27 February, 2009

ده عقل يا ماما

فيها ايه يعنى لو اى مشكله حصلت وانا فضلت هاديه ومتاثرتش
فيها ايه برضه لو حصل حاجه كويسه وانا مافرحتش

يعنى عادى اتعودت على كده
لما بفرح بيكون فى هدوء ولما ازعل بيكون فى صمت

صحيح انا مش دايما بتوقع الاسوأ ولكن لو حصل وماله

يعنى لما اعز صديقاتى تعمل نفسها مش شايفانى وتهرب وتروح لوحدها رغم اننا اتفقنا نمشى سوا
عادى
هو انا يعنى هتوه لوحدى

يعنى لما اكون فى المطبخ وبتحرك راح الطبق وقع اتكسر
عادى
هنزعق ليه ونضايق هو يعنى الزعيق هيرجع الطبق

لما انتظر تليفون مهم بالساعه والاتنين وفى الاخر اطلب انا يقولى تاهت عن بالى
عادى
مانا اصلا كنت هطمن عليك .. براحتك

لما كل يوم نروح الكليه ونستنى الدكتور وبعد مايجى متاخر 3 ساعاتيجيله نايب "يادكتور محتاجينك فى العمليات "ويسيبنا
عادى
ماحنا بقالنا 4 سنين على كده

لما الاقى ان واحده احترمتها ولبيتلها طلبها وهى عايشه فى الاستهبال ومش عاجبها وعايزه اكتر رغم انه مش حقها
عادى
والمثل بيقول اعمل الخير وارميه البحر

لما كل كلمه تزعلك واصالحك .. وحتى لما تزعلنى برضه اجى واصالحك ..وتلاقينى بعد كده طنشتك
عادى
مانت عمرك ماصالحتنى

وغيره كتيييييييييييييييييير اوى

انما ماما بقى لو حصل معاها حاجه من دىتتنرفز وتزعل وتزعق وضغطها يعلى
انما انا


وتستغرب عليا
اقولها انا مش ناويه ضغطى يعلى كفايه انتى

وتقولى انتى لا بتزعلى ولا بتفرحى ولا بتتاثرى بكلام حد ولا موقف حصلك او حصل قدامك
ده انتى لو جالك عيان هيموت قبل ماتسألى فيه

بس يارب يرزقنا باول عيان كده وشوفى انا هعمل فيه ايه

وياسلام بقى لو شافت دكتور هادى فى التلفزيون وواقف مع العيان ومش قاعد بيعيط جمبه
تقولى يا ساتر عليكم انتوا كلكو كده

مهو من اللى شفناه يا حبيبتى
كنا اول مادخلنا الكليه ويبقى عندنا امتحان نبقى متوترين وخايفين وباين على شكلنا خالص
ويجى الدكاتره يقولونا مالكم فيه ايه
امتحاااااااااااااااااااان
يضحكوا ويقولولنا بكره تتعودوا
ودلوقتى فعلا يبقى عندنا امتحان ولا عارفين هو الساعه كام ولا بكام درجه ولا هنمتحن في ايه
وبرضه
CooooooooooooooooooL

طب وليه مانكونش هاديين يعنى
هناخد ايه من التوتر
انا عمرى ما بضايق من حد عمل فيا حاجه وحشه
وعمرى ماعاتبه الا اذا كان عزيز عليا اوى اوى يعنى
وده لو العتاب هيجيب معاه نتيجه
انما بقى غير كده لا بتضايق ولا اتغاظ
كل الحكايه بعامله بطريقته عادى جدا

الرسول صلى الله عليه وسلم قال
عامل الناس كما تحب ان يعاملوك
صدق رسول الله صلى الله عليه وسلم



غلطش انا؟؟؟؟؟؟؟
-----------------------------
تحديث:
الحديث يمكن لم اوفق فى اختياره
هو فعلا معناه اننا نعامل الناس بالحسنى ولا نرد لهم الاساءه بالاساءه
وياريت انى فعلا اقدر اعمل كده بس انا حقيقى ماقدرتش

وعشان كده اللى بيتعبنى ومارتحالوش بتجاهله خالص او اعامله بنفس معاملته
لانى فعلا بعامل كل واحد باللى يستحقه
وده يمكن يخلى ناس كتير تاخد عنى فكره مش صح
وأتقالتلى كتير من ناس اول مره تكلمنى " ايه ده يابندقه ده احنا كنا فاكرينك غير كده خالص"ارد عليهم
كل انسان بيفرض على اللى قدامه ازاى يتعامل معاه

بس ده مايمنعش انى برده هاكون هاديه مع اى موقف هيحصل من اى حد



20 February, 2009

هو يوم رعب من اوله

امبارح انا مارحتش الكليه وقاعده فى امان الله على الكمبيوتر من صباحيه ربنا
ماما راحت الشغل ,بابا نازل من بدرى ,العيال اخواتى وسربتهم على كلياتهم وقعدت لوحدى بقى بمزاجى من غير بتعملى ايه ولا هاتقومى امتى

شغلت اغانى وقاعده ادعبس فى المدوننات


وفجأه

جرس الباب رن
الساعه كانت عشره ونص تقريبا وده مش معاد حد يرجع دلوقتى
انا اتخضيت وقمت من على الكمبيوترجرى على الباب و

مين؟

همنورهمهمهنورش

ايه؟

مندىيمومنشورهت

ولا فهمت حاجه كان صوت واحده ست وقلت افتح اشوف هى عايزه ايه
بس ماعرفش ليه مافتحتش وقلتلها
ماعرفش مش عايزين

دخلت جوا وجه فى بالى عصابه الشقق اللى كانت بتخبط قبل ماتدخل تسرق
وجريت على المطبخ مسكت سكينه وجيبت موبايلى ووقفت ابص على الباب

كنت شبه بطله فيلم
SCREEM

وفضلت متنحه يجى عشر دقايق خايفه اى حد يقرب من باب الشقه
لحد ماطمنت الحمد لله انه مش هيحصل حاجه
****
عدى الوقت وبدا اخواتى يرجعوا وماما وبابا واتغدينا ومارضيتش اقولهم على اللى حصل
احسن يضحكوا عليا


بعد الغدا قعدنا نتفرج على التليفزيون
والاقى ريحه غريبه جدا بتهل عليا....... اقولهم انتوا مش شامين حاجه
يقولوا لا

انا هتخنق خلاص
قمت على المطبخ الاقى الغاز شغال ومن اكبر عين ...... والغاز مالى الدنيا

يعنى كنت هاروح فطييييييييييييييس ولا حد حاسس بحاجه اشمعنا انا يعنى
وطبعا افتكرت اعلانات زمان بتاعه الراجل اللى كان بيختبر تسريب الغاز بالولاعه


وماعملتش زيه


وبس كده عدى اليوم على خير وسهرنا من غير اى ظواهر غير طبيعيه
وكله نام وانا اااااخر واحده نمت دخلت انام كده على الساعه 2 صباحا
وماحدش يقولى ده بدرى اوى
وغطست فى السرير ولسه بقول يانوم
اسمع صوت غريب بره فى الصاله

عادى يا بندقه تلاقى الجيران وقعوا حاجه على الارض وبترن ولا حاجه

اصل جيرانا فى العماره كلهم ماتسمعلهمش صوت غير باليل بس

شويه والصوت حصل تاننى
جرررررررر جرررررررر

ركزت كده
طب دا صوت ايه مانا اصلى حافظه كل الاصوات اللى بسمعها
ده لاصوت الباب اللى بيزيق ولا صوت شباك البلكونه ولا صوت دق الكفته

اسمع






راح الحمد لله



جررررررررر جررررررررر جرررررررر

لا لا لا ايه ده الصوت بيقرب

وانا عشان نايمه على السرير بالعكس مش شايفه ايه اللى بيحصل ورايا


جرررررررررررررررررررررررررررر

حاسه انه واقف على باب الاوضه


وانا متنحه فى الحيطه قدامى انى اشوف خيال اشوف حاجه بتتحرك
اشوف حد من العيال البايخه اخواتى بيهرجوا

مافيش

جرررررررررررررررررررررر

يالهوى ده دخل الاوضه
يالااااااااااااااااااهوى حد يلحقتى


حاولت استجمع قوتى وشجاعتى ويابندقه اكيد مافيش حاجه تلاقى الشباك بيحرك اى حاجه فى الصاله

يا سلام وهلا الحاجات بتتحرك تدخل اوضتى انا بس


جررررررررررررررررررر


انى اقوم ابدااااااااااااااااااااا
اكيد مش جدعنه يعنى .......... بس تقريبا ماكنتش قادره اتحرك
دانا ماقدرتش اتحرك اشوف قلبى بيدق كام دقه ولا قدرت اشد الغطا واستخبى فيه

فضلت متنحه فى السقف




ربنا هدانى اقرا ايه "الكرسى" فضلت اقراها اقراها ودماغى بتلف يارتنى نمت مع اختى النهارده
لحد الحمد لله الصوت راااااااااااااااااااااااااااااح

ويادوب بدات اتحرك
لفيت نفسى جوا الغطا وقلت انشاله يكون مين برا
براحته
انا مش هنااااااااااااااااا


وانتو اول ناس تعرف اللى حصل ده


كنت هطيــــــــــــــح
:)

14 February, 2009

تم بحمد لله

فى الاول كده اطمنكم ان الاحباط راح من زمان
بس رجعنا الكليه تااااااانى
عاااااااااااااا



الحمد لله على اخر يوم فى الاجازه ربنا كرمنى وعملت حاجه كان مفروض تحصل من يجى خمس .. ست شهور كده

لالالالالالالالالالا
مش كسل
هو بس كسل :) على ملل على نوم على عدم وجود تشجيع على اشتراك مترو كان عايز يتجدد
يعنى كوكتيل حلو كده


بس والله من غير اختى حبيبتى دى ماكان حاجه هتتعمل السنادى خالص
يعنى هى اللى شجعتنى بجد فجأه كده وقالتلى يلا بينا

شكراااااااااااااااا يا اختى يا سكر


طبعا لا ننسى دور ماما وزير ماليه الاسره
ربنا يخليكى ليا

واحب اقولك والله ماكانت ازمة اقتصاديه ولا حاجه


بس الحمد لله كله تمام
وعدنا الى قواعدنا سالمين .... نخرج الصبح نايميين ... ونرجع مهدودين ... ناكل ونام زى الحلوين

07 February, 2009

يعنى ايه احباط يا مرسى؟




عارف لما تبقى مستنى حاجه حلوه وعارف انها اكيد جايه
يعنى مافيش احتمال انها ماتجيش
ومستنيها

وبعدين اول ماتيجى تلاقى اختلاف تام بين توقعاتك والواقع

هو ده بقى الاحباط

وده مش زعل لا احساس تانى خالص
اصل لو زعلان تبقى زعلان من حاجه او من حد انما الاحباط ده عامل كده زى مايكون حد رش عليك ميه ساقعه عشان يفوقك من اللى انت فيه
او زى الزوج كده لما ينتظر ان مراته بعد رحله الشوبنج اللى خلصت فيها فلوسه هتفتكره بهديه حلوه
ويطلع نصيبه فى الاخر شراب وكمان فردتين مش شبه بعض

تحس كده انك اهبل وعبيط وتقعد تضحك على نفسك
وده تقريبا اللى بنقول عليه شر البليه مايضحك

ويا سلام بقى لما لاحباط يجيلك من حد قريب منك


تبقى محتار طب اقوله ولا بلاش, مهو لازم انه يعرف ... لا بلاش , مهو انت مش لازم تتوقع انه هيصالحك اصلك تبقى عبيط برضه
وعشان انت طيب وهو كمان بيحبك رحت قايله
راح صحبك بدل مايكحلها هوبا .... عماها
برضه بحسن نيه

وكمان لسه مش عاجبك ده انت رخم اوى ومابتقدرش
ورغم انه عارف ان ليك حق بس بيكابر
مصريين يا جدع

وبعد ماتزعل
وده بقى زعل ... عشان كمان بيطلعك انت اللى غلطان




وفى الاخر تلاقيه عملك اللى نفسك فيه وبيصالحك
ماكان من الاول
لزمته ايه وجع الدماغ هو الواحد ناقص



02 February, 2009

كائنات ليليه كمبيوتريه

كل يوم طول النهارقاعد على النت بتعمل ايه
ولا حاجه

تدور هنا ولا هنا
مافيش حد خاااااااااالص



وفين بقى على بليل
وانت قاعد فى الظلمه لوحدك بعد ماكل اللى فى البيت ناموا
على اعتبار يعنى انك عملت نفسك نايم



تقوم تفتح الكمبيوتر


تلاقى كل مالذ وطاب


لا ياسيدى مش ساندوتش
انت نايم جعان ولا ايه


تلاقى كل الناس صحيت واستلمت النت هاتك يا بوستات ومنتديات ونقاشات وموضوعات
وتلاقى نفسك عسكرت على النت وهاتك يا شغل


طيب انا مالى بقى انا عايزه انام
يعنى اقعد اكلم نفسى طول النهار
وانتو تصحوا باليل

عاااااااااااااااااااااا


ده شكلى بالظبط دلوقتى


ايه الحكايه يا شباب هو كله باليل باليل ماله النهار يعنى
ولا هاتقولوا شغل

هو طبعا الليل حلو كده فى الابداع
بس ماما لو شافتنى هتموتنىىىىىىىىى

سلام

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)