18 January, 2009

يعنى ايه كرامه

هو يعنى ايه كرامه؟
وهى بتيجى منين اصلا؟
وياترى احنا بنتولد بيها ولا بنكتسبها بعد شويه؟ ولا يمكن بنشتريها؟
.
.
مش عارفه ليه السؤال ده جه على بالى من يومين كده
يمكن عشان رجعت الكليه تانى ورجعت امشى فى الشارع تانى واشوف بشر كتير وطريقه تعاملهم مع بعض
الناس بتعامل بعضها بطريقه وحشه اوى
وبتشتم وتضرب عادى جدا
بس لما لاقيت واحد بيشتم التانى وبيتحداه انه يرد عليه
لاقيت نفسى بقول مهو لو عنده كرامه كان عرف يرد
.
.
مش برضه كرامه الانسان هى اللى بتخليه يحافظ على نفسه ومايرضالهاش اهانه ابدا من اى حد مهما كان
وباى صوره
ومش برضه الكرامه دى اللى بتخلى ولاد البلد يدافعوا عن بعض واهل الحاره مايرضوش حد يكلم بنات حارتهم
انا بتكلم عن الحاره باعتبار ان اهلها كلهم بيكونوا ناس تعرف بعض وتخاف على بعض زى مابنشوف فى التليفزيونوعشان كده بيكون فى الفتوه اللى بيدافع عنهم
.
.
طيب يعنى الكرامه دى بقى بتيجى منين؟
اكيد بنتربى عليها من صغرنا ... من ساعة ما ماما تقولنا واحنا رايحيين المدرسه لو حد ضربك لازم تقول للمدرسه وتاخد حقك منه
بنتعلهمها لما ماما تقول لابنها خد بالك من اختك ومتخاليش حد يعاكسها وانت ماشى جنبها لان كرامتها من كرامتك
يعنى ماينفعش نشوف اخ مايقبلش كلمه على نفسه وهو سامع الناس بتتكلم على اخته وساكت
ومش بس اخته .. لا كمان خاله وعمه وكل قرايبه
يعنى انا ماقدرش افهم ان واحد عنده كرامه يقبل باهانه اى حد من قرايبه قدامه ويسكت من باب مثلا ان دى حاجه ماتخصوش
امال الناس ساكته ليه؟؟؟؟؟؟؟؟
.
.
ليه بيقول وانا مالى مادام ماحدش قربلى ماليش دعوه
يعنى اقصى اثاره لكرامته بتكون لو حد اتكلم عن عياله او زوجته بس
طب واخوك؟ واختك؟وعمك؟وجدك؟
مش كل الناس دى عيلتك واسمها من اسمك
.
انا من رأيى ان ده ضعف وخيبه
ضعف بيحاول انه يخبيه بانه يتهرب من مسؤليته
بيخفف من عليه الاعباء عشان مش قادر يتصدرلها
ضعف يخليه حتى يهاجمك لانك وضعته فى موقف يبين قد ايه هو ولا حاجه
ضعف مخزى
ضعف يخليك تكره انك تفكر فى يوم انك تساعد شخص تخلى عنك وقت ماكنت ضعيف ومحتاجله
ضعف يخليك مش طايق منه اى حاجه لانك مش واثق فيه, مش مطمن لوجوده جنبك
مانت عارف ان يوم ما هتحتاجه
مش هتلاقيه
ولما تبدا تبعد ..يلوم عليك ويقول مانت اللى بعدت
اكيد بعدت لان النسان يبان من موقف
وانا وقفت لوحدى
يبقى احسنلى اكمل لوحدى بدل ماضحك على نفسى وافكر ان معاى حد

1 comment:

  1. السلام عليكم

    أهنئك أختي الكريمة على المدونة الرائعه هذه وعلى فكرة البوست ده بالتحديد

    بجد انتي ناقشتي قضية من اخطر مايمكن

    فعلا الكرامة ثم الكرامة ثم الكرامة

    بارك الله فيكي بجد واتمنى لك التوفيق

    وياريت ناس كتير تفكر زيك

    بس احب اطمنك وجدا كمان انه مازال رغم قتامة الصورة مازال هناك وجوه مشرقة في مجتمعنا وناس عندها كرامة

    ناس ولاد بلد زي مابيقال عنهم

    تقبلي مروري الاول

    واتمنى لك التوفيق

    في حفظ الرحمن

    قلم رصاص

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)