29 May, 2008

ازعاج للسلطات

سلام عليكم
بصو بقى بعد ماكنت خلاص بحضر من امبارح لبوست عشان اكتبه النهارده
بس ربنا رحمكم منه الحمد لله
اصله كان بوست كحلييييييييييى
اقولكم من الاول

انا امبارح كنت نايمه فى امان الله من الساعه 9 زى الكتاكيت
صحيت فجأه على صوت عالى ايه اللى بيحصل ده

الجيران ربنا يهدهم عندهم بنت تقريبا فى ابتدائيه وطبعا الهانم خلصت
قال يعنى كان عندها امتحان اوى
الانسه المبجله مزاجها بقى تيجى باليل الساعه 11 وتشغل الدى جى على اخره
وهاتك يا رزع وخبط وكمان بتغنى معاه

يعنى ينفع كده يابشر الساعه 11 والناس نايمه وعندنا امتحان بكره
ومافيش اى مناسبه عشان تعلى الصوت كده
فلما بقى اصحى من نومى على صوت عالى
ماقلكوش ايه اللى ممكن يحصل
اصل الحيطه فى الحيطه وكنت حاسه ان الموسيقى بتنززززززززز من السقف
انا قمت من سكاات ولبست وكنت
about to give them some of my mind

بس ربنا رحمهم منى وسبحان الله قفلوه
عارفين قفلوه ليه
؟؟؟؟؟؟؟؟؟
اصل الواد ابن الجيران اللى هو بتاع 5 سنين اتخانق مع اخته عشان عايز يتفرج على فيلم على الكمبيوتر

كل ده انا سمعاه من بيتى والله
صوتهم يجيب اخر الشارع
ربنا يتوب عليا يارب

بس انا بقى ماعرفتش انام بعدها
وقعد دماغى يلف ويروح ويجى وجيبت قلم وورقه وقعدت اكتب كلااااااااااااااااام
من بتاع الوش التانى اللى انتو ماتعرفهوش
ده انا كنت ناويه اقلب المدونه اسود
تصوروا بقى كان شكلى ايه ساعتها


ايه اللى حصل بقى عشان اغير رائى واكتب البوست الحدوته ده
هبقى اقولكم بعدين

خلينا فى الموضوع ده بقى
يعنى انا مش عارفه واحده معليه الصوت كده ليه
ووالدتها سايباها ليه يعنى ماتعرفش ان كده عيب وقله زوق وبالذات اننا باليل
طيب لما والدتها ماتقولهاش يعنى مش واخده بالها ولا مش سامعه ولا ماتعرفش ان ده مش صح
طيب والبنت لما تكبر ويبقى عندها عيال هتعمل معاهم ايه
اظن هتسيبهم يلفو على الجيران ويصحهوم واحد واحد

بكره بقى ننزل البوست اياه
الحكلى

13 comments:

  1. صباح الخير يابندق
    يارب يوفقك في الامتحانات
    ونسمع احلي اخبار قريب بإذن الرحمن
    ..
    :)))))
    تصدقي انتي ضحكتيني والله
    اقلك انا ليه بس من فضلك من غير ضرب
    اصل انا من احم زي البنت الي متغاظة منها بحب اعلي الكمبيوتر واسمع
    مع ان اخواتي بيمتحنوا
    بس كويس انك نبهتيني عشان البس الهيدفون واسمع وحدي
    :)))
    مفروض البوست ده يبقي بعنوان الكلام ليكي يادودو
    حاضر خلاص حرمت اعلي الصوت
    ..
    ربنا يحفظك يابندق

    ReplyDelete
  2. ازيك يا بندقة
    يعني انتي سايبة مذكرتك والامتحانات وقاعدة تكتبي بوستات كمان؟؟ههههههههههه
    وبعدبن فيها ايه لما البنت نجحت وحبت تعمل حفلة في البيت؟؟ مش حرية شخصية برضة؟؟ والبنت من حقها تفرح؟؟ عقبال كدة ما تفرحي انتي كمان وتشغلي الدي جي على الاخر؟؟

    ربنا يوفقك بجد
    وركزي في مذاكرتك وسيبك من العيال، بلاش تلاكيك؟ههههههههه

    ReplyDelete
  3. يااااااااااااااه ده بيحصل كتير عندى عادى خالص خالص خالص يعنى
    دى جى وصوت عالى وخناقات ملهومش دعوة بالناس التانية
    اه على فكرة انا استعارت الصورة بتاعتك وانتى صغيرة عجبتنى
    عملت صورة اللى بتضهر جنب اسمى
    لو مش موافقه اشيلها
    تحياتى وبالتوفيق

    ReplyDelete
  4. دودو:
    حتى انت يا دودو
    يبقى انتى اللى سلطيها عليا
    لا يابنتى استنى لما اخواتك يخلصو امتحانات وعيشي حياتك براحتك

    --------------------------------
    فى حب مصر:
    يعنى لا كده عاجب ولا كده عاجب
    اه يانى منكم

    فرحانه ايه ؟؟؟؟ هو كل يوم حفله
    يعنى هى تنجح وتفرح وانا ماعرفش انام
    ماتفرح الصبح
    حاجه غريبه

    ------------------------------
    wanna b a physician:
    اهلا بيك يا زميل الشقاء
    هما اصلا لابيهم امتحانات ولا اى حاجه
    مع نفسهم على طول
    وحتى لو حد نبههم بيعملو مش واخدين بالهم

    مبروك عليك الصوره
    اكيد مش هعترض
    شكرا على مرورك وياريت ماتكونش اخر مره

    ReplyDelete
  5. اولا وقبل اى كلام شكرالتشريفك مدونتى المتواضعة وتعليقك الجميل .
    وبخصوص اثارتك لموضوع الازعاج الموضوع ده عادى منتشر جدا تلاقى بعض الجيران يعلوا صوت الدى جى او اولادهم بيعملوا دوشة واللى يغيظ اوى بقى ان مفيش حد من اهلهم بيقولهم حاجة لما الواحد هيبقى هيتجننيلا هنعمل ايه.
    بالتوفيق
    احمد

    ReplyDelete
  6. حراء:
    اهلا بيك يا احمد
    ومنور مدونتى


    هنقول ايه بقى ربنا يهديهم وينامو بدرى او النور يقطع

    ReplyDelete
  7. ازيك يا بندقة
    ------------
    ما هذا الازعاج
    بس اي مشكلة ابقي صفرليلي
    ههههههههههههههههههههههههههه
    ههههههههههههههههههههههههههههه
    ههههههههههههههههههههههههههههههه
    بس كفاية كده عشان ضحكتي بقيت عالية اوي و الجيران حيرفعوا عليا قضية ازعاج الجار
    بايييييي

    ReplyDelete
  8. ربنا يوفقك في الامتحانات

    ReplyDelete
  9. ازيك يا بندقة
    اخبارك ايه
    متشكر على السؤال، ونزولا منا عند رغبات سموك نزلت بوست جديد ابقي تعالي شوفيه بس انتي كمان لازم تنزلي البوست اللي قولتي انك هتكتبيه بكرة وعدى يجي شهر على بكرة ده..ههههه
    وطمنيني كمان على اخبار الامتحانات معاكي
    تقبلي مروري

    ReplyDelete
  10. فين البوست الكحلي

    اصل عندي بوست ابيض عاوزه عشان يليق عليه

    ههههههههه

    يا بنتي بسيطه قطنتين في ودانك الموضوع يخلص وكله تمام

    هههههههههههه

    ReplyDelete
  11. عروس البحر:
    يا سلام بس كده اخيرا الواحد لقى حد يقف جنبه فى اى خناقه
    استنى عليا بقى اخلص امتحانات وفى عز امتحاناتهم واشغل الدى جى على الاخر
    واناديلك

    لالالالالالالا
    جيران ايه دول اى حاجه برضه نادينى
    مانا مش عارفه انام كده كده

    ربنا يخليكى يا حبيبتى
    ------------------------------
    فى حب مصر:
    اخيرا البوست الجديد نزل
    حمد الله على السلامه
    ان شاء الله البوست نازل
    قول يا رب
    ان الله مع الصابرين

    ان شا الله الامتحان يوم الاتنين الجاى
    ادعيلى بقى

    ------------------------------
    dead-man:
    على ماافتكرت يا استاذ
    ده البوست قرب يخلل
    وبعدين انت عايز بوست كحلى ليه
    احنا ناقصين ماكفايه اللى احنا فيه

    حراااااااااااااااام
    رفقا بالقراء

    ReplyDelete
  12. يارب يابندق تخلصي امتحانات بخير
    ..
    انا دخلت بس اقلك ان الغنوة بتشتغل لما تعمليلها بلاي مش تلقائي يعني
    بس الغنوة جميلة اوي
    ..
    لو عاوزاها تشتغل تلقائي اول لما تفتحي الصفحة الي فيها الاغنية في موقع اي ميم
    عند الكود بتاع الغنوة هتلاقي تحتيه اختيار اسمه
    Auto play
    نشطيه وبعدين انسخي الكود والصقيه عندك مكان الاولاني
    وكده هتشتغل وحدها
    ..
    سلام يابندق

    ReplyDelete
  13. هههههههههههه
    بقي انا مبجيش غير لما تيجي عندي:)
    طيب انا جاي النهارده لوحدي اهو يا باشا

    واللهي يابنتي مكسل تدوينيا مش اكثر
    :) بحس عندك اني داخل مدونه طفله
    عارف الكلمه مش هتزعلك بل بالعكس
    ياريتنا كلنا نرجع كده:)

    المهم شد في الامتحانات ياجميل
    هاااانت

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)