27 February, 2009

ده عقل يا ماما

فيها ايه يعنى لو اى مشكله حصلت وانا فضلت هاديه ومتاثرتش
فيها ايه برضه لو حصل حاجه كويسه وانا مافرحتش

يعنى عادى اتعودت على كده
لما بفرح بيكون فى هدوء ولما ازعل بيكون فى صمت

صحيح انا مش دايما بتوقع الاسوأ ولكن لو حصل وماله

يعنى لما اعز صديقاتى تعمل نفسها مش شايفانى وتهرب وتروح لوحدها رغم اننا اتفقنا نمشى سوا
عادى
هو انا يعنى هتوه لوحدى

يعنى لما اكون فى المطبخ وبتحرك راح الطبق وقع اتكسر
عادى
هنزعق ليه ونضايق هو يعنى الزعيق هيرجع الطبق

لما انتظر تليفون مهم بالساعه والاتنين وفى الاخر اطلب انا يقولى تاهت عن بالى
عادى
مانا اصلا كنت هطمن عليك .. براحتك

لما كل يوم نروح الكليه ونستنى الدكتور وبعد مايجى متاخر 3 ساعاتيجيله نايب "يادكتور محتاجينك فى العمليات "ويسيبنا
عادى
ماحنا بقالنا 4 سنين على كده

لما الاقى ان واحده احترمتها ولبيتلها طلبها وهى عايشه فى الاستهبال ومش عاجبها وعايزه اكتر رغم انه مش حقها
عادى
والمثل بيقول اعمل الخير وارميه البحر

لما كل كلمه تزعلك واصالحك .. وحتى لما تزعلنى برضه اجى واصالحك ..وتلاقينى بعد كده طنشتك
عادى
مانت عمرك ماصالحتنى

وغيره كتيييييييييييييييييير اوى

انما ماما بقى لو حصل معاها حاجه من دىتتنرفز وتزعل وتزعق وضغطها يعلى
انما انا


وتستغرب عليا
اقولها انا مش ناويه ضغطى يعلى كفايه انتى

وتقولى انتى لا بتزعلى ولا بتفرحى ولا بتتاثرى بكلام حد ولا موقف حصلك او حصل قدامك
ده انتى لو جالك عيان هيموت قبل ماتسألى فيه

بس يارب يرزقنا باول عيان كده وشوفى انا هعمل فيه ايه

وياسلام بقى لو شافت دكتور هادى فى التلفزيون وواقف مع العيان ومش قاعد بيعيط جمبه
تقولى يا ساتر عليكم انتوا كلكو كده

مهو من اللى شفناه يا حبيبتى
كنا اول مادخلنا الكليه ويبقى عندنا امتحان نبقى متوترين وخايفين وباين على شكلنا خالص
ويجى الدكاتره يقولونا مالكم فيه ايه
امتحاااااااااااااااااااان
يضحكوا ويقولولنا بكره تتعودوا
ودلوقتى فعلا يبقى عندنا امتحان ولا عارفين هو الساعه كام ولا بكام درجه ولا هنمتحن في ايه
وبرضه
CooooooooooooooooooL

طب وليه مانكونش هاديين يعنى
هناخد ايه من التوتر
انا عمرى ما بضايق من حد عمل فيا حاجه وحشه
وعمرى ماعاتبه الا اذا كان عزيز عليا اوى اوى يعنى
وده لو العتاب هيجيب معاه نتيجه
انما بقى غير كده لا بتضايق ولا اتغاظ
كل الحكايه بعامله بطريقته عادى جدا

الرسول صلى الله عليه وسلم قال
عامل الناس كما تحب ان يعاملوك
صدق رسول الله صلى الله عليه وسلم



غلطش انا؟؟؟؟؟؟؟
-----------------------------
تحديث:
الحديث يمكن لم اوفق فى اختياره
هو فعلا معناه اننا نعامل الناس بالحسنى ولا نرد لهم الاساءه بالاساءه
وياريت انى فعلا اقدر اعمل كده بس انا حقيقى ماقدرتش

وعشان كده اللى بيتعبنى ومارتحالوش بتجاهله خالص او اعامله بنفس معاملته
لانى فعلا بعامل كل واحد باللى يستحقه
وده يمكن يخلى ناس كتير تاخد عنى فكره مش صح
وأتقالتلى كتير من ناس اول مره تكلمنى " ايه ده يابندقه ده احنا كنا فاكرينك غير كده خالص"ارد عليهم
كل انسان بيفرض على اللى قدامه ازاى يتعامل معاه

بس ده مايمنعش انى برده هاكون هاديه مع اى موقف هيحصل من اى حد



21 comments:

  1. اولا احب اعترض على تفسيرك للحديث

    الرسول(ص
    قال عامل الناس زى ما تحب انهم يعملوك اى انك تعاملهم بالحسنى عشان انت حابب انهم يعاملوك كدة

    مش قال عاملهم زى ما بيعاملوك

    يعنى عاملوك وحش تعاملهم وحش عاملوك حلو تعاملهم حلو

    لاء دة مش معنى الحديث

    لان فى فرق طبعا


    وانامتفقة معاكى فى انك
    مش تتضايقى من حد عمل فيكى حاجة وحشة
    الا اذا كان عزيز عليكى انا بعمل كدة برضة

    تحياتى

    ReplyDelete
  2. واضح من كلام سموك انك شخصية هادية وجميلة جدا
    نادرا دلوقت ما تلاقي شخص هادي مش بينفعل من الحاجات السخيفة الكتيرة اللي بتواجهنا في الحياة
    بس باين انك استثناء جميل من القاعدة العامة دي.. وواضح كملن ان عندك قوة اعصابك.. ومش هقول طبعا برود اعصاب زي ما قالت سعاد حسني في اغنية يا واد يا تقيل..هههههه
    تحياتي يا سمو الاميرة
    وربنا يوفقك وتكوني طبيبة شاطرة

    ReplyDelete
  3. انا مع زوجه طبعا فى تفسير الحديث

    اما الموضوع فاانتى صح بجد

    لان دلوقتى لازم تعملى كده و تكونى هاديه و ماتعتبيش الا العزيز

    واللى مش باقى عليك يبقى انتى كمان مش تبقى عليه مدام انتى عملتى اللى عليك وهو مش قدر

    عمر الزعيق و الزعل مابيرجع شئ او يعالج الامور

    بالعكس ده لازم الواحد يكون هادى علشان يعرف يفكر بالعقل

    تحياتى بجد لاسلوبك

    (:

    ReplyDelete
  4. زوجه عنيده:
    حبيبتى انتى تفسيرك للحديث صح
    بس انا اخدته من ناحية الناس
    يعنى اذا كانوا هما حابين يتعاملوا كده فانا بعاملهم بمعاملتهم
    ولكنى عمرى مابدات اعامل حد وحش من الاول

    والصراحه مش بقدر اعمال حد بالحسنى وهو يردها بالاساءه
    ولمات بيعمل كده ببعد عنه احسن

    -------------------------------------
    فى حب مصر:
    ربنا يخليك شكرا على زوقك الجميل ده
    بس انا مش استثناء اوى انا اكثر حاجه تنرفزنى هو غباء تصرف اللى قدامى او ان حد يتدخل فى شؤونى
    ساعتها فعلا مش بمسك نفسى

    ربنا يسمع منك واكون دكتوره شاطره ... امين

    ---------------------------------
    sweet violet:
    يمكن فعلا مايكونش اختيار الحديث موفق
    هافكر فى واحد تانى
    :)

    بس ربنا يصبرنى وافضل هاديه كده

    ReplyDelete
  5. الله عليكي
    يارب ابقى ربعك وقول عادي دي
    فرحت قوي بزيارتك ليا والمدونه تحت امرك تيجي زي ماتحبي يابندقه

    ReplyDelete
  6. بسم الله الرحمن الرحيم
    بنتى العزيزه :بندقه
    ربنا يسعدك...وانا معاكى فى كل كلمه قولتيها........انا بعد عمرىدا كله فعلا تعبت من الناس واعيتنى الحيل معاهم
    انت يابنتى عرفتى الطريق من الاول بارك الله فيكى
    لكن احنا زمان اتربينا على اننا نعامل الناس بالحسنى ومازال الكلام ده مؤثر فينا حتى الان
    لكن واضح ان الناس هى اللى تغيرت واصبحوا بيشوفوا ان المعامله بالحسنى ضعف وانتوا طبعا من نفس جيلهم بس انتى احسن شويه وهو ان معاملتك لاما زيهم لاما تتجاهليهم واعتقد ان دا افضل من انك تعامليهم نفس معاملتهم
    واخيرا قال رسول الله صلى الله عليه وسلم: القابض على دينه كالقابض على الجمر
    ادعوا الله لى ولك وللمسلمين باتباع الاسوة الحسنه

    ReplyDelete
  7. اولا البوست جامد اخر حاجه يا بندقتي

    ثانيا بصراحه انا عارفه ان كلامك صح لكن مش بقدر اعمل زيك

    بعد اهري و انكت في نفسي لما بحس ان هيجيلي شلل الارعاش

    :D

    بس مش بقدر افوت بسهوله كده..هو صحيح في حاجات بفوتها

    بس مش كل حاجه..

    ربنا يرزقك الصبر و يثبتك عليه

    :))

    ReplyDelete
  8. الزعيق والصوت العالى
    عمرو ماكان حل لاى حاةجة بلعكس
    دليل ع الضعف
    واكيد بختلف معاكى
    فى تفسير الحديث

    ReplyDelete
  9. انا بحسدك علي اعصابك

    ده انا بتعصب جدا


    بس موضوع الامتحانات دي انا جيت في الاخر وبقنا بنكسل نرد علي الدكاتره
    ههههههههههههههههههههه

    ReplyDelete
  10. الصراحه ليها حق ماما يجيلها الضغط الهدوء مش يبقى كده
    الهدوء فى معالجه الموقف بكل بساطه وبكل هدؤء

    ReplyDelete
  11. GiGi:
    دا انتى اللى نورتى مدونتى بجد

    ---------------------------------
    الفراغ:
    بجد انا كمان اتربيت على معامله الناس بالحسنى
    بس طلعت لقيت معامله الناس وحشه وفعلا لا يحترموا غير القوى
    فكان لازم اتغير زيهم
    انا مع حضرتك ان القابض على دينه كالقابض على الجمر
    بس برضه العين بالعين والسن بالسن

    --------------------------------
    ثلوج:
    الصراحه انا كنت زيك
    وكنت بتعب ويجيلى صداع حالتى تبقى حاله
    وحتى الناس مانعنرفش بغلطها حتى عشان ماتزعليش
    لحد ماقلت اشترى نفسى احسن

    ReplyDelete
  12. البنت المشميه:
    الزعيق والصوت العالى ممكن مايحلش اى حاجه
    بس بيعبر عن شعور الانسان ويخرج زهقه
    وبيكون كويس لما الاخر يشعر بيه ويقدره
    غير كده بيكون تعب على الفاضى

    والحديث معلش نغيره
    :)

    -----------------------------------
    عاشقه وغلبانه:
    هههههههههه
    هما الدكاتره دول مهما قلنالهم مش هيعجبهم
    ههههههههههههههههه

    --------------------------------
    رومانسى:
    مش فاهمه قصدك ايه؟

    ReplyDelete
  13. السلام عليكم
    والله هى كلمة عادى دى فعلا بتريح وبتهدى
    دايما ماما تقعد تقولى انتى جايبة الهدوء ده منين انتى مفيش حاجة بتحركك
    أقعد أقولها ايزى يا ماما عادى
    تتعصب اكتر
    بس والله مش بيبقى قصدى
    بس الواحد فعلا لو ساب أعصابه مع كل موقف هيدخل مستشفى المجانين
    تحياتى ليكى على الموضوع الحلو
    اسلوبك حلو وطرحك ليه جميل جدا
    تحياتى ليكى وسلام

    ReplyDelete
  14. ممممممممممممممم

    موضوع مهم

    هقراه تانى ^_^

    ReplyDelete
  15. انتي هتقوليلي علي كووووووووول بتاعتك

    ههههههههههههههه

    كفايه اللي عملتيه عندي في مدونتي ده يدل انك كول خااااااااااااااالص

    ReplyDelete
  16. يا رايقة

    انت زي بنتي الدنيا تتهد حواليها و هي و لا على بالها
    عكسي انا تمامااااا

    انت باين عليكي من برج العذراء

    يا بختك يا اختي

    اوروفوار

    ReplyDelete
  17. بصى انا كنت زيك كده تمام ..

    لدرجة فى البيت كانوا بيقولولى ياتلاجة ..

    بس مع مرور المواقف واختلافها ..

    بقيت مبسوطة بشخصيتى ان فيها النقطة دى بس مع مواقف تانية ما ينفعش لازم الانفعال ..

    سواء علشان اللى اودامك يحس بفعله ..

    او بعض الافعال لازم فيه التفاعل والانفعال ..

    وان فى ناس كتير ما عدتش خلاص بتفهم الشخصية الهادية ..

    ومش بنقول يهمنى الناس فى شئ علشان نغير من شخصياتنا ..

    بس لازم علشان نوقفهم عند حدهم ..

    وعلى فكرة مامتى زى مامتك تمام ..

    اول مرور لى على المدونة ومش الاخير ان شاء الله ..

    دُمتِ بخير ..

    ReplyDelete
  18. yaaaaaaaaaaaaaah
    انت تبع حزب اتش دبووووووووور
    be cooooooooooooooool

    بس والله احسن بلا وجع قلب يا شيخة

    ReplyDelete
  19. هههه
    بجد بوست كوووول أخر حاجة
    واحنا فعلا بنتعامل مع المريض عل اساس انه حالة مش مريض
    ربنا يوفقك يا رب

    ReplyDelete
  20. الهدؤء شئ مطلوب
    بس فى المشاكل بتطلب اكتر
    لانك بتقدرى
    تتحكمى فى اعصابك وتتحكمى فى عقلك
    علشان كده بتقدرى تفكرى كويس فى حل المشكله من غير توتر ولا قلق

    ReplyDelete
  21. يابختك بهدوئك
    عقبالى يارب

    تحياتى ليكى وياريت تزورى مدونتى وتقوليلى رأيك

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)