28 December, 2009

انا اخرى تجارة اعضاء



دلوقتى وبعد 6 سنين فى كليه طب وقبلهم 3 سنين ثانويه عامه
وبعد ما اهلى صرفوا عليا دم قلبهم ... ده غير حرقة الاعصاب  والسهر والدعاء
وبعد ماقربت خلاص انى اكون دكتوره بجد واقبض 240 جنيه بحالهم
كان لازم احس انى مفروض اردلهم ولو بعض قليل من تعبهم معايا



بس الظاهر انى مش هلحق

 


لالالالالالا ماتقوليش انهم مش مستنين مننا حاجه
ولا تقولى كفايه انهم يشوفونا ناجحين
الحكايه مش كده خالص
الحكايه انهم يمكن مايلحقوش يشوفونى من اصله
طب خليك معايا

لما تبقى عارف ان الدنيا ماعدش فيها امان  ....   يبقى تحرص  صح؟
طب ولما تبقى ماشى فى الشارع اى حد يكلمك ترد عليه
اى واحده عجوزه  تناديك تشيل معاها ماشى
توصلها للبيت ماشى
مع ان ماما علمتك انك ماتكلمش حد غريب فى الشارع
اى واحد مش عارف الطريق تعرض عليك انك توصله  ... قال يعنى خريطة مصر حضرتك
يخبط الباب تتطوع حضرتك وتفتح من غير ماتعرف مين ... يابنى انتى ماسمعتش عن الحراميه اللى بيخبطوا على الباب الاول عشان يعرفوا مين فى الشقه
اى حد يعدى كده يقولك تعداد تديله بيانات عيلتك كده بكل سهوله ... تبقى اكيد اكيد عبيط

يبقى ماتستغربوش بقى لما تسمعوا انى اتخطفت وبتوزع بالحته دلوقتى
ويبقى طبيعى جدا واستاهل كل اللى جرالى عشان ماتعلمتش من كل الاخبار السودا اللى بنقراها كل يوم فى الجرايد

كانت معكم بندقه سابقا من داخل الشواااااااااااااااااااااااااال


24 December, 2009






كل عام وانتم بخير

وادعولى بقى عشان هكون يوميها فى امتحان 

17 December, 2009

كل هجره وانتم بخير

النهارده عام هجرى جديد
وطبعا لانه حاجه مش مهمه خااااااااالص عند حكومتنا فمافيش اجازه
مش مهم

انا جايه عشان اضم صوتى لمدونة الفراغ
فى دعوتها
هجرة الى الله

يارب يقدرنا ويتقبل منا




14 December, 2009

الحمد لله ربنا ينصر الاسلام والمسلمين دايما


اليوم بفضل الله صدر حكم من مجلس الدولة فى الدعوة التى رفعها الطالبات المنتقبات من ساكنات المدينة الجامعية المتضررات من قرار منع النقاب داخل المدينة وتزوير استقالات باسم الطالبات المنتقبات

صدر الحكم بنقض القرار وعدم صلاحيته وتمكين الطالبات المنتقبات من العودة الى المدينة

والله غالب على أمره

و عقبال قضية لجان الامتحانات

الله أكبر الله أعز مما نخاف و نحذر

مبارك لأخواتنا المنتقبات

################

الخبر ده من الفيس بوك عن جامعتنا
عين شمس الموقره

اللى اصدرت مؤخرا قرار جديد مهين
بمنع الطلبات وهيئة التدريس المنتقبات بدخول لجان الامتحان
انا عرفت القرار ده اول يوم رحت الامتحان
وبجد حزنت على حال البلد اوى

بس الحمد لله ربنا ينصرهم وينصر الاسلام
ويذل اعدائنا يارب


هانت

ربنا يخليكم يا احلى مدونين

بجد فرحت اوى بدعواتكم ليا وكانت بتصبرنى كل ما اجرى على الكمبيوتر اشوف مين بيدعيلى

دعواتكم معايا بقى
لسه فى امتحانات تانى




04 December, 2009

22 November, 2009

الحق اللى بيحصل فى الزحمة


المصيلحى: 13.5 جنيه لكل مواطن شهرياً مقابل رفع ثمن الرغيف إلى 20 قرشاً بعد إلغاء الدعم

أعلن الدكتور على المصيلحى، وزير التضامن الاجتماعى، استبدال دعم رغيف العيش من عينى إلى نقدى خلال العام المقبل، مع الإبقاء على الآليات الأساسية التى تتخذها الدولة لتحقيق العدالة الاجتماعية.


وأضاف المصيلحى فى برنامج «منتهى السياسة» الذى يقدمه الإعلامى محمود مسلم على قناة «المحور»، أن هناك عدم عدالة فى توزيع الدعم، خاصة فى رغيف العيش والبوتاجاز، موضحاً أن الرغيف المدعم يكلف الدولة 10.5 مليار جنيه سنوياً ومتاح للسائحين والأغنياء والفقراء والأشد فقراً، وكذلك البوتاجاز

وأضاف أن هناك مشروع قانون خاصا بمعاش الضمان الاجتماعى سوف يعرض على مجلس الشعب خلال الدورة البرلمانية المقبلة لزيادته بنسبة 25% ليصل إلى
110 جنيهات، وهناك فئات ستحصل على جنيهاً 160 شهرياً، وهو المبلغ الذى وصفه الوزير بأنه
«خير كبير جداً جداً»

اصل مرتب الوزير بتاعنا 250 جنيه وكده يعتبر زياده 50%

وأكد وزير التضامن الاجتماعى أن الموازنة المقبلة 2010/2011 ستشهد استبدال دعم الخبز بالدعم النقدى بحيث يحصل كل مواطن على مبلغ 13.5 جنيه شهرياً هى قيمة استهلاكه من الخبز شهرياً، فيما يصل سعر الرغيف إلى 20 قرشاً، موضحاً أن وزارته لديها قاعدة بيانات «سليمة» وخريطة للفقر فى مشروع الـ 1000 قرية الأكثر فقراً



13.5جنيه تشترى 67.5 رغيف بسعر 20 قرش للرغيف
تقسم على 30 يوم يكون نصيب الفرد فى اليوم 2.25 رغيف ، بواقع ثلاثة أرباع الرغيف فى الوجبة الواحدة
يا بلاش

الخبر فى اليوم السابع
العالم اون لاين

ياترى بقى هنتحرك عشان اكل عيشنا زى ماتحركنا عشان كرامتنا
ياترى حكومتنا هتدافع عننا قدام نفسها ازاى؟؟؟

19 November, 2009

يا مصريين hard luck

راح الماتش
وراح الكأس " قال يعنى كنا هنجيب الكاس" وراح دم العيال اللى اتبهدلوا فى السودان والجزائر

نرجع بقى نشوف حاجه نتخانق عليها تانى

وعموما برضه

كل عيد اضحى وانتم طيبين

Image and video hosting by TinyPic



18 November, 2009

بس خلاص لقيت حاجه اكتبها :)

وانا قاعده بقى زهقانه انى بقالى كتير مش بكتب
وكلكم وحشتونى
ببص كده على النتيجه
واذ فجأة لقيت ان العيد فاضله 9 ايام

Image and video hosting by TinyPic


كــــــــــــــــــل عيد وانتم طيبيــــــــــــــــن



وصحيت لقيت الخروف الامور ده بيمأمأ عند الجيران



ثم وانا فاكره ان النهارده الخميس واخر الاسبوع
اكتشفت برضه انه الاربعاء
وان النهارده الماتش
اللى اكتشفت برضه انه مش متذاع: رخامه ما بعدها رخامه

طبعا سامعاكم بتقولوا انتى اكتشافاتك متاخره اوى ... انتى عايشه فين
اقولك يا سيدى عايشه فى بيات شتوى
<_<




يارب نكسب ونفقع الجزائريين ويجيلهم شلل فى الملعب
عشان يبطلوا ضرب وتكسير فينا



بقا بالزمه فى كتيبة اعدام عساسيل كده




يــــــــــــــــارب نكسب يـــــــــــــــــــــارب

28 October, 2009

WOOOOOOMEN

اسم العنصر : المرأة


الخواص الفيزيائية:

1. يصل لدرجة الغليان لأتفه الأسباب.

2. يمكن أن يتجمد في أي وقت.

3 . يذوب بسهولة عند معاملته بالشكل اللائق.

4 . شديد المرارة إذا لم يستعمل بالطريقة الصحيحة.



الخواص الكيميائية:

1 .عضو نشط جداً.

2. غير مستقر.

3. يملك حساسية قوية للذهب والفضة والبلاتين والأحجار الكريمة.

4. عنيف إذا ترك وحيداً.
5. قابل لامتصاص كمية هائلة من الطعام الدسم.

6 . يتحول إلى اللون الأحمر عند وضعه بجانب عنصر مشابه أكثر جمالاً.



الاستخدامات:

1 . يتميز بصفات جمالية تؤهله لأن يصلح للزينة في أي مكان.

2. محفز مثالي للحصول على الثروة.

3 . افضل العناصر المبددة للدخل التي عرفت حتى الآن..

4 . لا يستطيع الصمود طويلا دون كلام



تحذير::::::::

- قابلة للانفجار إذا وضعت في مأزق.

- قابلة لتغيير شكلها عند غسلها بالماء




YES WE ARE






25 October, 2009

14 October, 2009

الاسبرين مش لاى حد


اسبرين
يعنى مصدع .... خد اسبرين
سخن .... خد اسبرين
سنانك بتوجعك ... خد اسبرين

اسبرين ... زمان ايام الرخص كنت تشترى كبشه منه ب25قرش
دلوقتى ال5 بربع
ويمكن يغلى ياعالم
كنت تلاقيه فى كل بيت بيعالج كل حاجه
الحمد لله

بس بما أننا بقى على وش شتا
وكله ياخد اسبرين للبرد
طب عمرك بقا سمعت عن حد خد اسبرين جاله اعراض الم فى المعدة وقئ بدم
طب سمعت انه ممكن يحس بدوخه وتوهان واحتمال قئ واسهال

واحتمال الموضوع يكبر معاه ويدخل فى تغيرات نفسيه وتغيرات فى الشخصيه يعنى يأثر على دماغه يعنى ويدخل فى غيبوبه كمان

لاااااااا طبعا حد يحصله كده من شويه اسبرين
ههههههههههههه انتى اكيد بتهزرى

لا ياسيدى مش بهزر ده ممكن يحصل فعلا دى اعراض
reye syndrome

ده صحيح مرض نادر ويصيب الاطفال تحت سن 18 اللى بياخدوا اسبرين لعلاج الامراض الفيروسيه
وبما ان سن 18 ماعدوش اطفال وممكن ياخدوا الدوا من نفسهم دلوقتى فكان لازم يعرفوا ان الاسبرين مش برئ اوى زى اسمه كده

ده مش تفكيرى لوحدى كده بس انا سمعتها فى الراديو
وزاره الصحه تحذر من استخدام الاسبرين

غير بقا الاعراض اللى فاتت دى واللى بتحصل للصغار
الاسبرين نفسه ممكن وبسهوله جدا يعمل قرحه فى المعدى تؤدى لنزيف داخلى حاد ممكن يوصل للموت
لانه ببساطه عباره عن حمض
salicylic acid

بياكل فى جدار المعده ....ودى كانت طريقه خايبه كده بينتحروا بيها زمان .. حد يتألم كل ده عشان يموت نفسه


عشان كده لما باجى اخد اسبرين لازم اكون اكلت قبله وكمان بكسر القرص لاربع اربع واشرب معاه ميه كتيييرعشان يعوم مايلزقش
وده كلام بجد مش هزار

بس اعترافا بفضل الاسبرين هو مش دوا وحش فى كل حاجه يعنى
ده مفيد لكبار السن اللى بياخدوه عشان يحميهم من تجلطات الدم ومشاكلها
وكمان بياخده مرضى الغسيل الكلوى واى حد مركب صمامات فى القلب
واى حد بيعدى سن ال40 لازم ياخد قرص اسبرين يوم ويوم وقايه

كووووووووووووووووووووووووووول ده عشان قرص اسبرين



06 October, 2009

مش هاقول

لا مش هاقول
انا عارفه انكم هاتقولوا انى جايه اتكلم على الماتش
بس لا انا مش هاقول

انا بقول ان النهارده 6 اكتوبر
يعنى اجازه
والريس اجازه
يعنى مش هيخرج النهارده ... وهيأجل زياره النصب التذكارى لليومين الجايين
يعنى اللى ناوى يخرج اربع وخميس يفكر تانى
الطريق واقف واقف واااااااااااقف يا ولدى

انا بس بفكركم
عشان اصلا الدنيا زحمه و واقفه لوحدها والسواقين عاملين اضراب والناس كلها افتكرت تروح الشغل فجأه

01 October, 2009

ابقوا قولولى

طول النهار والليل الناس فاتحه التليفزون
بيتفرجوا على ايه؟؟؟؟؟؟؟
كووووووووووووووووووره طبعا
وتقريبا برضه منتخب الشباب

اول مره اشوف حد مشغل التليفزيون الارضى
يافرحتك يا وزير الاعلام

الماتش النهارده الساعه 9ونص
شوفوه بقى وبشرونى خرجنا ولا صعدنا

اصلهم بعد اللى عملوه فى ماتش بروجواى سدوا نفسى
ومش عايز اشوفهم تانى

بس انا اكتشفت حاجه حلوه اوى فى ماتشات الكوره
بتخليك تقعد تتفرج من غير ماتغير المحطه
وهى
مافيهااش فااااااااااااااااااااااصل ونواصل
مافيهاش اعلانات فى النص
مافيهاش اوعى تغير المحطه

بس خلاص
مشاهده سعيده
وحظ سعيد للمنتخب

28 September, 2009

اغانى وعجبانى



أسمع كلامى وصدقة انت اللى روحى بتعشقة
كان حلم نفسى احققة انى ابقى ليك
قربنى منك ضمنى قد اما احبك حبينى
من غيرك انت يهمنى دا انا روحى فيك

ملهوفة عليك ومسلسمة تقدر تقول مستسلمة
حاسة انى طايرة ف السما واخدنى الشوق
متحيرة متغيرة وكأنى لسة صغيرة
لو بحلم انا بالحلم دا مش عايزه أفوق

لحظة حنان انا عيشتها لحظة ما شوفتك وقتها
وباعلى صوت انا قولتها هفضل معاك
جمبك طريقى هكملة لو لسة عمرى فى أولة
المستحيل انا هعمله علشان هواك

ملهوفه عليك ومسلمه تقدر تقول مستسلمه
حاسة انى طايرة ف السما واخدنى الشوق
متحيرة متغيرة وكأنى لسة صغيرة
لو بحلم انا بالحلم دا مش عايزه أفوق

جنـــــــــــات


ganat

24 September, 2009

مبروك علينا


مبروك لمنتخب الشباب المصرى
ماشاء الله عليهم لعبوا حلو


صحيح انا ماليش فى الكوره بس عجبنى الماتش
وعجبنى اكتر اعلانات كوكا كولا عنهم فى رمضان


غير بقى انهم لعبوا حلو
كمان كان شكلهم حلو
شباب طـــول بــعرض


شكلهم احلى من الصور بكتير
ربنا يحميهم

الحمد لله ربنا كرمنا بالفوز
عقبال الجاى


***

نرجع بقى لرمضان
واعلانات رمضان
اشمعنا الاعلانات .... عشان تقريبا ماشفتش غير اعلانات وفى وسطها حته مسلسلات

احلى اعلانات عجبتنى كانت:
اعلان جهينه رايب .. ريحها ومتتعبهاش
اتصالات .. الشريحه دى هو ده وقتها
احمد حلمى ومنى .. يا حبيبتى يا اوبترا
رينو .. صحيح هايله بس مابتعومش
اعلان موبينيل مش بطال بس الوانه كتير
اعلان فوكس رغم انه نزل اخر رمضان بس كان احلى اعلان للشيبسى

كفايه كده ولو لافتكرت تانى هقولكم

20 September, 2009

عيد سعيد ان شاء الله

كل عيد وانتم طيبين
ويكون ربنا تقبل منا صيامنا وغفرلنا وكتبلنا الجنه يارب

طبعا المسابقه جاوب عليها محمد بس
THE illusionist


هو فعلا اكبر عدد ورد فى القرآن كان 100000
واطول ايه هى ايه الدين فى سورة البقرة
وعدد السجدات انا فاكره انه كان 14 بس مادام عدتهم خلاص يبقوا 15
بس بقى اجزاء القرآن فكلهم نفس الطول بالظبط كلهم نفس عدد الحروف
:)

انا دعيتلك
يا محمد وربنا يحققلك كل اللى تتمناه
وكل سنه وانت طيب

وادى يا عم الجايزه


14 September, 2009

مسابقه اخر رمضان




سلام عليكم يا احلى مدونين
كل سنه وانتو طيبين رمضان خلاص بيقول باى باى
لا
باى باى ايه ؟؟.... سلام عليكم

ربنا يتقبل منا صلاتنا وصيامنا فيه ويبلغنا ليه القدر ياااااااارب

قولوا امين
:)

شوفوا بقى يا حلوين بما اننا قربنا نختم القرآن .. وفى ناس ربنا كرمها وبتختم تانى مره
فالاسئله هتكون سهله خالص ان شاء الله

1- ايه اكبر رقم ورد فى القرآن؟؟
2- كام عدد السجدات فى المصحف؟؟
3- ايه اطول ايه فى القرآن؟؟
4- ايه اكبر/اطول جزء من ال30 جزء ؟؟

يلا بقا منتظره الاجابات الحلوه
واللى هيجاوب صح هدعيله ربنا يتقبل منا ومنكم رمضان ... وكل ماتبعت اكتر ,فرصتك فى الدعاء تكبر


ايه عايز كحك؟؟ كحك ايه بس ده مضر بالصحه
وبعدين ده فال مش حلو .. حد داخل مسابقه يقول عايز كحكه
هجيبلكم بسكويت وبيتيفور



*********************************

معلومه على الماشى

هل تعلم ان دعاء ختم القرآن يتنزل له 60 الف ملك من السماء يؤمنون على دعائك ويستغفرون لك الله
اللهم تقبل منا يا كريم

18 August, 2009

كل رمضان وانتو طيبين


رمضان جانا اهلا رمضان
اه يانا ... عندنا امتحان
هنصوم ازاى ... ونذاكر كمان
اهلا اهلا رمضااااااااااااااااان

كل سنه وانتو طيبين
بجد وحشتونى كتير
انا عارفه انى بعدت شويتين
بس بشكر كل الناس اللى علقت عندى وسالت عليا

ربنا يعينا ويقوينا على الصيام السنه
والكام سنه الحر الجايين

طبعا مش هوصيكم تتابعو الخمستاشر الف مسلسل بتوع رمضان
وبين كل مسلسل ومسلسل ربنا يرحمكم من الاعلانات
وهسالكم فيها بعد رمضان
عشان انا يادوب بفطر واصلى التراويح وانام عشان الحق اتسحر
وبقفل التلفزيون ده خالص
بلا مسلسلات بلا اعلانات خلينا مع القطايف والمكسرات


وده فانوس كرومبو افندى حبيب الملايين
هديه منى ليكم


وبمناسبه الشهر الجميل"انا بحب رمضان ياعم وبقوله ياجميل" انا غيرت المدونه وخليتها ابيض
عشان ايامنا تكون بيضاء فى رمضان
يارب تعجبكم

اشوفكم على العيد ان شاء الله
سلااااااااااااااااااااام

30 June, 2009

translate into EnGliSh

ان حظى كدقيق فوق شوك نثروه .. وجائوا بحفاة يوم عاصف ليجمعوه


ماما قالتلى سيب القطه وخليها فى حالها...لالالالا دى قصه تانيه
:)
ماما قالتلى ان الجمله دى جت فى امتحان ثانوى ازهرى عشان يترجموها
اصل ماما عارفه حبى للانجليزى وغلاوته فى قلبى
الصراحه اول ماسمعتها قلت دى صعبه اوى وفيها مواطن جمال
بس بعد شويه اخدت بالى ان المشكله مش فى مواطن الجمال
المشكله فى المواطن اللى جايب الجمله دى لناس فى عز شبابها وساقها القدر لامتحان الثانويه
يعنى العيال اصلا مش ناقصين حد يفكرهم بحظهم الاسود.. مش وقته خالص فى الامتحان
يعنى مش كفايه مواضيع التعبير اللى عن الانجازات الضخمه فى بلدنا والاقتصاد المنتعش وفرص العمل اللى مرميه على الرصيف


يلا يا حلويين ترجموا الجمله فى اقل من 30 ثانيه
ومن غير غش

الاسرع والاصح هيكسب معانا 5000 جنيه اسبوعيا
وابقوا قابلونى الثانويه الجايه

23 June, 2009

e MAIL


الايميل ده جالى ولقيت فيه كلام حلو كتير
قلت اكتبه هنا نقرأه كلنا
يارب يعجبكم..... قولولى رايكم ايه؟



لكي تدرك قيمة العشر سنوات .... إسأل زوجين انـفـصلا حديـثاً

لكي تدرك قيمة الأربع سنوات .... إسأل شخص مـتخـرج من الجامعة حديثاً

لكي تدرك قيمة السنة .... إسأل طالب فـشـل في الإختبار النهائي

لكي تدرك قيمة الشهر .... إسأل أم وضعت مولودها قبل موعده

لكي تدرك قيمة الأسبوع .... إسأل محرر في جريدة أسبوعية

لكي تدرك قمة الساعة .... إسأل عـشاق ينتظرون اللقاء

لكي تدرك قيمة الدقيقة .... إسأل شخص فاته القطار .. الحافلة .... أو الطائرة

لكي تدرك قيمة الثانية ولكي تدري قيمة الجزء من الثانية ...... إسأل شخص فاز بميدالية فضية في الأولومبيات وفي الأغلب يكون الفرق بين الذهبي والفضي أجزاء قليلة من الثانية

لكي تدرك فيمة الصديق .... إخسر واحد

لكي تدرك قيمة الأخت .... إسأل شخص ليس لديه أخوات الوقت لا ينتظر أحد وكل لحظة تمتلكها هي ثروة وستغتغلها أكثر إذا شاركت بها شخص غير عادي

لكي تدرك قيمة الحياة .... إسأل عن إحساس من على فراش الموت

لكي تدرك قيمة ذكر الله ...... مت وأنظر ماذا فقدت من عمرك وأنت غافل


**********************************

طبيب شاهد في طريقه كلب مصاب بكسر إحدى قوائمه فحمله إلى عيادته البيطرية وقام بمعالجته ......
وبعد أن تماثل للشفاء أطلق الطبيب سراح الكلب ......

وبعد فترة من الزمن سمع الطبيب نباح كلب عند باب عيادته ......

فلما فتح الباب وجد الكلب الذي عالجه ومعه كلب آخر مصاب ...


فيا سبحان الله ما الذي ألهمه وعلمه هذا ......

إنه الله جلَّ وعلا .

****************************************************


كان هناك قط لصاحب بيت يقدم له الطعام كل يوم ....

ولكن هذا القط لم يكتفي بالطعام الذي يقدمه له صاحب البيت ....

فأخذ يسرق من البيت الطعام فأخذ صاحب البيت يراقب القط ......

فتبين له أنه كان يقدم الطعام الذي يسرقه لقط آخر أعمى


لا إلـــه إلا الــلــه

كيف كان هذا القط يتكفل بإطعام قط كفيف ؟؟؟


فاسمع قول الله تعالى :- ' وما من دابةٍ في الأرض ولا في السماءِ إلا على الله رزقها '

سبحان الله وبحمده

عدد خلقه

ورضا نفسه

وزنة عرشه

ومداد كلماته

***************************************************



وهذا موقف حدث بالعراق يحكيه شاب عراقي قائلاً :-

عندنا نؤمن بشيء اسمه حية البيت (( الحية = أفعى )) وحية البيت التي تعيش في البيت لا تؤذي ....

في أحد البيوت الريفية كان لأفعى صغار تحت كوم من التبن وعندما أرادت المرأة العجوز صاحبة البيت رفع التبن .... وجدت صغار الأفعى .... فما كان منها إلا أن حملت الصغار إلى مكان قريب آمن

وعندما عادت الأفعى ولم تجد صغارها جن جنونها واتجهت صوب إناء كبير فيه حليب ...... وقامت بفرز سمها من أنيابها في الإناء ......

وبعد أن بحثت و وجدت صغارها في مكان قريب ...... عادت ورمت نفسها في الحليب ثم خرجت منه ...... واتجهت إلى رماد التنور وأخذت تتقلب به ليلتصق الرماد بجسمها .... ثم عادت ودخلت في إناء الحليب لكي تعيبه ولا يستخدمه أهل البيت .... وقد كانت المرأة العجوز تراقب هذا المنظر العجيب من بعيد ....

ولله في خلقه شؤون

*********************************************************************


تخيل .... أنك واقف يوم القيامة وتحاسب ولست بضامن دخول الجنة

وفجأة ....... تأتيك جبال من الحسنات , لا تدري من أين !!....

من الإستمرار بقول :-

ســبـحـان الله وبحمده ســبــحـان الله العظيم

09 June, 2009

Peace

خلاص انا مش زهقانه
اصلى زهقت من كتر الزهق

مهو لازم الواحد يزهق
فى حاجات كتير عايز يعملها ومش عارف
وحاجات اكتر لازم يعملها وهو مش راضى


خلاص بقى انا مش زهقانه
انا بس هاخد اجازه
قال يعنى انا كنت موجوده اوى
بس اهو اجازه وخلاص مانا مش عارفه افلفص من الكليه

بس هتابع مدوناتكم كلها
صحيح متاخر شويتين بس انا متابعه

سلام


15 May, 2009

ارفع الروح المعونيه يابنى انت وهى

كله يروح يبارك المولود الجديد
ويهنى امه وابوه ويدعيله بالعمر السعيد
ده حبيب قلبى "مصطفى" شرف
واليوم ده كان عيد


يلا بقى باركولهم
عشان ترفعوا روحهم المعنويه
اصل الواد غجرى و مطلع عينهم




ومدونه مخصوص للسكر المعقود

يلا بقى ماتكسفونيش هراقب التعليقات واشوف مين راحلهم
:D

06 May, 2009

اهداء لكل اللى بيذاكر


بما اننا داخلين على امتحانات والمفروض اننا بنذاكر
قلت افكركم بالمذاكره واهو اخد فيكم ثواب يمكن افتكر انا كمان واذاكر
:(


كلنا سمعنا بابا وماما بيقولوا
"ذاكر عشان تنجح"
"لو ماذاكرتش ابقى قابلنى لو نفعت"
عادى يعنى كلام مكررررررر ومابيجيبش نتيجه
مش عارفه ليه مصممين يقولوه برضه
المهم بقى بعد الفحص والتفكير والنعكشه فى معانى الكلام توصلنا لايه؟؟؟؟؟؟
هما بيقوله : هتذاكر هتنجح
مش هتذاكر هتسقط

وبما ان هتنجح = مش هتسقط

اذن


هتذاكر= مش هتسقط ------------ (1)
مش هتذاكر= هتسقط ------------ (2)

بجمع (1) و(2)


هتذاكر+ مش هتذاكر = هتسقط+مش هتسقط

ناخدعامل مشترك

هتذاكر(1+مش ) = هتسقط(1 + مش)

بالقسمه على (1+مش)

النتيجه النهائيه : هتذاكر = هتسقط

ههههههههههههههههههههههه
عرفتوا بقى احنا مش بنذاكر ليه
عشان مصلحتنا طبعا

اللى مش عارف المعادلاات دى جت ازاى؟ يبقى فعلا محتاج يذاكر ويستاهل كل اللى يجراله
المعادلات دى منقوله... عشان انا كنت ادبى

وطبعا فى المقوله الشهيره الصائبه فى معظم الاحيان
والتى قالها العالم المشهور المغمور اللى مافيش بعده صاحب الرأى الرشيد والكلام السديد اللى هو اختى

العلم نور
والنور كهرباء
والكرباء خطر
فاحترس من العلم


بعد الكلام الجميل اللى فوق ده بقى اللى جاى على مزاجنا ويريح كتير
نيجى بقى للكلام اللى بيوجع
زمان قالو:

شكوت الى وكيع سوء حفظى .. فارشدنى الى ترك المعاصى
وقال ان العلم نور.............. ونور الله لا يهدى لعاصى

حد فكر قبل كده فى معنى الكلام ده
وان سبب اننا بنتعب فى المذاكره هو ممكن يكون حاجه غلط عملناها
الغلط ده ممكن يكون كبير زى عقوق الوالدين او النظره الحرام و...
او يكون صغير زى الكلام الخارج والاغانى الهابطه و...
والرسول عليه الصلاة والسلام قال:"اياكم ومحقرات الذنوب"
يعنى انك تعمل ذنب وتقول ده صغير .. مش مشكله

اكيد كلنا عارفين المقوله دى وعارفين معناها او على الاقل عارفين العكس,
عارفين اننا لما بنيجى نذاكر وعايزين ربنا يكرمنا بنعمل خير ونصلى فى الجامع
والجامع شاهد علينا فى امتحانات الثانويه العامه
:)
ربنا يتقبل منا جميعا ويعينا على عمل الخير
ونفكر قبل مانعمل اى حاجه غلط ان ده هيضرنا بشكل مباشر

يعنى ايه مباشر
يعنى هتلاقى نتيجه عملك امامك وبسرعه
لاننا كتير بنفكر ان لسه بدرى على الموت والحساب

يارب اكون عرفت اوصل وجهة نظرى
عشان انا قرات البوست وحاسه انه ملخبط خالص
المهم
نفتكر
شككوت الى وكيع سوء حفظى فارشدنى الى ترك المعاصى
وقال ان العلم نـــــــــــــــــــور ونور الله لا يهدى لعاصى

03 May, 2009

ماعنديش حاجه اقولها

سلام عليكم

طبعا اتاخرت كتير كالعاده
بس مش لاقيه حاجه اقولها
او عندى حاجات كتييييير بس مافيش مزاج اقول واكتب

كل يوم ارجع مصدعه والتدوين ده عايز دماغ صاحيه


بس حبيت اقول ان انا هنا
وبتابع مدونات اصدقائى
وربنا يسهل واكتب حاجه قريب

18 April, 2009

ياه من زمان اوى كده

سلام عليكم
صحيح بقالى كتير ماكتبتش .. بس ماخدتش بالى انه كتير اوى كده
18 يوم
هييييييييييه دنيا

قلت بس اطمنكم عليا
انا الحمد لله بخير

كنت عايزه اقول ايه بقى
؟؟؟؟؟

كتير ساعات الواحد يحس انه مخنوق وقرفان من الدنيا واللى فيها
ونفسه يموت ويرتاح
وتلاقيه فى وسط الخنقه يقول "ربنا ياخدنى ويريحنى بقى" بعد الشر عليا طبعا
:)
بس بتحصل وبتحصل كتير كمان

ساعتها بقى انا فكرت
صحيح لو مت هرتاح من الدنيا واللى فيها
بس ياترى اخرتى فيها ايه؟؟؟؟؟؟؟؟

مانا عملت بلاوى كتير اصلى وياترى ربنا غفرلى ؟؟ ولا لسه؟؟

فانا قررت انى اعمل حسابى قبل ماموت واستغفر ربنا عشان يغفرلى اللى بيحصل منى

"وَمَنْ يَعْمَلْ سُوءاً أَوْ يَظْلِمْ نَفْسَهُ ثُمَّ يَسْتَغْفِرِ اللَّهَ يَجِدِ اللَّهَ غَفُوراً رَحِيماً"

استغفر الله العظيم

فعلا مش سهل انى اموت كده والاقى مستنينى حاجات كتير اتحاسب عليها
انا دلوقتى كل مافكر تلاقينى اقول استغفر الله العظيم
ماحدش ضامن عمره

وربنا قال "وما خلقت الجن والانس الا ليعبدون"

طب انا ماعملتش حسنات كتير ولا سيئات كتير بس ماضمنش يكون فى حياتى حاجه غلط وانا مش واخده بالى
يعنى يوم مازعقت لامن الكليه عشان الكارنيه
صحيح هو كان يستاهل بس برضه كان راجل كبير ومايصحش

يعنى لما بزعل ماما كل ساعتين وقبل الاكل وبعده
طبعا مش قصدى بس اهى زعلت
فين بقى "وبالوالدين احسانا"

كمان لاقيت انى لما اقول استغفر الله العظيم
الزهق والقرف اللى الواحد حاسس بيه بيخف كتير
"الابذكر الله تطمئن القلوب"

الفايده كمان مش بس معنويه
لا... ده الاستغفار يزيد الرزق
فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا(10)يُرْسِلْ السَّمَاءَ عَلَيْكُمْ مِدْرَارًا(11)وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا(12)

يعنى الحكايه فيها فلووووووووس
:D

طبعا هو سيد الاستغفار:اللهم أنت ربي لا إله إلا أنت خلقتني ، وأنا عبدك ، وأنا على عهدك ، ووعدك ما استطعت ،
أعوذ بك من شر ما صنعت ، أبوء لك بنعمتك عليَّ ، وأبوء بذنبي ، فاغفر لي فإنه لا يغفر الذنوب إلا
أنت

وفي حديث عبد الله بن عمرو أن أبا بكر قال : يا رسول الله علمني دعاء أدعو به في صلاتي ، قال :
قل : " اللهم إني ظلمت نفسي ظلمـًا كثيرًا ولا يغفر الذنوب إلا أنت ، فاغفر لي مغفرة من عندك
وارحمني إنك أنت الغفور الرحيم


ومن أفضل الاستغفار أن يقول العبد : " أستغفر الله العظيم الذي لا إله إلا هو الحي القيوم وأتوب
إليه " .


ولما اسمع الحديث القدسى:
قال الله تعالى : " يا ابن آدم إنك ما دعوتني ورجوتني غفرت لك ما
كان منك ولا أبالي ، يا ابن آدم لو بلغت ذنوبك عنان السماء ثم استغفرتني غفرت لك ، يا ابن آدم
لو أتيتني بقراب الأرض خطايا ثم لقيتني لا تشرك بي شيئـًا لأتيتك بقرابها مغفرة "


يبقى لازم احب ربنا اكتر واكتر


يعنى من الاخر اللى زهقان وقرفان يستغفر ربنا كتييييييييييييييير
وربنا يفرج همه
وبالمره ياخد حسنات وربنا يمحو عنه سيئات ويوسع رزقه
وكده كده كسبان
واحسن من مسابقات 0900

01 April, 2009

وانا كمان اشمعنا انا يعنى؟


تاج يا شباب
انا جالى التاج ده مرتين
مره اتدبست فيه من فتافيت ربع قرن
ومره من زوجه عنيده

وقلت بقى اجاوبه عشان الحق الاقى حد ادبسه فيه
عشان الناس كلها بتجاوبه دلوقتى
:p

بسم الله


اسمك؟
بندقه طبعا
انت كل ده ماتعرفش ولا ايه



المشهور بيه وسط اصحابك؟
اصحابى بينادونى باسمى عادى
الا بقى لو حد نسى اسمى ويقعد يقول يا توتا يا بوكا
وحاجات غريبه جده
ساعتها بعرف انه نسى اسمى



سنك؟
24


مجال دراستك؟
طب بشرى
ربنا يصبرنى


اسم مدونتك؟
simply me



صورتك الرمزية فى المدونة بتعبر عن ايه؟
بتعبر عنى وانا هااااااااديه
وده مش بيحصل كتير ولو حصل مش بيكون حلو


هل فكرت فى اغلاق المدونة ؟ والسبب؟
اه .... مره فكرت اقفلها
بس قلت لا طبعا لانى بحبها وبتصبرنى على حاجات كتير
وكفايه ان ليا فيها اصحاب حلوين زيكم كده


ايه رد فعلك لو حد قل ادبه فى تعليق ؟
همسح التعليق
بس هرد عليه باحترام هو مايستهلوش


اسوأ مدونه؟
اى مدونه صاحبها اسلوبه مش محترم وكلماته بذيئه

هيحصل ايه للايميل بعد ماتموت؟
تقريبا كده ولا حاجه
يعنى هيفضل معلق كده
عشان ماحدش يعرف الباس وورد
وابقوا افتكرونى واقرولى الفاتحه


اديت الباسوورد لحد قبل كدة؟
اديته لاختى مره عشان تشوفلى حاجات


السفر بالنسبة لك ايه؟
انا بحب الطريق بس فى السفر
يعنى اروح واجى اتفرج على الطريق
بس ماحبش اقعد بعيد عن مكانى اللى اتعودت عليه
بحس بالغربه بسرعه


الموود بتاعك ايه ؟
بيختلف
يعنى لو فى الكليه بكون هاديه وساكته ولوحدى وفى حالى معظم الوقت
لو فى البيت ... زمان كنت دايما بضحك واعمل دوشه كده فى البيت
انما دلوقتى برضه ساكته
مش عارفه ايه الاكتآب المزمن ده

بس ساعات بقى بهييس خالص ويجيلى حاله من الرغى والكلام والضحك والتهريج
يعنى بتجنن خالص
وكل الناس بتحس بكده
من اول العيال معايا فى الكليه ولحد ماما الغلبانه اللى بتسهر معايا للصبح فى اليوم ده


بتعمل ايه فى وقت فراغك ؟
على النت دايما
فى وقت الفراغ وغيره
مقيم يعنى ومعايا اشتراك


الأكلة المفضلة ؟
امممممممم
طب ليه بقى ....... كده الناس هتفتكر انى دبدوبه
:)
انا بحب الحلويات جداااا
وبحب اللحوم كمان يعنى كائن متوحش!! ايوه.. خاف منى
وبحب السبانخ والقلقاس والباذنجان بكل انواعه
والمكرونه
هاااااااااا ..... تقدروا تقولوا بحب كل الاكل


الصفات التى اخذتها من والدك؟
بابا اخدت منه كرهه للقراءه
هههههههههههه
وكل مره ماما بتقولى يا بنتى اقرأى حاجه تنفعك اقولها لما بابا يقرأ الاول


الصفات التى اخذتها من والدتك ؟
ماما حبيبتى رغم كل الاختلاف بينا
بس انا بحس دايما بفكر زيها وبتصرف زيها
وهى تقولى انتى بتعملى كل حاجه صح
بس فاضل تبطلى عند معايا
:p


اكتر ست حاجات بتكرههم ؟
الغبااااااااااااااااااااااء
الظلم .. الخيانه .. الزحمه .. الاهمال .. انى اصلح اخطاء غيرى


اكتر ست حاجات بتحبهم ؟
الكمبيوتر بتاعى .. مدونتى
موبايلى

الرسم

النوم

خمسه بس ... اه ضحكت عليكم


شخصيتك نوعها ايه ؟
كانوا بيقولوا انى دمى خفيف
دلوقتى مش عارفين انا ايه بالظبط
متقلبه جدا


لماذا دخلت عالم التدوين من الاساس؟
بالصدفه البحته وتحت رغبه الجماهيير
اصل انا يوم ماجيبنا الكمبيوتر كنت بلعب عليه بس
ماما بقى قالتلى اعمليلك مدونه ... اعمليلك مدونه
لحد ماعملت المدونه وبعذبكم بيها


احلى جملة قيلت فى وصف مدونتك؟
مش عارفه هى حلوه ولا ايه
بس اتقالى : حاسس انها مدونه طفله صغيره
وبفرح اوى لما الناس بتقولى دمك خفيف .. بيفكرونى بالذى مضى وبطمن على نفسى


احلى بوست كتبته؟ ضع اللينك ثم اذكر لماذا؟
امممممممم
خليها عليكم دى
قولولى ايه حبتوه اكتر



افضل مدونة قرأتها؟
كل مدونه بضيفها لقايمة مدوناتى تبقى حلوه
وعجبتنى




افضل بوست قرأته؟
مادام كتبت تعليق على البوست يبقى عجبنى فكرته واسلوبه


الشغل بالنسبة لك ايه؟
رغم انى عارفه انه مش ارحم من اللى انا فيه دلوقتى
بس مستنياه
نفسى بقى اشتغل دكتوره بجد
وان كان على الشغل بشكل عام فانا اصلا مابحبش قعدة البيت يعنى بحب اشتغل


الانترنت بالنسبة لك ايه؟
عالم واسع اوى
ونفسى ادوس فيه اكتر
بس هيضيعنى



تمرر التاج ده لمين ؟

لمين؟؟ لمين؟؟؟

ثلوج .. عشان هى زعلانه اليومين دول
مخنوقه .. بحجز بعد يوميات عبده انزحه
ريهام العربى .. هدية تعارف :)
تدبيسه بقى عشان لسه مش جاوبته ..MǿиY
الباشمهندس احمد .. متهيئلى لسه مش جاوب عليه
همس الاحباب .. مش عارفه يقبله منى ولا لاء
اخف دم .. قبل مايروح لقاء الشعراء
دكتور ديد .. غلاسه بس مش اكتر
سفاح كرموز .. اللى كان عايز يعتزل
نيمو .. وحشانى جدا
حصان برى .. بقاله كتير غايب
لماضه .. عشان تخرج من الغرفه المرعبه شويه
نور الحياة .. لعل وعسى يرجع قريب

طبعا كل دى تدبيسه زى مانا اتدبست
:p

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)