10 June, 2008

يونيه يعنى 6

سلام عليكم

مش عارفه ليه انتو ماسكين فى البوست الكحلى
من حلاوته يعنى

انا برضه رفقا بيكم مش هنزله
عشان دمه تقيل وانا خايفه على المدونه للتعود على الكآبه ماعرفش افك منها

المهم بقى انى عشان اكتب بوست ويكون ملائم للاحداث الجاريه
قلت احكيلكم حكايه

بقى انا بقالى خمس سنين دراسه وقبلهم سنتين فى معتقل الثانويه العامه
كل شهر مايو يعدى عليا بكل وجع دماغ المذاكره
وهانت واستحملى يا بندقه وكله عشان مستقبلك
وكل اللى قدك خلصوا وانت لسه
وصاحبتك كتب كتابها بعد الامتحانات وانتى مستنيه النتيجه
عادى يعنى كل ده بيطلع فى الغسيل عادى جداااااااااااا

وكل مره اقول امتى يارب يعدى عليا شهر يونيه المزعج ده من غير امتحانات

وزى ماتكون ابواب السما كانت مفتوحه السنه اللى فاتت
واخيرا انا فى سنه خامسه اللى بيمتحنوا فيها بعد الهنا بسنه لما يكونوا اتاكدوا انهم خلاص قضوا على جميع قوانا العقليه
يعنى امتحانات فى شهر 9
ياه مش ممكن اول مره اشوف دعوه بتتحقق بسرعه كده
يا مانت كريم يارب
اخيرا هشوف اختى قاعده تذاكر وانا لا

والظاهر ان نيتى كانت مش ولا بد
اصل ماما دايما تدعيلى
ربنا يديكى على قد نيتك
وانا اقولها بلاش الدعوه دى مش مضمونه
اهى جت فيا

ومالحقتش اتهنى بدعوتى الصغيره
ومن حظنا الحلو ان امتحانات الترم بتاعتنا اتاجلت طول السنه قال ايه هنمتحن الدفعه كلها على بعض
لييييييييييييييييييييييييه
وطبعا لازم الدفعه تكون خلصت كله

وده امتى يا حلويين
صح ....... فى شهر 6 يعنى يونيه
يعنى دلوقتى
ياعينى عليااااااااااااااااااااااااااااا

لا وايه كمان
ماما كانت بتحكيلى على رمضان اللى بيجى فى الصيف
ونبقى مش قادريين وهنفطس
ورمضان بقى عز اغسطس

وانا اقول مش مهم هنكون ساعتها فى الاجازه ونقضيها نوم طول النهار
يطلع رمضان السنادى بقى فى عز الامتحانات بتاعتى



يعنى الناس كلها تنام وانا



يعنى البوست اللى مفروض يكون عادى اهو
برضه طلع كله مشاكل
وتقولولى انتى فين واخبارك ايه

هنا اهو
وده حالى

13 comments:

  1. لا حول ولا قوة الا بالله ...والله حاسة بيكي ...أولا عشان لسة مخلصة امتحانات امبارح وثانيا عشان عندي اتنين اصحابي في خامسة طب كل ما اشوف وشهم يقولولي هنبتدي امتحانات في شهر سبعة وطبعا ساعتها مش هقدر أقولهم وأقولك غير حاجة واحدة.....ربنا يديكوا على قد نيتكم............
    ههههه

    ReplyDelete
  2. هههههههههههههه
    كان الله في عونك ياجميلة وربنا يصبرك
    علي الحر والصيام والامتحانات
    بس ابقي وصي ماما بلاش الدعوة دي الا لما تتاكدي تماما من صفاء نيتك d:

    ReplyDelete
  3. صباح الخير يابندق
    كده الغنوة اشتغلت اول لما الصفحة اتحملت
    ..
    ربنا يهون عليكي الحر يارب
    مش هقدر اقلك اتحملي
    اصل الحاجات دي مش بتحصل من ضغطة زر
    ..
    يارب تعدي علي خير امتحاناتك
    وصبرا جميلا يابندق
    من اجل الورد ينسقي العليق
    ..
    ربنا يكرمك
    ..
    دودو

    ReplyDelete
  4. دواير:
    حتى انتى بتدعيلى كده
    لا الواحد ياخد باله من نيته بعد كده
    :)
    منوره
    ----------------------------
    انسانه:
    شكرا على الدعوات الحلوه دى
    ربنا يخليكى
    والله انتو اللى مصبرنى
    -------------------------------
    دودو:
    صباح النور يا دودو
    شكرا انا عملتها زى مانت قولتيلى

    صبرا صبرا هو انا ورايا ايه
    :)

    ReplyDelete
  5. صباح الخير يا بندقه
    والله حاسه بيكى يا بنتى
    انا برضه بنتى كانت فى طب زيك وشافت اللى انت فيه وامتحنت فى عز الصيف بس صدقينى يا بنتى كله بيعدى وربنا معاكى يا رب وعقبالك بنتى اتجوزت ومعاها كريم دلوقتى
    عارفه بتقول ايام الامتحان اهون دلوفتى الشغل وجوزها وبيتها وابنها كلهم عايزنها 10 على 10 فيهم وبرضه بدعيلها نصيحة ام عيشى حياتك لحظه بلحظه اللى بيفوت مابيتعوضش
    مع حبى ليكى ولبنتى

    ReplyDelete
  6. زعلتينى منك يا بندقه
    اللى انتى بتقوليه ده عن هندسه مش طب
    احنا اللى بمتحن فى رمضان المد ترم وما ادراكى ما هو اسبوع المد ترم
    وبعدها باسبوعين العملى وبعدها باسبوع الترم
    وهكذاااااااااااااا
    يعنى احمدى ربنا انك فى طب
    وربنا يوفقك يارب

    ReplyDelete
  7. يا عيني؟؟ تصدقي صعبتي عليا

    بس تعملي ايه بقى من طلب العلا سهر الليالي

    وبعدين كون انك تمتحني في رمضان دي حاجة جميلة.. يعني شهر جميل ومبارك زي ده أكيد ربنا هيكرمك فيه..

    هي المشكلة بس ان السنة دي مفيش مصايف.. وتلاقي نفسك مجبرة انك تذاكري ومفيش حد حواليكي بيذاكر زيك كدة؟؟؟ وممكن بنت الجيران تعمل حفلات رقص كل يوم للصبح.. ربنا يكون في عونك..هههههه

    روحي يا بندقة ربنا يديكي على قد نيتك.. ويصبرك على السنتين اللي فاضلين دول... وتبقي دكتورة قد نص الدنيا (مش الدنيا كلها بلاش طمع)

    تقبلي مروري يا أميرة النت

    ربنا يوفقك بجد

    ReplyDelete
  8. الحال من بعضه يا بندقة

    ربنا معانا

    انا اتخنقت اساسا بساسا من الكليه دي

    ReplyDelete
  9. هى دى حامسة اومال اية السنة اللى فاتت برضوة كنا كدا حر بقا وصيام ياخرابى
    والرغبة فى المشاهدة للمسلسلات ده غير الصلاة
    يعنى صباح الضياع وربنا يكون فى عونك يابنتى

    ReplyDelete
  10. خلاص يا دكتور هانت وهتتخرجى وهتشتغلى محاميه اد الدنيا ونفتحلك مكتب هندسى

    صبرا جميلا يا بندقه فاضل حته صغنونه وخلاص
    دى شكه دبوس وتتخرجى وتقولى ياريت الى جرى ماكان

    لما يجيلك نبطشيه يوم عيد ميلاد بنتك
    او نبتشيطه ليله عيد جوازك
    او ليله العيد
    او حالات الطوارىء الى مش بتنتهى واكننا فى بلد طوارىء

    احمدى ربنا يا بندقه وكلى عيش
    ونصيحه متتخرجيش
    وهتقولى ممكن قال

    دمك شربات

    تحياتى

    ReplyDelete
  11. السلام عليكم ورحمه الله وبركاته
    بجد شكرا على التفاؤل بتاعك الى واضح فى لون المدونة وبسم الله ما شاء الله شكلها رائع جداااااااااا كل دة علشان كنتى عايزة تفرجى على اختك يلا علشان تتفرجى عليها براحتك وربنا يعينك على الصيام والمذكرة

    ReplyDelete
  12. شكل النيه كان فيها حاجة هههههههههه

    ReplyDelete
  13. انتى مين انتى واخدة اسمى بندقة؟
    مين انتى؟
    :D

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)