28 January, 2009

برتوكول الطبيب المسلم

الدكاتره ربنا يهديهم السنادى
متخصصين تضيع وقت
ومنهم اللى بيهرج ومنهم اللى بيتكلم فى حاجات مفيده

ولما ربنا يكرمنا بواحد ابن حلال كده يقول كلمتين حلوين
تلاقيهم دخلوا الدماغ على طول

زى دكتور من يومين كده قالنا حديث للرسول
اللهم صلى وسلم وبارك على محمد واله وصحبه وسلم

"كل المسلم على المسلم حرام... دمه و ماله وعرضه" صدق رسول الله


طبعا احنا خدنا الحديث ده زماااااااااان ايام المدرسه
بس الطريقه بقى اللى الدكتور فسر بيها الحديث فى مجال الطب دى اللى كانت جديده

قال
ان دمه تفسر : ان حرام انك تقوم باى تدخل للمريض يكون من غير فايده
حتى لو كان بسيط مثل شكة ابره او اشعه او اى تدخل ضره اكتر من نفعه

مش بس دمه يعنى انك تقتله زى ماكنا فاكرين
ان من قتل نفس بغير نفس فكانما قتل الناس جميعا

ماله تفسر: حرام انك تطلب اى تحاليل او اختبارات مالهاش لازمه
لمجرد انك متفق مع المعمل انك تنفعه او متفق مع مندوب شركة الادويه انك تكتب دواء معين مع ان فى غيره له نفس التاثير وارخص بكتير
وزيها العمليات اللى بدون داعى واهو برضه تنفع زمايلك

عرضه تفسر : دى بقى اخلاقيات المهنه فى انك تحافظ على المريض وتراعى شعوره كبنى ادم مش مجرد حاله مرضيه

قد ايه الدين الاسلامى جميل وشامل لكل نواحى الحياه
صحيح
الدين المعامله

22 January, 2009

مدونون فى اجازه

يارب شهر واحد ده يخلص بقى

ليه؟

عشان كل حاجه ساكته فيه
المدونات والمنتديات والمواقع
وكل الناس مشغوله فى الامتحانات


هه هانت

كل اجازة نص سنه وانتم طيبين

18 January, 2009

يعنى ايه كرامه

هو يعنى ايه كرامه؟
وهى بتيجى منين اصلا؟
وياترى احنا بنتولد بيها ولا بنكتسبها بعد شويه؟ ولا يمكن بنشتريها؟
.
.
مش عارفه ليه السؤال ده جه على بالى من يومين كده
يمكن عشان رجعت الكليه تانى ورجعت امشى فى الشارع تانى واشوف بشر كتير وطريقه تعاملهم مع بعض
الناس بتعامل بعضها بطريقه وحشه اوى
وبتشتم وتضرب عادى جدا
بس لما لاقيت واحد بيشتم التانى وبيتحداه انه يرد عليه
لاقيت نفسى بقول مهو لو عنده كرامه كان عرف يرد
.
.
مش برضه كرامه الانسان هى اللى بتخليه يحافظ على نفسه ومايرضالهاش اهانه ابدا من اى حد مهما كان
وباى صوره
ومش برضه الكرامه دى اللى بتخلى ولاد البلد يدافعوا عن بعض واهل الحاره مايرضوش حد يكلم بنات حارتهم
انا بتكلم عن الحاره باعتبار ان اهلها كلهم بيكونوا ناس تعرف بعض وتخاف على بعض زى مابنشوف فى التليفزيونوعشان كده بيكون فى الفتوه اللى بيدافع عنهم
.
.
طيب يعنى الكرامه دى بقى بتيجى منين؟
اكيد بنتربى عليها من صغرنا ... من ساعة ما ماما تقولنا واحنا رايحيين المدرسه لو حد ضربك لازم تقول للمدرسه وتاخد حقك منه
بنتعلهمها لما ماما تقول لابنها خد بالك من اختك ومتخاليش حد يعاكسها وانت ماشى جنبها لان كرامتها من كرامتك
يعنى ماينفعش نشوف اخ مايقبلش كلمه على نفسه وهو سامع الناس بتتكلم على اخته وساكت
ومش بس اخته .. لا كمان خاله وعمه وكل قرايبه
يعنى انا ماقدرش افهم ان واحد عنده كرامه يقبل باهانه اى حد من قرايبه قدامه ويسكت من باب مثلا ان دى حاجه ماتخصوش
امال الناس ساكته ليه؟؟؟؟؟؟؟؟
.
.
ليه بيقول وانا مالى مادام ماحدش قربلى ماليش دعوه
يعنى اقصى اثاره لكرامته بتكون لو حد اتكلم عن عياله او زوجته بس
طب واخوك؟ واختك؟وعمك؟وجدك؟
مش كل الناس دى عيلتك واسمها من اسمك
.
انا من رأيى ان ده ضعف وخيبه
ضعف بيحاول انه يخبيه بانه يتهرب من مسؤليته
بيخفف من عليه الاعباء عشان مش قادر يتصدرلها
ضعف يخليه حتى يهاجمك لانك وضعته فى موقف يبين قد ايه هو ولا حاجه
ضعف مخزى
ضعف يخليك تكره انك تفكر فى يوم انك تساعد شخص تخلى عنك وقت ماكنت ضعيف ومحتاجله
ضعف يخليك مش طايق منه اى حاجه لانك مش واثق فيه, مش مطمن لوجوده جنبك
مانت عارف ان يوم ما هتحتاجه
مش هتلاقيه
ولما تبدا تبعد ..يلوم عليك ويقول مانت اللى بعدت
اكيد بعدت لان النسان يبان من موقف
وانا وقفت لوحدى
يبقى احسنلى اكمل لوحدى بدل ماضحك على نفسى وافكر ان معاى حد

12 January, 2009

سلطان المنتجعات؟؟!!

من كام يوم كده واحنا بنتفرج على اخبار غزه والقنوات كلها بتفتى فى مين الغلطان ومين السبب
وطبعا مصر كان ليها النصيب الاكبر من ادعاءات الخيانه وبيع القضيه الفلسطينيه
كل ده طبعا واحنا بنتفرج ونقول منه لله خلى رقبتنا قد السمسمه

ونقلب فى القنوات
كل الناس دلوقتى محللين سياسين من اول الناس فى الشارع ولحد رجال السياسه
وحتى المذيع ماقدرش يمسك نفسه من انه يدلى برأيه -يعنى هى جت عليه
لاقيته فى وسط كلامه عن موت الاطفال والقتل والحصار وكل ده و"سلطان المنتجعات" يرفض فتح المعابر

الكلمه عدت كده وحسين انها مش راكبه على بعضها
صحيح القناه كانت لبنانيه ومتعودين هم على السياحه والمنتجعات بس ايه اللى جاب الكلام ده فى النص دلوقتى؟؟؟؟؟؟؟
معقوله بيعمل اعلان فى الوسط

وبعدين فى ثانيه نورت :)
ايه ده ................ده احنا
ده بيتكلم علينا

اتاريه قصده علينا
يعنى هى حصلت هتشتموا كمان علنى كده فى اكبر راس فيكى يا مصر
لالالالالالالالالالالالالالالا
انا لا اسمح
دى بلدنا واحنا بس اللى لينا الحق نشتم فيها
اه "انا ادعى على بلدى واكره اللى يقول امين" كده مش حلو خالص

هما فاكرين مصر دى الحيطه المايله
كل مصيبه تحصل يبقى مصر ماعملتش مصر ماقدمتش مصر ماقالتش
ايه؟؟؟
طب مايورونا هما عملوا ايه........ ولا حاجه
ده حتى السعوديه منعت المظاهرات
ولا هو مكتوب علينا نحارب كل مره وهما بس يتفرجوا ويقزقزوا جوز ولوز بفلوسهم
فوقوا بقى يا عرب
صلاح الدين مارحش حارب اليهود غير لما حارب العرب والمسلمين الاول عشان يوحد كلمتهم

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)