02 July, 2008

البقاء لله

انتقل الى رحمه الله فلان الفلانى"مش هتفرق الاسم يعنى" ربنا يرحمنا جميعا



صلاة الجنازه بعد صلاة العصر فى الجامع تحت بيتنا
ربنا يصبر اهله
والحمد لله مافيش صويت ولا صراخ

على العشاء اتنصب الصوان وطبعا لا عزاء للسيدات
مش عارفه ليه يعنى هما مالهمش نفس ... ماعلينا

انا طبعا فى مشوار حياتى الذى لا ينتهى
راجعه بيتنا ولاقيت الصوان والقرآن والله يرحمه
ماعرفوش طبعا ولا عمرى سمعت عنه
بس برضه ربنا يرحم جميع المسلمين .. مش هتبقى دنيا واخره يعنى

كان لازم طبعا اعدى من تحت العربيات بما انهم اخدوا كل الشارع عشان الصوان

وانا فى حالى بعدى من جنبهم والمفروض يعنى ان ده موقف عظيم لا يحتمل التهريج
الاقيلك اللى داخل العزاء يسلم ويقول: البقيه فى حياتك ده بيكلم ابن الراجل تقريبا او اخوه وانا ايه اللى عرفنى
رد عليه :حياتك الباقيه

انا سمعت من هنا وكنت هافطس على روحى من الضحك
بقى كده يا راجل
ده برضه جاى يعزى وياخد بخاطرك

طبعا بتقولوا تخاريف نوم برضه
ابدا والله انا دلوقتى فى كامل قوايا المش نوميه
:)

طيب خليكم معايا كده
واحد ابوه مات
يجى التانى يقولوا البقيه فى حياتك
يعنى ايه؟؟؟؟؟؟؟؟
البقيه = عقبال ماتخلص من باقى العيله ...
فى حياتك = تفضل انت قاعد على تلها

قام يا عينى الولد زعل انت كمان جاى تدعى على مامى واخواتى
وماسكتش ..اداهملو ..
حياتك الباقيه = اعملها انت بس وخلصنا منك ومالكش دعوه بالباقى
يعنى مافضلش غير حياتك انت عشان تخلصنا

طب يعنى ينفع كده؟؟؟؟؟؟
اتنين قاعدين فى عزاء والراجل لسه مدفون
والجو كله صفاء وروحانيات
يقوموا يعملو فى بعض كده ده كان فاضل يقسموا التركه على بعض كمان

عشان كده انا ملا بروح اعزى بقول ايه؟
البقـــــــــــــــــاء لله
عشان ماحدش يستنانى
:)

بس كده
شفتوا بقى التفكير المنطقى العقلانى العالى اوى ده
حد فكر فى الحكايه دى قبل كده
اى فوكيره


ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)