08 March, 2008

احساس غريب

ايه اصعب احساس ممكن تشعر بيه
احساس يتعبك ويزهقك ويغير مودك

احساس مش عارف تخلص منه
غصب عنك تلاقيه بتسلل الي داخلك
ويتملكك

وللاسف مش عارف تخلص منه
لانك مش السبب فيه
ولا حتى عارف هو سببه ايه

بيبقى مزعج اوى لما تعيش معاه فتره طويله
وحتى لو كانت الفتره دى مجرد دقايق فى حلم باليل
بس بتصحى تحس ان فى حاجه غلط


ده احساس
الخوف

مزعج .. مش كده؟
لما تكون خايف ومش عارف انك خايف من ايه
مش عارف تعمل ايه
مش عارف انت بتواجه ايه
الخوف من المجهول


انا مش بخاف من الظلام
رغم انه بيمثل المجهول

بس فى احلامى دايما فى حاجه مجهوله
بخاف منها

مش مرعبه
ومش بعيده
ومش صعبه
ممكن تكون حاجه بسيطه جدا

ورقه طايره
واحد بيعدى
عربيه ماشيه

حاجه عاديه جدا
وحتى مش بكون لوحدى فى حلمى

لكن
الاحساس ده بيتعبنى اوى
احساس بعدم الامان
واكتر حاجه بتتعبنى انى مش عارفه اعمل ايه




***********
بس كده
احساس حبيت اسجله
يمكن اقدر اتغلب عليه فى يوم من الايام

9 comments:

  1. الدكتورة بندقة

    الدكتورة بندقة
    بالنسبة لكلمة تسالي اللي ذكرتها في تعليقي على البوست اللي فات أرجو انها ما تكونش اتفهمت غلط انا بس بهرج واضحك معاكي وبقصد ان البندق واللب والسوداني كلها حاجات تسالي لكن انتي كشخصية انا بحترمك إلى أبعد الحدود ومعجب جدا بتعليقاتك وأفكارك سواء عندي أو في مدونتك الجميلة

    بالنسبة بقى لموضوع البوست ده فأنا عايز أقول ان الاحساس بالخوف مش عندك لوحدك لا ده عند المصريين كلهم، وللأسف عند المصريين بس!!
    أنا هنا في الإمارات بتعامل مع جنسيات كتير قوي بس ما لمستش الاحساس بالخوف والقلق من المستقبل غير عند المصريين، تلاقي الجنسيات التانية بتحاول تعيش حياتها وما بتهتمش توفر او ما توفرش أما المصريين فتلاقيهم دايما خايفين من بكره. وده ليه تفسير انهم مش عارفين ايه اللي ممكن يحصل، مش عارفين البلد كلها رايحة فين!!
    الاحساس بالخوف طبيعي في وضع زي اللي احنا عايشينة، ومش هاقدر انصحك وأقولك اطردي الاحساس ده من جواكي، لأني أنا نفسي مش قادر اطرده من عندي. بس لحد امتى هنفضل كدة مش عارف!!!
    أسوأ حاجة في احساس الخوف انه بيخليكي مش عارفة تعيشي اللحظة اللي انتي فيها، ولا حتى بكرة اللي انتي خايفة منه!!



    مصري غلبان

    ReplyDelete
  2. يا ابنى نصحتك لما صوتى اتنبح ماتخفش من جنى ولا من شبح

    وان هب فيك عفريت قتيل اساله مدفعش عن نفسه ليه يوم ما اندبح

    ReplyDelete
  3. الثقة بالله
    أمر عظيم غفلنا عنه كثيراً،
    فما أحوجنا اليوم إلى هذه الثقة لنعيد بها توازن الحياة المنهار

    ولكن ماهي الثقة بالله؟؟؟

    الثقة بالله
    تجدهيا في إبراهيم عندما أُلقي في النار
    فقال بعزة الواثق بالله:
    حسبنا الله ونعم الوكيل

    فجاء الأمر الإلهي:
    يانار كوني برداً وسلاماً على إبراهيم

    عزيزتى انتى مثلى مثلنا جميعا
    نفتقر بعض الشىء للثقه فى الله
    فمدى حبال الثقه القويه بينك وبين ربك
    لن يعرف الخوف ابدا طريقه اليكى

    من يخشى الله لا يخشى غيره

    تحياتى

    ReplyDelete
  4. احساس غريب

    الفراق

    الخوف م بكره

    يعنى ف كتير احاسيس غريبه تقتل

    تحياتى

    وربنا معاكى يابندقه وتتفوقى ع الاحساس ده وتقهريه

    ReplyDelete
  5. فى حب مصر:
    انا عارفه طبعا قصدك ومش زعلت خالص
    وفعلا انا مبسوطه ان مدونتى بتسليك
    وانك بتزورنى دايما

    يمكن فعلا كلامك صحيح اننا بنخاف لان مافيش اسقرار فى اى حاجه حوالينا
    ودى بقى فايده الناس اللى بتسافر بره
    بتعرف حاجات اكتررررررر
    "وش عينيه مدوره"
    هههههههه
    --------------------------------
    سمسم:
    مهو انا لو شفت الشبح كنت سالته
    استنى كده لما انام يمكن يجيى فى معاده المره الجايه
    ----------------------------
    ممكن:
    فعلا يا ممكن عندك حق
    "الابذكر الله تطمئن القلوب "
    وانا الحمد لله مش خايفه اوى للدرجه دى
    بس الخوف ده بحسه اكتر فى احلامى

    وربنا يطمن قلوبنا جميعا
    ------------------------------
    د.اجدع بنوته:
    منوره المدونه
    شفتى بقى انا غلبانه ازاى
    :(
    شكرا يا جميله على تعليقك

    ReplyDelete
  6. صباح الفراولة يابندقة
    ..
    موضوع شيق جدا والله يابندقة ودايما في بالنا كلنا :الخوف
    بصي انا هتكلم باستفاظة عشان الموضوع استهواني اوي
    يارب متضايقيش مني اصلي هاخد راحتي
    لو هتضايقي من الي هكتبه اقري سطرين وبس
    شكرا ياجميل
    .....
    انا عندي مليون حاجة بخاف منها، حاجات علنية وحاجات مستترة بس عارفة ايه اكتر حاجة بخاف منها
    اكتر حاجة بخاف منها هي نفسي
    وبخاف من العنكبوت وبخاف من المجهول وبخاف من تجمع النمل وبخاف من تجمع الشباب
    بس الاكتر من كل ده اني بلاقي نفسي خايفة فجأة ومش عارفة من ايه
    زمان كان في حاجة في حلمي دايما تجيني طيف يعدي ويرعبني بس لغاية اللحظة دي مش عارفة ايه الحاجة الي خوفتني زمان
    ..
    بخاف من الجن لانه شايفناواحنا لأ.. كتير اتخيل وانا بغير ولا حاجة انه شايفني ابقي مكسوفة اوي ومضايقة منه لانه شايفني
    ويبقي نفسي اصرخ واقله ابعد
    بخاف من الجن لما بحلم بيه ولاني مرة صورت صور طلع فيها جان مش جن واحد
    ومن يومها ورعبي بقي فوق الحد من الجن ومن التصوير
    ..
    بخاف من الكاميرا جدااااااااااا
    كتير بحس ان في اوضتي في كاميرات مراقبة وافضل من الخوف الغير مبرر اغطي كل حاجة خايفة ان يكون جواها كاميرا
    بخاف دايما حد يصورني من غير مااخد بالي بس خوفي ده عدي الحد لانه بقي رعب
    عارفة في قبائل افريقية بتخاف من الكاميرا لاعتقادهم انها بتخطف الروح انا خوفي تقريبا بقي في مستواهم
    خوف غبي صح؟بس غصب عني
    ..
    دايما يجيني احساس بخوف شديد وابقي عاوزة استخبي جوه حد ومش بكون عارفة سر الخوف ده وابقي حاسة ان حاجة هتحصل
    وكتير يصدقث احساسي وتحصل حاجة فعلا
    ..
    عارفة انا بخاف من الموت بس مرات ببتغيه.. بحبه وبكرهه
    بخافه وساعات احس اني عاوزاه يجي ليا او لغيري
    رغم ان لو اي حد مات حتي لو من غير ديني برتعب اوي وبيكون نفسي ربنا يرحمه حتي لو كان كافر
    وفي نفسي الوقت تلاقيني اعشق مواضيع الدفن والتغسيل وفي نفس الوقت بموت من الرعب
    ..
    انا عندي فوبيا من حاجات كتير واولها الخوف من المرتفعات
    بس مهما كنت خايفة فخوفي له مبرر
    الا في الخوف من المجهول ده اصعب خوف لان مش بكون عارفة سببه عشان كده هو مخيف اوي
    والانسان عدو ما يجهل
    واي حاجة مجهولة تبقي غريبة وهتبقي بالتالي مخيفة
    اسفة طولت بس انا بحب افضفض في المدونات
    موضوعك شيق جدا والله
    انا بحب المواضيع دي
    تكرمي يارب
    الله حافظ
    دودو

    ReplyDelete
  7. أنت
    يا سارقة ياء النداء من حروفي
    لماذا أنتِ مرتبك ؟
    نعم أعنيك أنت
    ادعوك للإنضمام للفكرة
    فانتِ وحدك .. تلك التي لم تأت
    هذا طريق لم يكن يعرفه احد
    و لا يعرف احد
    طريق لم تعرفه اقدام المارة
    و لم تدنسه من قبل عجلات سيارة فارهة وقودها من عرقك و دمي
    تعالي معنا و املئي الدنيا بالضجيج
    نظرة على اسرار اون لاين لن تضيرك
    و مشاركتك تأكدي انها مصدر سعادة لنا
    http://asraronline.com/vb/

    ReplyDelete
  8. أنت
    يا سارقة ياء النداء من حروفي
    لماذا أنتِ مرتبك ؟
    نعم أعنيك أنت
    ادعوك للإنضمام للفكرة
    فانتِ وحدك .. تلك التي لم تأت
    هذا طريق لم يكن يعرفه احد
    و لا يعرف احد
    طريق لم تعرفه اقدام المارة
    و لم تدنسه من قبل عجلات سيارة فارهة وقودها من عرقك و دمي
    تعالي معنا و املئي الدنيا بالضجيج
    نظرة على اسرار اون لاين لن تضيرك
    و مشاركتك تأكدي انها مصدر سعادة لنا
    http://asraronline.com/vb/

    ReplyDelete
  9. بقللك
    اية

    انا اصلا خايف

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)