07 February, 2009

يعنى ايه احباط يا مرسى؟




عارف لما تبقى مستنى حاجه حلوه وعارف انها اكيد جايه
يعنى مافيش احتمال انها ماتجيش
ومستنيها

وبعدين اول ماتيجى تلاقى اختلاف تام بين توقعاتك والواقع

هو ده بقى الاحباط

وده مش زعل لا احساس تانى خالص
اصل لو زعلان تبقى زعلان من حاجه او من حد انما الاحباط ده عامل كده زى مايكون حد رش عليك ميه ساقعه عشان يفوقك من اللى انت فيه
او زى الزوج كده لما ينتظر ان مراته بعد رحله الشوبنج اللى خلصت فيها فلوسه هتفتكره بهديه حلوه
ويطلع نصيبه فى الاخر شراب وكمان فردتين مش شبه بعض

تحس كده انك اهبل وعبيط وتقعد تضحك على نفسك
وده تقريبا اللى بنقول عليه شر البليه مايضحك

ويا سلام بقى لما لاحباط يجيلك من حد قريب منك


تبقى محتار طب اقوله ولا بلاش, مهو لازم انه يعرف ... لا بلاش , مهو انت مش لازم تتوقع انه هيصالحك اصلك تبقى عبيط برضه
وعشان انت طيب وهو كمان بيحبك رحت قايله
راح صحبك بدل مايكحلها هوبا .... عماها
برضه بحسن نيه

وكمان لسه مش عاجبك ده انت رخم اوى ومابتقدرش
ورغم انه عارف ان ليك حق بس بيكابر
مصريين يا جدع

وبعد ماتزعل
وده بقى زعل ... عشان كمان بيطلعك انت اللى غلطان




وفى الاخر تلاقيه عملك اللى نفسك فيه وبيصالحك
ماكان من الاول
لزمته ايه وجع الدماغ هو الواحد ناقص



14 comments:

  1. حرام عليكى مش ناقصه احباط
    مش كفايه الاحباط اللى حوالينا
    واللى بيجيلنا من كل ناحيه دا

    ReplyDelete
  2. دا الف باء احباط..:D

    ReplyDelete
  3. رومانسى:

    يعنى اشمعنا انا اللى مش هيجيلى احباط
    مانا كمان من البلد دى

    ----------------------------
    كاتروز:

    ربنا يسهل بقى ومانوصلش ل سين شين
    :)

    ReplyDelete
  4. ياااااه بقالي كتير ما سمعتش حد اتكلم عن الموضوع
    تقريبا عشان بقي طبيعي جدا
    انا تقريبا بعتبره من اهم الصادرات التي بعالمي
    حلو البوست
    اقصد حلو الأحباط

    ReplyDelete
  5. انا تقريبا مبدخلش الا علي مواضيع الاحباط في المدونات اليومين دول :D

    ReplyDelete
  6. يا خبر هو الا حباط وصلك
    بجد انا مش عارفه ليه بتسميه احباط
    ممكن تقولى عليه اختلاف فى وجهات النظر طالما بيحبك وعملك اللى انتى عيزاه فى الاخر
    اكيد انت غاليه عليه
    دمتى فى سعاده

    ReplyDelete
  7. انت عارفه احباط زى ده ماينفعش معاه مصالحه كده على الماشى
    لانها جت بعد ماتحرق دمك زياده
    وجت علشان يخلص من زعلك والسلام
    واتحداااك ان كان واصله انتى زعلانه من ايه او حتى انه غلطان ولا لأ
    لانه دايما متأكد انه مش غلطااان
    لان الرجاله عمرها مابتغلط والعياذ بالله
    ده على اعتبار ان اللى جابلك احباط راااجل زى مافهمت
    لان ماحدش بيجيب احباط منيل كده غيرهم
    تحياتى

    ReplyDelete
  8. دعوه
    الأخت العزيزه
    تحيه طيبه
    برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق

    صباحا عدا الجمعه
    ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

    وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
    المدونه
    http://netonradio.blogspot.com
    الموقع
    http://dear.to/cairo

    ReplyDelete
  9. علي فكره انا مش سايب مدونتك بس ده اول يوم بعد انتهاء العسكريه ورجعت امبارح ميت و مردتش غير في مدونه ليساندرا بس <_<

    بس ايه رايك في الاحباط ده :D

    ReplyDelete
  10. تامر دياب:
    حلو البوست ... ربنا يخليك
    :)
    حلو الاكتاب ... نووووووو
    --------------------------
    medicine break:
    هو مين اللى جميل ؟؟؟؟؟؟؟؟؟

    ---------------------------
    خطى تائهة:
    نعمل ايه بس الاحباط فى كل مكان
    شرفتينى فى المدونه

    ---------------------------
    الفراغ:
    هو احباط بعينه
    مهو عشان بيحبنى مش لازم يزعلنى
    والاختلاف فى وجهات النظر لما بيزيد عن حده بيتقلب لضده

    شكرا

    -------------------------------
    بنت الغربه:
    هو كل كلامك صح ماعدا بس الجاله
    صحيح هما بيعملوا احباط "منيل"
    :)
    بس انا كان عندى احباط من واحده صحبتى
    اهلا بيكى

    ---------------------------
    انت تسال والكمبيوتر يجيب:
    بالتوفيق ان شاء الله

    ----------------------------
    dr dead:
    اما نشوف بعد العسكريه بقى

    ReplyDelete
  11. عارف لما تبقى مستنى حاجه حلوه وعارف انها اكيد جايه
    يعنى مافيش احتمال انها ماتجيش
    ومستنيها

    وبعدين اول ماتيجى تلاقى اختلاف تام بين توقعاتك والواقع


    مش عارف أقولك إيه

    بس بجد الإحباط شىء بيخلى الحياة عاملة زى الميه الساقعة

    ولا بلاش الميه الساقعة

    زى الشاى اللى بيتباع فى القهوة لا يتشاف ولا يتشرب ولا أى حاجة يترمى وبس

    بيخلى طعم الحياة وكأنها مش حياة حاجة كدا رايحة فى الباى باى

    ربنا يكفيكى شره

    الإحساس اللى فى البوست دا بحس بيه بإستمرار من ناس معينين

    مش عارف العيب منى ولا من الناس دى

    بس الأكيد

    العيب منى :$

    :((

    أديكى خلينتينى أفتكر الهم وييجى لى إحباط تانى

    :D

    ثانكس على البوست

    :D

    ReplyDelete
  12. علي فكره الموضوع ده جميل جدا

    وكتابتك شيقه للغايه((حلوه اوي للغايه دي))هيهيهيهيه

    في انتظار ابداعك يا قمررررر

    :wub:

    ReplyDelete
  13. 3abasya wahed:
    هو اكيد الاحباط هو احنا
    عشان بنتوقع حاجه كويسه فى العالم ده

    معلش بقى على الاحباط اللى جالك من البوست بتاعى
    اعملك واحدشاى مظبوط

    :)

    ------------------------------
    ثلوج:
    شكرا يا سكر

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)