20 February, 2009

هو يوم رعب من اوله

امبارح انا مارحتش الكليه وقاعده فى امان الله على الكمبيوتر من صباحيه ربنا
ماما راحت الشغل ,بابا نازل من بدرى ,العيال اخواتى وسربتهم على كلياتهم وقعدت لوحدى بقى بمزاجى من غير بتعملى ايه ولا هاتقومى امتى

شغلت اغانى وقاعده ادعبس فى المدوننات


وفجأه

جرس الباب رن
الساعه كانت عشره ونص تقريبا وده مش معاد حد يرجع دلوقتى
انا اتخضيت وقمت من على الكمبيوترجرى على الباب و

مين؟

همنورهمهمهنورش

ايه؟

مندىيمومنشورهت

ولا فهمت حاجه كان صوت واحده ست وقلت افتح اشوف هى عايزه ايه
بس ماعرفش ليه مافتحتش وقلتلها
ماعرفش مش عايزين

دخلت جوا وجه فى بالى عصابه الشقق اللى كانت بتخبط قبل ماتدخل تسرق
وجريت على المطبخ مسكت سكينه وجيبت موبايلى ووقفت ابص على الباب

كنت شبه بطله فيلم
SCREEM

وفضلت متنحه يجى عشر دقايق خايفه اى حد يقرب من باب الشقه
لحد ماطمنت الحمد لله انه مش هيحصل حاجه
****
عدى الوقت وبدا اخواتى يرجعوا وماما وبابا واتغدينا ومارضيتش اقولهم على اللى حصل
احسن يضحكوا عليا


بعد الغدا قعدنا نتفرج على التليفزيون
والاقى ريحه غريبه جدا بتهل عليا....... اقولهم انتوا مش شامين حاجه
يقولوا لا

انا هتخنق خلاص
قمت على المطبخ الاقى الغاز شغال ومن اكبر عين ...... والغاز مالى الدنيا

يعنى كنت هاروح فطييييييييييييييس ولا حد حاسس بحاجه اشمعنا انا يعنى
وطبعا افتكرت اعلانات زمان بتاعه الراجل اللى كان بيختبر تسريب الغاز بالولاعه


وماعملتش زيه


وبس كده عدى اليوم على خير وسهرنا من غير اى ظواهر غير طبيعيه
وكله نام وانا اااااخر واحده نمت دخلت انام كده على الساعه 2 صباحا
وماحدش يقولى ده بدرى اوى
وغطست فى السرير ولسه بقول يانوم
اسمع صوت غريب بره فى الصاله

عادى يا بندقه تلاقى الجيران وقعوا حاجه على الارض وبترن ولا حاجه

اصل جيرانا فى العماره كلهم ماتسمعلهمش صوت غير باليل بس

شويه والصوت حصل تاننى
جرررررررر جرررررررر

ركزت كده
طب دا صوت ايه مانا اصلى حافظه كل الاصوات اللى بسمعها
ده لاصوت الباب اللى بيزيق ولا صوت شباك البلكونه ولا صوت دق الكفته

اسمع






راح الحمد لله



جررررررررر جررررررررر جرررررررر

لا لا لا ايه ده الصوت بيقرب

وانا عشان نايمه على السرير بالعكس مش شايفه ايه اللى بيحصل ورايا


جرررررررررررررررررررررررررررر

حاسه انه واقف على باب الاوضه


وانا متنحه فى الحيطه قدامى انى اشوف خيال اشوف حاجه بتتحرك
اشوف حد من العيال البايخه اخواتى بيهرجوا

مافيش

جرررررررررررررررررررررر

يالهوى ده دخل الاوضه
يالااااااااااااااااااهوى حد يلحقتى


حاولت استجمع قوتى وشجاعتى ويابندقه اكيد مافيش حاجه تلاقى الشباك بيحرك اى حاجه فى الصاله

يا سلام وهلا الحاجات بتتحرك تدخل اوضتى انا بس


جررررررررررررررررررر


انى اقوم ابدااااااااااااااااااااا
اكيد مش جدعنه يعنى .......... بس تقريبا ماكنتش قادره اتحرك
دانا ماقدرتش اتحرك اشوف قلبى بيدق كام دقه ولا قدرت اشد الغطا واستخبى فيه

فضلت متنحه فى السقف




ربنا هدانى اقرا ايه "الكرسى" فضلت اقراها اقراها ودماغى بتلف يارتنى نمت مع اختى النهارده
لحد الحمد لله الصوت راااااااااااااااااااااااااااااح

ويادوب بدات اتحرك
لفيت نفسى جوا الغطا وقلت انشاله يكون مين برا
براحته
انا مش هنااااااااااااااااا


وانتو اول ناس تعرف اللى حصل ده


كنت هطيــــــــــــــح
:)

22 comments:

  1. هههههههههههههههههههههههههههههه

    فكرتينى بحلم كنت بحلمه كان نفس النظام

    بس الحمدلله طلع حلم مش حقيقه

    ((:

    بس ايه جو الرعب اللى فى بيتكم ده يابنتى

    المهم فى الاخر عرفتى ايه اللى كان بيعمل الصوت ولا ايه ؟؟

    ReplyDelete
  2. ههههههههههههههههههههههههه


    ربنا بينتقملي منك بسبب اللي عملتيه في مدونتي

    ههههههههههههههههههههههههههههههههههههههههههههههههههههههه

    ReplyDelete
  3. يا بنتى كنتى جمدى قلب وبصى شوفى اية اللى كان بيتحرك وراءك

    طب انا اعمل اية دلوقتى انا كنت عايشة فى اللى كنتى بتحكية وهموت واعرف كان اية سبب الصوت

    يلا من فضلك عيدى اللى حصل من تانى واعرفى اية اللى كان بيحصل

    هههههههههههههههههههههه

    تحياتى

    ReplyDelete
  4. اقولك قريب جدا حكى اول حكاية
    ونورتينى

    تحياتى

    ReplyDelete
  5. هههههههههههههههههه
    يا سلام ع الجبن بس على فكرة أنا لو مكانك كنت هموت رعب مش بعيد تحصل تداعيات تانية
    انتي بنت نكته فعلا
    ربنا يكرمك وبوفقك
    مودتي

    ReplyDelete
  6. بصراحه انا لو منك كان الفضول موتنى وكنت لازم اعرف هو مين وفى ايه ورا الغطا واللى يحصل يحصل مش مهم واهو علقه تفوت ولا حد يموت اوعى تحكى لحد خلى الكلام فى سرك احسن

    ReplyDelete
  7. ههههههههههههه
    من اعمالكم سولتطط عليكم
    اكيد بتعملى بلاوى فى لناس

    ReplyDelete
  8. هههههههه

    دى أخرة افلام الرعب تلاقيكى كنتى لسة شايفة سكريم هههههههههههه هههههههه هههههههههه

    ReplyDelete
  9. وده كان صوت ايه..؟؟
    ازاي تنامي من غير ماتعرفي

    كنتي صوتي ولا اعملي اي منظر رعب كده صحي البيت واهو كله بثوابه
    هههههههههههههههههههه

    ReplyDelete
  10. هههههههههههههههههه
    يانهار ابيض
    دا كله يحصلك فى اليوم الغريب دا
    الحمد لله
    احمدى ربنا وخدى بالك من نفسك

    ReplyDelete
  11. هههههههههههههه

    ايه الجبن دا


    انا مش زيك لأ خالص


    انا اقصى حاجة ممكن اخاف منها ف الضلمة تحت السرير بحس ان هيطلع من تحته ايد عفريت وتشدنى وتدخل

    ReplyDelete
  12. هههههههههههههههه
    انا ساعات اسمع حاجات غريبه مثلا حاجه وقعت ولا حاجه في المطبخ ولا اي صوت
    افضل ازق رنا اختي واقولها اصحي اصحي انا سامعه صوت حاجه جوا ههههههههه
    لا وايه بقي انا مش بيحلالي ادخل اقعد اسمع بدقه عشان اخوف نفسي بالعافيه الا بالليل قبل ما انام

    ReplyDelete
  13. هيهيهيهيهيهي

    بتفكريني

    لما كنت اعد لوحدي مع قطتنا
    في البيت

    واعد اقول طول ما هي هاديه يبقي مافيش حاجه..بس المصيبه انها اول ما اهلي يمشوا و استفرد بيها تبتدي تعمل حركات تخوف

    :blink:

    ReplyDelete
  14. هههههههه
    بلاش تتفرجى على افلام رعب كتير
    خليكى مع توم وجيرى
    بوجى وطمطم
    ههههههه
    ايه بيت الاشباح اللى انتى معياشنا فيه
    تحياتى

    ReplyDelete
  15. لاء بجد رعب رعب يعنى... يا ريت لما تيجى تنامى تتغطى كويس ها
    بوست لذيذ من زمان ما قريتش حاجة مستنية اشوف نهايتها ايه بفضول

    دمتى بخير مودتى

    ReplyDelete
  16. ههههههههههههههههههههههههههههه
    طيب سؤال يطرح نفسه بقوة ويفرض وجوده على الساحة

    جرررررررررررررر جررررررررررررر

    ده كان من ايه بيطلع من ايه .. يعني معرفتيش السبب ولا كنتي نايمة ولا فيه ايه بظبط؟؟

    وجعتي قلبي يلهووووووووووووي

    اقولك بصي

    جررررررررررررررر جررررررررررررر

    يلاااااااااا بقى

    جرررررررررررررررررررر

    ReplyDelete
  17. لا حور ولا قوه الا بالله

    يعنى سمعتى كل الاصوات دى لوحدك؟

    طب بقيه الى فى الشقه كانوا عادى؟

    ولا دى اصوات مبعوته لكى لوحدك؟
    هههههههههه

    ReplyDelete
  18. sweet violet:
    ده لو كان حلم كان ارحم
    كنت هصحى وخلاص
    المشكله انى كنت صاحيه
    :(

    --------------------------------
    dr.dead:
    الله يسامحك
    انا الحق عليا انى ماعملتش كده تانى فى البوست الاخير

    ------------------------------
    زوجه عنيده:
    اجمد قلبى ايه هو انا كنت حاسه بيه من اصله
    والله ماعرفه هو كان بيدق ولا وقف ؟؟؟؟؟

    هاستنى كل جديد
    :)
    -------------------------------
    كاتب مصرى:
    هههههههههههه
    الحمد لله انك ماكنتش مكانى

    ---------------------------------
    طوبه ذهب وطوبه فضه:
    هو انا الحمد لله كان الفضول الوحيد اللى عندى هو
    امتى الصوت ده هيخلص
    :D
    ----------------------------
    البنت المشمشيه:
    كده
    دا انا غلبااااااااااانه

    -------------------------
    BARBIE GIRL:
    وحياتك انا الافلام الرعب دى بتفرج عليها وافضل اضحك
    ماكنتش اعرف انى هيجيلى يوم واخاف كده
    اصله ماكانش فيلم
    عااااااااااا

    -------------------------------
    عاشقه وغلبانه:
    انا قلت لو فضلت ساكته ومستخبيهه يمكن مايشوفنيش
    :CRY:

    ReplyDelete
  19. رومانسى:
    والله العظيم حمدته
    ده انا كنت هموت من الخوف

    -----------------------------
    زى الهوا:
    "انا اقصى حاجة ممكن اخاف منها ف الضلمة تحت السرير بحس ان هيطلع من تحته ايد عفريت وتشدنى وتدخل"

    لاء مش زيى خالص
    ههههههههههههههههه

    ----------------------------
    يمنى:
    لا انا الاصوات دى عندى عادى جدا
    بقيت بسمع منها كتيييييييير
    ولا اعرف ايه بيحصل

    ------------------------------
    THOLOG:
    اسكتى انا اصلا بخاف من القطط دى لوحدها
    :)
    بحس انها مجنونه وممكن تعمل اي حاجه
    ------------------------------
    همس الاحباب:
    الكارتون حلو
    بس كده بدل السكته القلبيه اللى عندى هيجيلى تخلف عقلى
    ههههههههههههههههههه

    -----------------------------
    جسر الى الحياه:
    اتغطى بس
    ده هنام تحت المرتبه
    ههههههههه
    نهايتها ايه تانى هو كده كفايه هو انا مستغنيه عن نفسى
    راح لحاله بالسلامه

    -----------------------------
    فتافيت:
    جررررررررررر
    جررررررررر جرررررر جرر جررر

    سلامه قلبك
    :)
    ---------------------------------
    NODY-1987:
    كانوا نايمين
    عااااااااااااا
    مهى دى المشكله انى كنت ولحدى
    :((

    ReplyDelete
  20. هههههههههههههههههههههههه

    مستقصدينك كده ليه

    شكلك كنتى مزعله مامتك :p

    ReplyDelete
  21. دي تهيئات يا بندقة.. بلاش تخلي الافكار السودة دي تعشعش في دماغك..هههههههه
    بس بلاش تقعدي في الشقة لوحدك بعد كدة.. من كتر اللي بسمعه من حوادث اصدق اي حاجة
    تحياتي

    ReplyDelete
  22. سفاح كرموز:
    مستقصدنى عشان انا طيبه
    :p

    ----------------------------------
    فى حب مصر:
    والله خايفه ارد عليك تروح وتغيب تانى

    بس انا ماكنتش لوحدى
    :(
    بس ربنا ستر
    ههههههههههههه

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)