  13. هههههههههه
    حلوة الحتة بتاعة ان انتى كنتى مستنياه يقولك مينفعش تحولى رصيد لاختك . وانتى طبعا مهتصدقى وتتوكلى على الله.
    بس الامانة الامانة يا بندقه.
    انتى غلطانة مكنتيش ترجعى الفلوس.
    هههههههه
    مودتى

    ReplyDelete
  14. هههههههههههههههههههههههه
    انتى مصيبة
    وكارثة بشرية

    ReplyDelete
  15. ههههههههههههههههههههههههههه

    عسل بجد والله الكلام ده

    مش قادر ابطل ضحك

    خصوصا ثقتك فى الاخر ماهو رقمى عنده فى الملفات

    ReplyDelete
  16. فى حب مصر:
    اه والله بتصبرنى
    كلها كام شهر وابقى دكتوره
    يارب اكون لسه فى كامل قوايا العقليه
    :)

    ---------------------------
    nody_1987:
    بجد راجل محترم
    انااعرف ناس بتستهبل كتير

    ------------------------------
    فى حب مصر :
    وصل يا فندم والدعوة فى الطريييييق

    ReplyDelete
  17. gigi:
    شكرا ربنا يخليكى
    انت هنا على طول بقى وانا اقول المدونه منوره ليه
    :)

    -------------------------------
    مسدس صغير:
    الصراحه كنت تعبانه اوىىىىىى
    ونفسى اروح

    صح كان مفروض اخدهم جايزه على امانتى
    ههههههه

    ReplyDelete
  18. البنت المشمشيه:
    انا؟
    دانا عغلبااااااااااانه

    -------------------------------
    سفاح كرموز:
    ايوه طبعا ثقه
    هو انا شويه ولا ايه
    ده انا عميل قدييييييييم

    ReplyDelete
  19. لا مصر بخير يا بندقه
    وكويس جدا انك مسعتيش كلام شوشو
    الامانه شىء صعب وربنا سبحانه وتعالى بيختبرنا بيها
    بس حاسبى وحرصى لان مواضيع البنوك دة بيبقى فهيا مصايب والله
    انا اخويا اضحك عليه فى الفيزا
    لقى جواب جايله فى يوم انه عدى limt
    بتاع الفيزا فى يوم واشترى باكثر من 7000 مشتريات
    ازبهل واتصدم وهو اصلا مشتراش فيها حاجه
    قدم شكوى فى البنك كان HSBC
    وها
    فين وفييييييييين لما لاقوا ان غلطه موظف
    وشالوا المبلغ الى عليه
    فخلى بالك بس وراجعى حسابك اول باول
    ربنا يكفى المسلمين كلهم شر الحرام وشوشو

    ReplyDelete
  20. شكرا يا محمد
    انا فعلا ساعات بزهق من الحسابات الكتير وبكبر دماغى
    بس هاخد بالى بعد كده


    نورت المدونه

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)