28 June, 2008

عدنا بحمد الله


الحمد لله بعد نكسه 16\6
طلاب «خامسة طب عين شمس» يتجمهرون أمام مكتب وكيل الكلية ويطالبون بإلغاء امتحان «الباطنة»

ربنا كرمنا النهارده فى امتحان الاطفال
وعوضنا خي
ر
بس ماحدش ينق فيها بس عشان لسه فى امتحان تانى 1\7

طبعا كل اللى حصل فى الامتحان اللى فات
كان كفايه اوى انى اكتئب واتقوقع وماكتبش حاجه كل الفتره اللى فاتت دى

بس الحمد لله انا خلاص اتعلمت الدرس
وماينفعش مع الكليه دى غير التناحه
يعنى مهما يعملو تانى ولا هياثر فيا
بعد ماشفت الغلابه اللى فى ثانوى عام بينتحروا

انا برضه هطلع دكتوره غصب عنهم

ماما حتى قالتلى انا عايزاكى يابنتى
ومش مهم ولا تقدير ولا درجات
وادتنى كارت اخضر عشان العب وبلاهه مذاكره ووجع دماغ

احلى حاجه بقى فى الموضوع ده
ان انا اتشهرت
اصل انا طلعت فى الصوره اللى فوق دى
والنهارده بقى ماكنتش ملاحقه على الجمهور اللى عايز منى توقيع

بس بقى ادعولى

13 June, 2008

دماغ ايه دى

ياربى الساعه 1:30 وانا ايه اللى مصحينى
مش عارفه
انا كده بقالى 20 ساعه صاحيه
وده مش من عادتى يعنى
انا بحب النوم مووووووووووووت
يعنى انام 20 ساعه ماشى
اصحى لا

مش عارفه ليه انا صايحه كده
نفسى فى خبطه على دماغى عشان انااااااااااااااام
كل البيت نايم

لا وفى كمان شعور مزعج بالجوع

وبرضه مش عايزه اكل
دماغى رافضه الاكل
عامله رجييم قاسى حاد اجبارى غصب عنى
عايزه ااااااااااااااااااااااااكل
ودماغى مش راضيه
ماما تقولى اعملك سندوتش........لا
طب كلى فاكهه.................لا
ولا حتى كوبايه نسكافيه
:((
انا مش عايزه اخس
انا كده هختفى
انا "مفروض" بذاكر وعايزه طاقه
بس برضه مش باكل

اعمل ايه بس ياربى فى حياتى
اذا كنت مش هاكل ولا انام
امال اعيش اعمل ايه بس

يمكن عشان انا زهقت النهارده
هكون زهقت من ايه يعنى ... اى حاجه ممكن تكون عبيطه وتزهقنى

طيب خليكم معايا
لما تكون مستنى طول الاسبوع عشان تنزل محل تشترى حاجه
وطول الاسبوع بتمنى نفسك ان هتجيبها خلاص وتتبسط
ولما يجى اليوم ده
تروح تلاقى المحل قافل
هيكون شكلك ايه

طب بلاش
خليه مفتوح
ادخل بقى ودور وهى فين؟؟؟؟؟؟؟
كانت هنا
انا شايفها هناالاسبوع اللى فات وكنت مخبيها عشان ماحدش ياخدها
وفجأه
اهيه
هييييييييييييييييييييييييييييييييه

ايه ده مش دى
لااااااااااااااااااااااااااااااااااااااااااااا
مش هى دى..... دى بايخه
بتاعتى كانت احلى من كده

اناعايز بتاعتىىىىىىىىىىىىى
ماليش دعوه


وبعدين تعرف ان اللى راح مابيرجعش
وتضطر تستنى وتمنى نفسك بيه تانى بعد اسبوع جديد

وترجع بيتكم
وتبقى حالتك زيى كده
لا عارفه انام ولا اكل ولا اكتب

طبعا انا مش كنت عايزه اشترى حاجه ده مثال توضيحى
يارب ماكونش توهتكم زياده بيه

انا بتكلم عن المسلسل الغلس الجميل اللى انا بحبه
وهما بيهرجوا ويعملو حلقات تشل
صبرنى يارب

10 June, 2008

يونيه يعنى 6

سلام عليكم

مش عارفه ليه انتو ماسكين فى البوست الكحلى
من حلاوته يعنى

انا برضه رفقا بيكم مش هنزله
عشان دمه تقيل وانا خايفه على المدونه للتعود على الكآبه ماعرفش افك منها

المهم بقى انى عشان اكتب بوست ويكون ملائم للاحداث الجاريه
قلت احكيلكم حكايه

بقى انا بقالى خمس سنين دراسه وقبلهم سنتين فى معتقل الثانويه العامه
كل شهر مايو يعدى عليا بكل وجع دماغ المذاكره
وهانت واستحملى يا بندقه وكله عشان مستقبلك
وكل اللى قدك خلصوا وانت لسه
وصاحبتك كتب كتابها بعد الامتحانات وانتى مستنيه النتيجه
عادى يعنى كل ده بيطلع فى الغسيل عادى جداااااااااااا

وكل مره اقول امتى يارب يعدى عليا شهر يونيه المزعج ده من غير امتحانات

وزى ماتكون ابواب السما كانت مفتوحه السنه اللى فاتت
واخيرا انا فى سنه خامسه اللى بيمتحنوا فيها بعد الهنا بسنه لما يكونوا اتاكدوا انهم خلاص قضوا على جميع قوانا العقليه
يعنى امتحانات فى شهر 9
ياه مش ممكن اول مره اشوف دعوه بتتحقق بسرعه كده
يا مانت كريم يارب
اخيرا هشوف اختى قاعده تذاكر وانا لا

والظاهر ان نيتى كانت مش ولا بد
اصل ماما دايما تدعيلى
ربنا يديكى على قد نيتك
وانا اقولها بلاش الدعوه دى مش مضمونه
اهى جت فيا

ومالحقتش اتهنى بدعوتى الصغيره
ومن حظنا الحلو ان امتحانات الترم بتاعتنا اتاجلت طول السنه قال ايه هنمتحن الدفعه كلها على بعض
لييييييييييييييييييييييييه
وطبعا لازم الدفعه تكون خلصت كله

وده امتى يا حلويين
صح ....... فى شهر 6 يعنى يونيه
يعنى دلوقتى
ياعينى عليااااااااااااااااااااااااااااا

لا وايه كمان
ماما كانت بتحكيلى على رمضان اللى بيجى فى الصيف
ونبقى مش قادريين وهنفطس
ورمضان بقى عز اغسطس

وانا اقول مش مهم هنكون ساعتها فى الاجازه ونقضيها نوم طول النهار
يطلع رمضان السنادى بقى فى عز الامتحانات بتاعتى



يعنى الناس كلها تنام وانا



يعنى البوست اللى مفروض يكون عادى اهو
برضه طلع كله مشاكل
وتقولولى انتى فين واخبارك ايه

هنا اهو
وده حالى

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)