29 May, 2008

ازعاج للسلطات

سلام عليكم
بصو بقى بعد ماكنت خلاص بحضر من امبارح لبوست عشان اكتبه النهارده
بس ربنا رحمكم منه الحمد لله
اصله كان بوست كحلييييييييييى
اقولكم من الاول

انا امبارح كنت نايمه فى امان الله من الساعه 9 زى الكتاكيت
صحيت فجأه على صوت عالى ايه اللى بيحصل ده

الجيران ربنا يهدهم عندهم بنت تقريبا فى ابتدائيه وطبعا الهانم خلصت
قال يعنى كان عندها امتحان اوى
الانسه المبجله مزاجها بقى تيجى باليل الساعه 11 وتشغل الدى جى على اخره
وهاتك يا رزع وخبط وكمان بتغنى معاه

يعنى ينفع كده يابشر الساعه 11 والناس نايمه وعندنا امتحان بكره
ومافيش اى مناسبه عشان تعلى الصوت كده
فلما بقى اصحى من نومى على صوت عالى
ماقلكوش ايه اللى ممكن يحصل
اصل الحيطه فى الحيطه وكنت حاسه ان الموسيقى بتنززززززززز من السقف
انا قمت من سكاات ولبست وكنت
about to give them some of my mind

بس ربنا رحمهم منى وسبحان الله قفلوه
عارفين قفلوه ليه
؟؟؟؟؟؟؟؟؟
اصل الواد ابن الجيران اللى هو بتاع 5 سنين اتخانق مع اخته عشان عايز يتفرج على فيلم على الكمبيوتر

كل ده انا سمعاه من بيتى والله
صوتهم يجيب اخر الشارع
ربنا يتوب عليا يارب

بس انا بقى ماعرفتش انام بعدها
وقعد دماغى يلف ويروح ويجى وجيبت قلم وورقه وقعدت اكتب كلااااااااااااااااام
من بتاع الوش التانى اللى انتو ماتعرفهوش
ده انا كنت ناويه اقلب المدونه اسود
تصوروا بقى كان شكلى ايه ساعتها


ايه اللى حصل بقى عشان اغير رائى واكتب البوست الحدوته ده
هبقى اقولكم بعدين

خلينا فى الموضوع ده بقى
يعنى انا مش عارفه واحده معليه الصوت كده ليه
ووالدتها سايباها ليه يعنى ماتعرفش ان كده عيب وقله زوق وبالذات اننا باليل
طيب لما والدتها ماتقولهاش يعنى مش واخده بالها ولا مش سامعه ولا ماتعرفش ان ده مش صح
طيب والبنت لما تكبر ويبقى عندها عيال هتعمل معاهم ايه
اظن هتسيبهم يلفو على الجيران ويصحهوم واحد واحد

بكره بقى ننزل البوست اياه
الحكلى

04 May, 2008

تاج تو



سلام عليكم
انا جيت تانى
ومعايا تاج تانى
ايوه واحده مريشه ومعاها تاجات كتير


التاج ده بقى من مدونه اهو اى كلام
عن العزوبيه
يلا بينا

ما رأيك فى الجملة التى تقول ...العزوبية تاج على رؤوس العزاب لا يراه الا المتزوجين؟

اه ساعات فعلا بيكون كده وساعات برضه بيحسد العزاب المتزوجين
وده بيحصل مع البنات اكتر كمان
عشان طول ماهى لسه بنوته غلبانه وقاعده فى البيت وكل الناس بتتامر عليها اخوها وابن عمها و....
بس بقى لما تتزوج هو واحد بس اللى هيكلمها وهى هتعرف تسكته
:D


ما هى العوائق من وجهة نظرك التى تحول بين الشباب والزواج هذه الايام ؟

يعنى واحد مش عارف يشتغل ويصرف على نفسه هيتجوز ازاى
هى حاله البلد الاقصاديه والبطاله وارتفاعه الاسعار اللى فى كل مكان ده مش هيدى للشاب فرصه اصلا انه يفكر فى الزواج
بجد يعنى ربنا يكون فى عون الشباب لانهم مهما كان عليهم عبئ كبير
ده كفايه حتى شكله وهو راجل ولسه بياخد مصروفه من والده شكله قدام نفسه حتى
انما انا بقى هاخد مصروف من ماما وبابا وعمو وخالو
ولا يهمنى انا بنوته



من وجهة نظرك هل النكد موجود فى العزوبيه ام فى الزواج ؟ ولماذا ؟

النكد
يا سلام على النكد
هوانت مش عايش فى مصر ولا ايه
ده لولا بس ان المصريين بيحبوا الضحك كان زمان حالتنا وحشه اوى
بس يعنى عشان الناس تعبانه بيبقوا مضدايقين وزهقانين

بس انا لا بحب النكد قبل الاكل ولا بعده


ما الحل من وجهة نظرك لمشكلة (( العزوبية )) فى مصر ؟؟

الحل ان الحكومه توزع شقق على بطاقه التموين
ويشغلو الشباب الغلبان ده
والاهالى بقى تساعد ولادها وامرهم لله
والناس اللى تتجوز تعمل حسابها على اليوم ده وتراعى مصلحه عيالها وتربيهم كويس وماتجيبش عيال كتير


من وجهة نظرك ....هل للعزوبية مميزات وعيوب ؟

احلىى حاجه فى العزوبيه انك حر
لا شايل مسؤوليه حد ولا حاجه
يعنى جعانه وماليش مزاج اعمل اكل
مش هاكل
مش مشكله ماوراييش عيال بقى بتعيط ولازم اكلهم
عايزه انام هنام
عايزه اخرج هخرج -بس هاقول لماما طبعا :)
عايزه اتفرج على الفيلم مش هلاقى واحد يقولى لا هاتى الماتش

ما هو رأيك فى انشاء مدونة (( رابطة )) للعزاب من المدونين ؟؟؟

لا انا مش بحب فكره المدونه المتخصصه دى
دمها تقيل على قلبى
بحب المدونه تعبر عن صاحبها
يكتب زى مايحب
وفى فعلا مدونات بتكتب عن حكايات الجواز والخطوبه وكده
كلها اعاده وخيال


أخيرا ....لمن تمرر هذا التاج ؟؟؟

لكل اللى يحبه
التاج ده
FREE OF CHARGE


تاج ون

التاج ده من المصرى الغلبان
هو ادانى فرصه 3 سنين عشان اجاوبه وتمت بحمد الله فى اقرب فرصه
مبسوط يا مصرى
:)
الحمد لله
نبدا



أذكر 10 أشياء عن نفسك

يا سلام عليك يا مصرى
انت جيت على اكتر حاجه عامله مشاكل فى حياتى
انا مش بعرف اتلكم عن نفسى
ودى اكتر حاجه بتزعل ماما منى
بتقولى مش فاهماكى

ماعلينا نحاول
وابقى اقول لماماتيجى تقرا البوست
على بركه الله


10 اشياء عن نفسى ؟؟؟ امممم

1- بحب الضحك والهزار دمى خفيف بشهادة الاهل والاقارب


2- كمان بحب الالتزام فى العمل والاتقان
ماينفعش اعمل حاجه من غير ماكملها للاخر ولازم تتعمل صح حتى لو كانت صعبه
لانى بحب كل حاجه تكون صح
شعارى دايما : دعونا نعمل فى صمت
وبعد كده نهرج ماشى .. بس الجد جد


3- بحب مساعدة الناس والحمد لله مش بنتظر من حد حاجه ولا حتى شكرا
عشان هو كمان ماينتظرش انى لازم وحتما وضرورى انه هعمله اللى هو عايزه فى الوقت اللى هو عايزه
لا
كله بمزاجى انا
والحمد لله برضه مش عايزه من حد حاجه
ومش هزعل لو حد قالى لا
حقه

4- بحب دايما احافظ على مظهرى يكون محترم وشيك
مش عشان الناس لبست جينز درتى يبقى هالبس زيهم
مش عشان البنات دلوقتى كل لبسهم شويه قماش مقطع وملزق فى بعضه يبقى دى الموضه


5- يبقولو عليا عنديه جدااااااااااااا
يمكن اه
بس يعنى مين غيرى هيعرف انا عايزه ايه


6- حاجه مش لذيذه بقى انى مش بعرف اقول كلام مزوق
يعنى اللى فى قلبى على لسانى على طول
مابحبش اشوف حاجه غلط واسكت عليها فى حاله لو هتمسنى انا
مش عارفه ليه الناس غاويه ينضحك عليها بمزاجها
منعيش الواقع شويه


7- بكره الكدب والنفاق والمجامله
كلهم عندى مرادف واحد
بكره الكسل وانعدام الضمير والفهلوه اللى مصر عايمه فيهم


8- بحب اعيش كل يوم بيومه
مش بعرف افكر لمستقبلى جامد

9- مابحبش المفاجات خالص... ولا بحب التغير
بحب ارتب لكل حاجه فى عقلى الاول وبعدين اعملها
ماينفعش امشى فى موضوع قبل ماعرف هيخلص ازاى


10- هيييييييييييييييييه اخيرا وصلت للاخر
بحب العب رياضه رغم انى عمرى ما لعبت حتى بلى
بحب اكل حلويات لو حتى طول النهار
بحب الانجليزى جدا
بحب النجاح ونفسى اكون دكتوره شاطره وربنا يوفقنى
بحب اصحابى رغم انهم مايستهلوش
بكره اى انسان مغرور او متعالى
وبكره الغباء اوى

ماما بتقول ان الناس لو حبت بعضها كل حاجه هتبقى كويسه
انا بقولها لا
لو كل واحد عمل اللى عليه بغض النظر عن انت بتخدم حبيبك ولا عدوك الدنيا هتمشى صح
مش لازم نحب بعض عشان نقوم بواجبنا تجاه الاخرين

الظاهر رقم 10 فتح معايا جامد
حظكم بقى انا ماكنتش عارفه اكتب ايه فى الاول


اختر 5 أشخاص تهدى لهم التاج

paraniod,magnetic and dramatic girl
رغايين سبوت :honda
انسانه
dr.dead اهو اى كلام :
سكاى


لا تهدى التاج لمن أهداك اياه
اكيد يعنى .. بس افرض حب يغير رايه ويكتب كلام جديد؟؟


أترك لصديقك الذى أهداك التاج بان التاج نزل وتعالى شوفه
حااااااااااااضر


حلو الكلام ؟
لسه فى تاج كمان جاى فى السكه
ان شاء الله

ايه ده

السلام عليكم يا مدونين يا حلوين

بصراحه يعنى انا مش عارفه انتو ازاى صابرين على االمدونه دى

انا كل يوم ادخل اشوف
مالقيش ولا بوست جديد ولا صوره جديده ولااى حاجه
هى المدونه دى مالهاش صاحب يسال عليها ولا ايه


بجد يعنى كتر خيركم انكم لسه فاكرينها


بجد
مش عارفه ليه مش كتب فى مدونتى حبيبتى
رغم انى عندى فى دماغى حاجات كتير عايزه اقولها
وكمان كتير بزهق وابقى عايزه افضفض فيها
بس ساعه الزهق
حالتى لا تسمح
وكمان عندى تاجات اصحابها هيموتونى قريب
ايه رايكم نبدا بالتاجات عشان ماحدش يبقى ليه حاجه عندنا



ان شاء الله البوست الجاى
هههههههههههههههه
كنتوا فاكرين انى هعملمه بسرعه كده ولاايه

بس سيبكو بقى من التهريج وقولولى
هو احنا عاملين المدونه ليه
عشان نكتب فيها كل اللى نحس بيه

امال انا ليه مش عارفه اكتب
كل مالاقى حاجه مزهقانى بلاقينى ببعد عن كل الناس وكل حاجه وبحب اقعد لوحدى
وكمان بحس انى مش لازم ازهق الناس بزهقى
يعنى لو لاحظتوا كده
هتلاقو كل امواضيع فى المدونه تهريج

اكيد يعنى انا مش عايشه فى حياه ورديه مختلفه عن كل الناس
بس يمكن مش بعرف اعبر عن زهقى

وخصوصا انى لما بزعل مع حد لا بعاتبه ولا بقول له
ولا حتى بسامحه
مجرد انى ببعد عنه شويه لحد ماانسى
هو كده صح ولا لا ......... مش عارفه

فى ناس بتحس ان كده غرور منى
بس انا مش كده

يلا بقى بعد كده كل المدونه نكد فى نكد
عاااااااااااااااااااااااااا

مش بحب النكد
ماتخافوش
اصلا انا مش بعرف ابقى كئيبه
ولا بعرف اتكلم عن الزعل والحزن والحاجات السودا دى

انا مهما حد زعل منى او زعلته برضه بصالحه بضحك وتهريج
امال يعنى فاكرينى هتحايل عليه؟؟؟؟؟؟

يلا باى
كفايه كده

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)