28 February, 2008

تاج من تااااااااااااااااانى

التاج المره دى من دكتور ديد
والحمد لله اتعمل على طول
يلا بينا

اسمك وسنك ودراستك ولا شغلتك (سؤال متكرر في كل تاج عشان نتعرف عليك طبعا )؟؟
بندقه

23

فى كليه الطب

عندك كام اخ وكام اخت ؟؟ سؤال رخم صح

لا مش رخم
اخت واحده

اصغر منى

وهتخلص كليه قبل منى فى رابعه اقتصاد وعلوم سياسيه

ترتيبك وسط اخواتك ؟؟
الكبيييييييييييييره

كنت شقي وانت صغير مع ذكر مثال لو اه ؟
كل اللى يعرفنى هيقول عليا شقيه جدا

وحتى دلوقتى ساعات كده بتلاقى حركات شقاوه بتطلع من ورايا

مثال بقى

امممممممم

يعنى اكبر مثال انى نافوخى اتفتح 3 مرات

وكل مره نقفل وتلات اربع غرز

ويرجع ينفتح تانى

بس بفكر اعمله سوسته

اكله بتحبها جدا واكله مش بتحبك ؟


بحب الحوواوشى والسبانخ والقلقاس

واى حاجه سخنه وبتطلع دخان

مالكش دعوه انت بس اعزمنى وانا هاكل

ماعدا السمك

اوعى تجيب سيرته قدامى



لونك المفضل وليه؟؟ وبيمثلك ايه ؟؟
الازرق السماوى وكل درجاته

اى حاجه لونها ازرق تبقى جميله

لدرجه انى جيبت جهاز الضغط بتاعى ازرق

وجهاز السكر بتاع ماما ازرق عشان انا برضه اللى جيبته

وكنت بحب لبس المدرسه عشان ازرق

وحبيت الفارما عشان كتابها كان ارزق

لون مش بتحبه وليه ؟؟
الموف

عشان اختى بتحبه ومزهقانى بيه فى كل مكان

بس عادى يعنى كل الالوان ماشيه معايا

دخلت كليتك غاوي ولا مجموع ؟

ييييييييه

ليه السيره دى

والله كنت حابها لحد ماخدت الباثولوجى والكميونتى


ايه اللي كسبته منها وايه اللي خسرته بسببها ؟
كسبت فيها اصحاب زى العسل

وماخسرتش فيها غير صحتى

اااااااااااااااه يانى

بتحب مجال دراستك او شغلتك ؟
اه بحبه

بس لو يدولنا فرصه نستمتع باللى بناخده يبقى حلو اوى


اول حاجة بتعملها لما تصحي من النوم غير انك تغسل وشك وتصلي ؟
بفتح الكمبيوتر لو ماما فى الشغل

انما لو فى البيت

بفطر واشرب شاى بلبن واروح كليتى بدرى

بس اوعى حد يفتن عليا

حاجة متعود دايما تعملها يوميا ؟

افتح الكمبيوتر

اكتر حاجة متعرفش تخرج من البيت من غيرها او من غير م تخدها معاك؟
ساعتى والنظاره

ماعرفش امشى من غيرهم

راضي عن حياتك؟
الحمد لله
اكيد


ايه اللي عاوز تغيره فيها وليه ؟

نفسى المذاكره تخلص واشتغل

عارفه انى بعد كده هغير رائى واقول يا ريت كنت فضلت اذاكر احسن من البهدله

بس نفسى ابقى دكتور بجد بقى


عمرك حبيت وايه اللي حصل (سؤال محرج انا عارف )؟
ابدا

لسه النصيب ماجاش

بس كان فى تفاهم



ودلوقتي حالتك ايه بعد اللي حصل ايا كان ؟؟
ماحصلش حاجه يا عم

انت مكبر الموضوع ليه


ليك اصحاب كتير؟
يعتبر لا

شويه كده على قدى خالص

كام واحد منهم بتعبره صديقك بجد ؟
مافيش

مش تكبر بس مش لاقيه حد تفكيره مضروب زى تفكيرى عشان نرتاح سوا

موقف حصلك ولقيت صديق جنبك فيه ؟
قلت مافيش

انا بحب ابقى لوحدى حتى لو ايه حصل


ايه اللي اتقال في حقك وفرحت بيه وايه اللي اتقال ضدك وزعلت عشانه؟
ماما بتقولى انى جدعه

يعنى يعتمد عليا

وده بيفرحنى

اللى اتقال ضدى بقى

انى منطويه على نفسى شويه

مش بعرف اتكلم مع الناس واخد وادى

بزهق بسرعه

ظلم يابيه

راي صحابك فيك ؟؟
بيقولوا انى دمى خفيف

ومش هاقولك ايه كمان


طيب ايه اكتر ميزه شايفها انت في نفسك وايه اكتر عيب برضه ؟
اكتر ميزه اعتقد انى بحب اخدم الناس حتى لو ماطلبوش منى

ولما بزعل من حد مش بقوله وبفضل زعلانه لحد ماانسى

ماعرفش دى بقى ميزه ولا عيب

بس بتزعلنى

اكتر عيب بقى انى لو جبت اخرى من حد ماعنديش فرصه تانيه خالص بطلعه من دماغى مهما عمل

دماغى ناشفه اوىىىىىى

اوصف شخصيتك في كلمتين اتنين بس مش اكتر ؟؟
مش هاقولك

لو تعرف انت قول

اكتر لحظه فرحت فيها؟؟

فرحت واى لما جيبنا الكمبيوتر

لما كنت بطلع الاولى على الفصل بتاعى فى المدرسه

لما بجيب اكتر من 7 من 10 فى اى امتحان

اكتر لحظه زعلت فيها؟؟
السنه اللى فاتت لما طلعت درجاتى وحشه جدا

حاجة ندمت عليها ؟
الحمد لله مش نادمانه على حاجه

بس ساعات بزهق اوى انى دخلت الكليه اللى مش باينلها اخر دى

وحاجة مندمتش عليها ؟؟
انى فتحت المدونه

وعرفت ناس حلوه كتير كده

اكتر لحظه حسيت فيها بدموعك غاليه عندك؟
يوم ماحتجت حد يقف جنبى ومالقيتش

حد عاوز تقوله حاجة وايه ؟؟
اقول لماما : معلش استحملينى اصلى بزهق كتير

بتفكر في ايه دلوقتي حالا في نفس ذات الوقت واللحظه (غير انك تقتلني )؟
بفكر اشرب حاجه سخنه عشان عندى مغص

واقوم اخد النت من اختى عشان انشر البوست ده

ومذاكره الجلديه اللى عندى فيها امتحان ومش اعرف عنها حاجه

تعبت من الاسئلة ؟؟؟
لا ابدا

ياااااااااااااااااااااااه اخيرا خلصوا

انت اسالتك صعبه اوى يا ديد

بس الحمد لله تمت

التاج المره دى مش هيعدى كده بسلام

لا

همرره لكل الناس اللى عندى فى عالم المدونات

اللى ماعملوش يعمله

واللى عمله

يعمله تانى

هههههههههههه




14 comments:

  1. لاااااااااااااااااااا

    انا اتضحك عليا
    من اول سؤال بتهربي

    بقي اسمك بندقة الحقيقي ماشي

    وحبيت الفارما عشان كتابها كان ارزق

    هو انتي مش دفعتي ...اعتقد الكتاب كان اخضر (وش مذبهل)

    "
    اوصف شخصيتك في كلمتين اتنين بس مش اكتر ؟؟
    مش هاقولك

    لو تعرف انت قول
    "

    لو اعرف مكناش سالنا

    "موقف حصلك ولقيت صديق جنبك فيه ؟
    قلت مافيش

    انا بحب ابقى لوحدى حتى لو ايه حصل


    "

    خلاص خلاص طيب بالراحة

    اجابتك نص صريحه علي فكره

    بس كويس انك عملتيه علي الاقل عرفنه شوية عنك :)

    ReplyDelete
  2. اه اسمى بندقه
    حتى نادى عليا كده


    نعم

    ايوه كتاب الفارما كان اخضر بس الدفعه اللى قبلينا كان كتابها ازرق
    وكنت بحبه اوى ونفسى فيه حتى مع الناس اللى كانو بيمتحنو ماستر كان نفسى ابدل معاهم


    وانا هارعرف شخصيتى ازاى بس يا ديد مهى الناس هى اللى مفروض تقول

    ----
    "موقف حصلك ولقيت صديق جنبك فيه ؟
    قلت مافيش

    انا بحب ابقى لوحدى حتى لو ايه حصل


    "

    خلاص خلاص طيب بالراحة
    ---
    اهى دى انا يا سيدى عرفت
    :)

    نص صريحه ايه
    ده انا قولت حاجات كتير اوى ماكانش حد يعرفها
    ده انت عامل تاج وكيل نيابه

    وبالذمه انت لسه ماعرفتش اسمى ايه
    ده انت دونا عن باقى المدونين زمانك عرفت

    ReplyDelete
  3. أجاباتك صريحة في اسئلة كتير في حين انك برضه بتهربي من اجابات برضه
    لكن حقيقي كانت النتيجة بوست ممتع
    كويس انك مش ممرة التاج لحد
    هههههههههههه
    خالص تحياتي
    احمد
    انا برضه علوم سياسية بس متخرج 2007

    ReplyDelete
  4. طيب والله م اعرف اسمك ايه اساسا مع اننا دفعه واحده

    ReplyDelete
  5. بندقه

    اجاباتك غريبه

    مش هقول صريحه ولا حتى نص صريحه

    اجابات لاتبع ولا تغنى من جوع

    بس بجد لذيذه
    عارفه انا استغربت اوى لما قريت

    انا بحب ابقى لوحدى حتى لو ايه حصل

    يعنى حسيت كده ان كل اللى فى طب بيكون كده

    بس كده اريح كتير
    تحياتى

    ReplyDelete
  6. شكرا ياموجه

    بس انا ماهربتش ولا حاجه
    مبروك التخرج يا احمد وعقبالى
    ----------------------
    ديد:
    مش عارف اسمى
    اممممممممممم


    برضه مش هاقولك
    -----------------------------------
    دكتور سامو:
    حتى انت كمان مش عاجباك الاجابات
    يه ده كلكم عليا ولا ايه

    بس انا بحب ابقى لوحدى مش بسبب الكليه
    انا كده من زمان

    ReplyDelete
  7. والله
    انت ذى العسل يا يندقه

    بس بردو فى حد ميحبش السمك
    دا احلى حاجه فى الاكل

    ReplyDelete
  8. والله ......انتى هتبقى دكتور دمك شربات
    روحى حليلى بقى

    الاجابات كلها جميله ودمها خفيف
    ينفع تعملى البيان الختامى لاجتماع القمه العربيه

    تحياتى

    ReplyDelete
  9. انتي اسمك بندقة ليه مثلا مش لب ولا سوداني ولا فستق اشمعنى يعني بندقة؟؟؟؟؟؟
    وبعدين انا اول مرة اشوف وحدة في كلة طيب وقاعدة بتعمل مدونة وتكتب فيها.. فاضية سيادتك يعني مش بتذاكري؟؟؟
    انا كان نفسي ادخل كلية طيب وجبت مجموع يدخلني فعلا بس للاسف كنت ادبي وانتهي بي الحال لكلية الاقتصاد والعلوم السياسية؟؟؟؟؟؟؟؟
    على فكرة انا بتنبألك بمستقبل ناجح بعد التخرج مفيش حد بيشتغل اليومين دول قد الدكاترة سواء كانو بيفهموا ولا ما بيفهموش، الناس يا عيني تعبت كلهم.. يا بختكم؟

    مصري غلبان يعمل في الإمارات

    ReplyDelete
  10. سمسم:
    انا مش بحب السمك ده هو اللى مش بيحبنى

    انتى اللى عسل والله
    ------------------------------------
    ممكن:
    اناخايفه احلل يقولولى عندك السكر عالى
    ويدونى حقنه
    مانت عارف الدكاتره وعمايلهم

    ---------------------------
    فى حب مصر:
    اشمعنى بندقه يعنى؟؟؟؟
    يمكن عشان اسهل من فستقه واطول من لبه واطعم من سودانيايه
    :)

    مذاكره ايه يابنى اللى ذاكر ذاكر خلاص
    بس انت ربنا رحمك من كليتنا ومع ذلك
    شغال قر علينا

    يابنى انت مش عايش فى الدنيا ولا ايه
    الناس اللى بيعالجها دلوقتى الصيادله واقرايبهم
    واحنا قاعدين نغنى ظلموه

    وحضرتك بقى بتشتغل ايه فى الامارات
    سفير؟

    ReplyDelete
  11. بندقة نورتي والله مدونتي برأيك
    دي اول زيارة مني لكي
    بإذن الله تنجحي وتخلصي طب وتحصلي اختك
    علي فكرة فينا حاجات متشابهة
    انا زيك منطوية جدا بس ابتديت اتغير حبة
    وكمان انا مالياش صديقات خالص نهائي
    نفسي اشتغل بس برضه خايفة اندم من البهدلة
    ..
    علي فكرة بعشق اسم بندقة لان ابن عمي بيناديني بيه كتييير
    ربنا يكرمك مدونتك خفيفة وفيها تفاؤل معرفش ازاي بس الوانها بتدي بهجةوهزورها كتير بإذن الرحمن
    بعد اذنك هبقي اضيفها عندي
    الله حافظ
    دودو

    ReplyDelete
  12. زى العسل على فكرة

    خلى بالك بلاش تتمنى تخلصى الكلية
    اصل احلى ايامك هتبقى فيها حتى لو لوحدك... اسأل مجرب

    فى حد فى الدنيا يحب الفارما يامفترية؟؟ والله لو حتى عملولها كتاب فوشيا..هيا فارما برضه

    ReplyDelete
  13. خلاص انا بقيت مقتنعة ان بندقة أحسن حاجة في التسالي
    وبعدين انا مش بقر ولا حاجة... أنا بحسد بس!!!
    وانتي عايزة تعرفي انا شغال ايه في الإمارات ليه؟ عايزة عقد عمل بعد ما تتخرجي؟؟؟؟؟؟؟؟
    عامة يا ستي انا بشتغل باحث في مركز الإمارات للدراسات والبحوث الاستراتيجية
    بس أوعي تقري انتي كمان؟ هههههههه
    انا مش حمل اروح لدكتور ولا حتى حقنة!!

    مصري غلبان

    ReplyDelete
  14. السلام عليكم ورحمة الله وبركاته
    بجد بجد عجبتني صراحتك وما شاء الله دمك خفيف يا قمر

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)