30 March, 2009

اخبار جديده

كالعاده وزى كل مره

اوعى تتوقع تلاقى اخبار بجد فى مدونتى
مدونتى... يعنى اخبارى
هههههههههههههههههههه

المهم بقى انا عندى اخبار حلوه المره دى

انا جبت البطاقه
هيييييييييييييييييييييييه

اه جبتها امبارح والصوره حلوه كتير عن اول مره
عشان كنت مبتسمه فيها
:)

كنت فرحانه بقى وكمان رحت اتصورت عشان اعمل كارنيه الكليه
عشان ماحدش يتنطط عليا
>_>

اما بقى اخبار العيال اصحابى
فانا مش عارفه هما دماغهم ايه بالظبط
يعنى رغم انى كلمتهم عادى بس برضه بعيده عنهم شويه
هما بقى مابقوش زى الاول
يعنى لا بيكلمونى ولا بيحجزولى معاهم ولا اى حاجه
زى مايكونوا هما اللى زعلانين
وكمان صاحبتى اللى مفروض كنا بتروح سوا فى المترو لاقيتها بتمشى لوحدها ومش بتستنانى
ومره ركبت نفس المترو بتاعى وماكلمتنيش

انا الصراحه مستغربه اوى
يعنى قاعده فى الراوند شايفاها وهى جت بصت علينا وراحت تكلم ناس تانيه خالص عشان متقعدش فى المكان اللى انا فيه
لما تكون هتقعد فى الكرسى اللى جمبى والاقيها بدلت مع ناس تانيه وقعدت بعيد
!!!!!!!!!!!!!!!!!!!!

مش عارفه ليه يعنى
هل انا كنت مصاحبه ناس وحشه اوى كده ومش واخده بالى ولا ايه؟

ومع ذلك رب ضرة نافعه
انا لما بعدت عنهم كلمت ناس تانيه ناس ظريفه ومحترمه ماكانش بينا اكتر من صباح الخير

انا دلوقتى مش زعلانه خالص
انا مستغربه بس

25 March, 2009

صحاب اخر زمن >_>

طبعا اتاخرت عليكم وده مش طبيعى

اصلا حصلت حاجات كتير الاسبوع اللى فات ده
كان اسبوع غلس بشكل
ياساااااااااااااااااااتر

المهم بقى انا زعلانه من العيال اصحابى
وهحكيلكم ايه اللى حصل وانتوا احكموا

ايه ؟؟ ماحدش يقول وانا مالى مش عايز اسمع
مادام دخلت يبقى هتسمع

واقفل يابنى باب المدونه مافيش خروج

ال ايه احنا شغالين دلوقتى رواند النسا
وال ايه احنا بناخد
2 sessions

واللى مش عارف يعنى ايه يروح يدور فى القاموس

المهم خلص الاولاني واخدنا
break

قوم ايه العيال نزلو يشتروا حاجات
اتاخروا
رنيت عليهم عشان يطلعوا لان فى ناس تانيه انضمت علينا وهيبدأوا يقعدوا وياخدو امااكن اصحابى

طبعا هتقولى وانتى لازمتك ايه ماتحجزيلهم

هقولك يا ظريف
مانا طبعا حجزتلهم وماحدش كان بيقعد
بس انا كنت لوحدى فى بنش طويل عريض والناس تيجى تقول طب ممكن مكان واحد بس وكده
وبعدين هما اتاخروا يعنى كفايه كده سايبينى لوحدى

اول مادخلوا انا بقول الحمد لله جم
لقيت اللى طلع فيا
انتى بترنى ليه مهو الدكتور لسه مادخلش
انت يا ....... بترنى ليه
قلة ادب
ياشيخه خلتينا نيجى جرى منك لله
يعنى احدفك بالشنطه دلوقتى

كل ده عشان رنتلهم
انا طبعا زعلت وقلتلهم الحق عليا انى بقول تيجوا تقعدوا مكانكم عشان ما يتاخدش

وسيبتهم وقعدت بعيد

طبعا زعلت جدا
لانى ماتوقعتش الرد ده ابدا
انا اصلا ماعملتش حاجه عشان كل ده

اللى زعلنى اكتر بقى انهم مافكروش يصالحونى
رغم انى قولتلهم انى زعلت منهم وتانى يوم برضه ماقعدتش معاهم
فعلا بقى زعلت منهم ساعتها
يعنى لو كانوا قالولى ياشيخه خلاص معلش
كنت قلت خلاص

انا اصلا مابحبش حد يطول لسانه عليا
وهما عارفين كده
وده السبب اللى مخلينى ببعد عن ناس كتير لانهم فاكرين الصحوبيه دى يعنى خدنا على بعض .. نشتم بقى ونمد ايدينا براحتنا

sorry
انا مابحبش كده
وعمرى ماعملت كده مع اى واحده فيهم
يعنى كبيرى اقولها يا غلسه يا بايخه
دانا عمرى مامديت ايدى وزقيت واحده فيهم

بجد بجد انا زعلانه
:(
ومش عارفه اعمل معاهم ايه

################

كل ده بقى كوم واللى حصل النهارده كوم

اااااااااااااااااااااى
انا وقع عليا أصرية زرع
اه والله البتاعه الفخار دى اللى فيها زرع
بس الحمد لله كانت بلاستك


بس تقيييييييييييييييييييييله جدااااااا

هو ربنا ستر ووقعت على ركبتى قبل ماتكمل على رجلى
وده خفف الخبطه شويه
بس انا رجلى بتوجعنى
و أزرقت و بأللت
ومش عارفه هامشى بيها ازاى بكره
عاااااااااااااااااااااا
ياحبيبتى يارجلى

بس خلاص

15 March, 2009

عمار يا مصر

مش لاقيه حاجه اقولها على الاقل حاجه تكون لذيذه وخفيفه زى ماتعودنا

لاقيت الكلمتين دول فى ورق قديم عندى من ايام الاجازه
لما كنت بتفرج على 90 دقيقه والعاشره مساء وصباح الاكتآب العالمى
كان عندى احباط فظيع من البلد واللى فيها
وطبعا البلد حالها ماتصلحش
انا بس اللى بطلت اتفرج على البرامج الهدامه دى
:(

جوايا بركان
وورايا امتحان
ودماغى تعبان وقرب يفور

مش قادره اكتب
لانى يا هاكدب
لاهلعن وهاشتم دى خيانه وفجور

حرام دى بلدنا
والله بتاعتنا
ونيلنا وطينا ومش عايزين نبيع

مش عايزين مشاركه ... ولا عايزين معين
مش عايزين خبره ... ولا حتى مشرفين

سيبونا نعك فيها ... ونجيب عاليها واطيها
يا سيدى بلد ابونا ... واحنا حريين فيها
مالكش دعوه بينا ... شيل عينك من عليها

كفايه كده الكلام اصل الباقي ممنوع
بيقولوا عليه اثاره وتحريض للجموع

وفى القانون الجديد ... هتزورونى بحلاوه وعيش
كده انا لازم اسكت ...لاروح فى حيس بيس

وعمار يا مصر

_______________

طبعا قصيده فاحصه ماحصه جامدا هبد فحت رزع
واكيد هضيفها لديوانى قريب
ايه رايكم؟؟؟؟؟؟؟؟؟؟

11 March, 2009

Burn it

كنت بعمل النهارده اسطوانه بوت
وافتكرت اول مره استخدمت فيها برنامج النيرو
والكلمه الوحيده اللى فهمتها فيه كانت
do you want nero to burn this cd
وساعتها اتخضيت وبسرعه طلعت السى دى
وبصيت عليها لاتكون اتحرقت
هههههههههههههههههههههههههههههههه

بس ده مش موضوعنا خالص النهارده

***********************************

قال سيد الخلق
صلى الله عليه وسلم

"عجبت لامر المسلم كل امره خير إن اصابته سراء شكر فكان له خير وان اصابته ضراء صبر فكان له خير"
صدق رسول الله
صلى الله عليه وسلم

طيب فى السراء والحمد لله كلنا بنفرح ونشكر ربنا وده طبيعى


انما فى الضراء بقى
فى نوعين من الناس الذى يصبر على حاله ومايحدث له والذى يرضى بقضاء الله

اللهم ارضنا بقضاءك خيره وشره

طيب وايه الفرق مهو فى الاتنين خير وصابر وراضى

لا في فرق

الصابر : هو عارف انه حاله وحش ومش عاجبه ولكنه صابر عليه

الراضى : حاله وحش اه انما يرى نفسه فى افضل حال ويشكر ربنا على نعمه ومبسوط

اقولكم مثال

لو واحد واسرته ساكنين فى حجره واحده

لو هو صابر : ياه الاوضه دى تزهق بلد انا عارف انها ضيقه علينا وخنقه بس هنعمل ايه ادينا صابرين مافيش حاجه بايدينا

لو هو راضى : كفايه اننا فيها يا حبيبتى سوا دى جنه فى عينى لما بشو ف الاولاد حواليا كده بحس انى ملك زمانى الحمد لله فعلا المال والبنون زينه الحياه الدنيا

وطبعا فى فرق بينهم

انا سمعت الكلام ده من الشيخ محمد حسان جزاه الله كل خير
وماكنتش واخده بالى ان فى فرق

وعشان كده قولتلكم
:)

صدق رسول الله صلى الله عليه وسلم
فعلا امر المؤمن كله خير

وده بقى بيفكرنى بموضوع " انا حظى وحش"
ياترى فعلا في حاجه اسمها حظ
وناس حظها حلو ناس لا

هو صحيح فعلا فى ناس بيضالهم فى القفص على طول
وشفتهم بيعينى كل حاجه تحصل حتى لو وحشه فى اولها تلاقيها قلبت معاهم حلو اوى

اه طبعا بحقد عليهم مش انت بس اللى حاسس بكده
اصل انا كتير بحس انى حظى مش ولا بد يعنى

صحيح الحمد لله حياتى احسن من ناس كتير جدا
بس الحظ فين
حظ يعنى حاجات حلوه تحصل من غير تعب من غير توقع
تحصل لوحدها كده
وده مابيحصلش
:(

فاكرين حكايات بطوط وعم دهب
كان ابن عمه اسمه محظوظ وكان محظوظ فعلا


اهو هو ده بقى الحظ

وانا بقى عم بطوط

وادينا صابرين .. صابرين .. صابرين
مافيش مره شريـهان

06 March, 2009

الامانه يا بندقه

يوم الخميس يوم الجرى العالمى
صاحيه من صبحية ربنا الساعه 6 عشان عندى محاضرات من 8 اللى عمرى ماحضرتها من اولها
ثم راوند فى اخر الدنيا فى المستشفى وجرى جرى عشان نروح نستنى الدكتور لما يجى براحته بعد ساعه ولا حاجه
نقضيها ساععتين رغى وتااااااااااااااااااانى
جرى
back to college
عشان عندنا محاضرات تانى
وجع دماغ وربنا
كان حصل ايه يعنى لو اخدنا المحاضرات ورا بعض بدل الشحططة دى


وانا بقى مش احترم نفسى واروح بيتنا
لا رحت اشترى كتب الجراحه
مهى ماما شايفانى لحد دلوقتى عدى شهرين من السنه وانا ولا جيبت كتاب غير واحد بس
كتاب الغياب
ATTENDANCE BOOK
:)

وشيلت على قلبى عشر كتب عاملين يجى "خماشر" كيلو ...... حد يشترى
حبكت يعنى اشتريهم مره واحده


>_>

انى اروح بقى
ابدااااااااااااااااااااا لازم اكركب الدنيا فوق دماغى مره واحده

رحت البنك احول رصيد لاختى عشان الهانم خلصت الفيزا بتاعتها وقال ايه مكسوفه تقول لبابا
نفسى اعرف على ايه دى حتى ماجبتليش هديه فى عيد ميلادى
الحمد لله البنك كان فاضى رغم اننا اول الشهر
رميت الكتب على اول كرسى و رحت على الموظف قلتله عايزه اسحب من عندى المبلغ ده واضيفه فى حساب اختى قالى ماشى بس هنعملها على انها عمليتين كل واحده لوحدها

قلت فى بالى ياسيدى اعملها اى حاجه ولا قولى ماينفعش وانا اروح احسن

وقعد يكتب فى ورق وقالى البطاقه
اممممممممممممممممم
طبعا انا ماستلمتش البطاقه لسه
وماجاش فى بالى خاااااااااااااااااالص الحكايه دى

اديته صورة البطاقه ووصل التسليم وقلتله لسه هاستلمها كمان اسبوعين

بصلى كده وكان هياكلنى مش عاجبه
طبعا وريته العين الحمرا هو هيخوفنى ولا ايه
ولا قدر يتكلم


خلصت بسرعه الحمد لله بعد مامضيت على دسته ورق
ولاقيته بيدينى الوصل ومعاها المبلغ اللى حولته لاختى كاش

بصيت فى الفلوس وللوصل بتاع الايداع وازبهليت كده
هو فى ايه مانا قولتله ياخد من هنا لهنا الفلوس دى بقى بتاعة ايه؟؟؟؟؟؟؟؟؟؟؟؟


جه بقى شوشو "نعوذ بالله منه" يطنطط عليا
يلا يا بندقه ده باين عليه مسطول واداكى الفلوس وهو مسجل انها فى حساب اختك
يعنى ايه ؟ ...... مهى كده اختى مش هتلاقى حاجه
لا يا عبيطه .. الورق هيمشى صح وهتلاقيهم فى حسابها ,الغلط هيطلع عنده فى الميزانيه اخر اليوم
طب ماكده حرام هو ذنبه ايه
حرام ؟ حرام ليه؟ هو انتى غصبتيه على حاجه؟ هو اللى غلطان يبقى يستحمل

بس ياد يا ........ يا ملعون انت راحت فين الامانه يعنى ؟ اجيبهم منين دول يوم القيامه يعنى لما يقولى انتى خدتيهم وانت عارفه انهم مش ليكى انت عايز تودينى فى داهيه
خسئت

طبعا كل ده حصل وانا واقفه قدام الراجل وهو مش عارف انا واقفه ليه
رحت قولتله: مش برضه هو ده المبلغ اللى مفروض اضيف على حساب اختى

ازبهل هو كمان وقالى اه
قلتله امال ادتهولى ليه؟ المفروض انه معاك مش انا اخده

ضحك -عشان يدارى كسوفه - وقالى شكرا واخد الفلوس
دلوقتى بتضحك


مشيت انا بقى وعلى قلبى الكتب تانى
شوشو: مش كنتى اخدتيهم وتعتبرى نفسك كسبتى جائزه
انا: اه ده انا حتى عمرى ماكسبت فى مسابقه ولا حتى فى كيس شيبسى
شوشو: يا خايبه عملتى ايه يعنى لما رجعتيهم اهو قالك شكرا يافرحتك
انا: شوفت ولا حتى قالى ادينى رقم تلفون بابا اقوله شكرا على التربيه الحلوه دى
شوشو: اهو انتى كده دايما تضيعى الفرص الحلوه من ايدك

فرص فرص ايه يا ناصح امشى ياض اعوذ بالله منك انت عايز تضيعنى
ابدا انا ماسرقش ابدا
دى امانه وانا عارفه صاحبها يبقى لازم ترجعله

وبعدين يعنى كفايه عليا شكرا
هو عنده رقمى فى الملفات
:p

05 March, 2009

حركات رخامه

ياه
قد ايه انا فرحانه دلوقتى انهم مش هيدخلوا المدونه

اصلهم كانوا فاكرين انهم ماسكيننى من ايدى اللى بتوجعنى عشان انا بحب مدونتى ومش هاقفلها

نفسى اشوف وشهم بقى وهما مزبهلين ومش عارفين يدخلوا

ههههههههههههههههههههه


بس ايه رايكم فى حركة الغلاسه دى
اصل انا اكتر حاجه كانت بتغيظنى انى اروح مدونه الاقيها للزوار فقط

وللاسف عملت زيهم



بالمره بقى مادام بقيت غلسه اقولكم باقى حركات الغلاسه فى المدونات
طبعا اولها كده انك تلاقى المدونه مقفوله


ولو دخلت بقى تلاقى واحد عاملك 100 رساله ترحيب وتهديد وسلامات و.. و.. فى وشك عدل
تقفل واحده تطلع التانيه لحد ماتطلع عينك



خلصت
ادخل بقى على الالوان
يااسود فى اسود يا ابيض فى ابيض تحس ان الصفحه اساسا ماحملتش وتعيد من الاول
اوتلمح الكلام اللى مش باين ووابقى قابلنى على ماتقراه


ياسلام بقى لو عرفت بعد العذاب ده ان المدونه بتكتب فى السياسه
وكلام كبير بقى من اللى لا بفهمه ولا بهضمه ده
ويبقى اتفقعت على الفاضى



طب بلاش
دخلت والحمد لله عجبك الموضوع
ويشاء ربنا انك تقرر تكتب تعليق
ooooooooooooooops

هههههههههههه هههههههههه ههههههههه
صاحب المدونه مش عايز تعليقات بيكتب لنفسه وبس
يلا برااااااااااااااااااااا


لالالالالالالالالا
حظك كان احسن من كدا
كتبت التعليق وماطلعش
كتبته تانى ...... برضه ماطلعش
هتكتبه اخر مره بقى وده من كرم اخلاقك
ماطلعش

ايه ده؟؟؟؟؟؟؟؟
اكتشفت ان اتعليقات لازم تاخد موافقه الاول

وانت عمال تبعت فى نفس التعليق وزمانه بيقول عليك عبيط




ها انا عملت 3 حركات رخمه فى المدونه بتاعتى
اولا لونها اسود فى اسود ورغم انها سودا بس عاجبانى اوىىىىىىى


ثانيا بقى حكاية انها اتقفلت معلش شويه كده وربنا يفكها من عنده
ثالثا التعليقات والحمد لله افرجت عنها وبعبر براحتك

حد شايف حاجه بايخه تانى؟؟؟؟؟؟؟؟
قول قول ماتخابيش

03 March, 2009

حتى اشعار اخر

سلام عليكم يا احلى مدونين

بصوا بقى دلوقتى فى ناس بتدخل مدونتى وانا مش عايزاهم يدخلوها ولا يقرأوا فيها
الناس دى مش مدونين لا دول من اصحابى وبروح الكليه الاقى امة لا اله الا الله بتتكلم على مدونتى
وفيهم ناس مابحبهمش من اصله

وفكرت اقفل المدونه لما عرفت انهم دخلوا
بس انا بحب المدونه وبحبكم ومش عايزه اقفلها

عشان كده قلت اعملها
for invited persons only

طبعا هى حاجه تضايق
وهتزهقنى قبل منكم كمان
بس معلش حقكم عليا شويه كده لحد مايفقدوا الامل انهم يدخلوا هنا تانى

انا عملت البوست ده بقى عشان
اعرف ايميلكم وابعت عليه ال
invitation

ياريت بقى تكتبولى ايميلكم فى التعليات وطبعا مش هتتنشر المره دى
عشان السريه

ويارب تعدى الفتره دى بسرعه

حاجه تزهق لما يكون الواحد مش عارف يحافظ على خصوصيته

01 March, 2009

لااااااااااااااااااااااااااااااء

انا زعلانه
مكسوفه
حزينه

:(

النهارده بس فقدت شئ عزيز عليا جدا
عاش معايا اكتر من 8 سنين
منه لله اللى كان السبب
اتخطف منى ماكنتش اعرف انه هياخده
وماكنش فى وقت عشان اتراجع
انا اتاخدت على خيانه


انا مش عارفه كملت اليوم ازاى
ومشيت فى الشارع ازاى

كنت حاسه ان الناس كلها عارفه انه مش معايا
لو حد سالنى عليه اقول ايه
راااااااااااااااح

اورى وشى للناس ازاى ده
كان رافع راسى
كنت حاسه معاه انى مميزه

كان ليا لوحدى ... ماحدش يشاركنى فيه

مش عارفه اقول ايه ربنا يصبرنى على بعاده

انا مش عايزه احملكم همى
بس اكيد عايزين تعرفوا ايه اللى مزعلنى كده
انا هاقولكم بس خلوا قلبكو جامد

هوا


هوا


هو اصلا هى

هى




بطاقتى " الرقم القومى بتاعى"


عاااااااااااااااااااااااااااااا


اااااا..... قبل بس ماحد يتعصب ولا يتهور ولا يحدف حاجه

ايه؟
انا بحب بطاقتى

والنهارده اول يوم تبعد عنى

@@@@@@@@@@@@@

طيب هحكيلكم من الاول

قوووووووم ايه انا حبيت اجدد البطاقه حسب الاوامر الجديده
ولما رحت اختمها من الكليه الست الموظفه الهانم ضيعتلى الورق


قالتلى عدى عليا كمان يومين ادورلك عليه

رحت كمان يومين مالقتهاش
ايوه هربت منى وخدت اجازه اسبوع
كان نفسى ساعتها.....
يلا مش مهم

انا بقى رحت دورت فى الشغل بتاعها
لقيت الورق موجود وخلصان من يوم ماجيبته
ساعتها بقى كان نفسى .................. ولا برضه مش مهم

يوم ماكنت رايحه اتصور تعتبت جدا وماقدرتش اقوم من السرير
سامعه حد بيقول ان المشكله مش فى الموظفه بقى
سمعتك وعرفتك وهبعتلك الجدع بتاع جررررررررر فاكره

ماعلينا رحت بعديها بيومين انا وماما
ساعتها قالولى الموظفين مشيوا ابقى تعالى بدرى

شوفتوا البطاقه مش عايزه تسيبنى بتحبنى

النهارده بقى رشقتلهم من الساعه 9 هناك - مارضيتش اروح 8 لان اكيد مافيش موظف فيكى يامصر بيشتغل فى مواعيد العمل الرسميه- رحت لاقيت امة لا اله الا الله واقفه هناك مستنين برضه

ومن 9 ل11 على ماجه دورى
عشان ايه ؟ عشان واحده تاخد ورقى تشخبط عليه قال يعنى راجعته
كنت متغاظه منها اوى وهى بتشخبط بكل عشوائيه على الورق اللى انا ماحفظه عليه ومارضيتش حتى اتنيه عشان يدخل الشنطه

كل ده واستحملته
انما اطلع اتصور تقولى هاتى البطاقه لاااااااااااااااا
اقولها طب تاخدى صوره منها لا
طب اجيبهالك المره الجايه لا
اهئ اهئ اهئ

وخدوا منى البطاقه

عااااااااااااااااااااااااااااااااااااا

انا عايزه بطاقتى
فوتى علينا كمان اسبوعين

ودى كانت حكايتى اللى لسه مانتهتش مع البطاقه
****************************

والبوست ده كله عشان اقولكم روحوا جددوا البطاقات قبل اخر مارس
وكل سبع سنين وانتوا طيبين

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)