22 November, 2007

شعب فقرى وميستاهلكش

السلام عليكم
معلش بغيب عنكم
مع انكم واحشنى جدا
بس ظروف الدراسه

بس انا قريت الكلام ده وقلت نضحك شويه

منقووووووووووووووووووول


أحمد فؤاد نجم

والقصيدة بعنوان دا شعب فقرى

نظرًا لأن النعمة فاقت حدها
ولأننا مش قدها
ولأن فعلاً إنجازاتك
فوق طاقتنا نعدها
ولأننا غرقنا فى جمايل
مستحيل حنردها
نستحلفك.......نسترحمك
نستعطفك......نستكرمك
ترحمنا من طلعة جنابك
حبتين
عايزين نجرب خلقة تانية
ولو يومين
إسمع بقى
إحنا زهقنا من النعيم
ونفسنا فى يومين شقا
عايزين نجرب الإضطهاد
ونعوم ونغرق فى الفساد
بينى وبينك حضرتك
دا شعب فقرى مايستحقش جنتك
أنا عارف إنه شعب ماينفعوش
إلا شارون وبلير وبوش
عايز يجرب الإمتهان
ويعيش عميل للأمريكان
بيمد "غازُه" لإسرائيل
ويومين كمان ويمد النيل
أهو يعنى نشرب ميه واحدة
ندوب فى بعض
ماء وماء وماء
ونفض سيرة الإنتماء
وبلاها نعرة وطنطنة
وتبقى البلاد "مستوطنة "
متسلطنة ومتسرطنة
إيه اللى خدناه م الكرامة والإباء
حبة خطب وكلام...كلام
إحنا راهننا على النظام
ورضينا بخيار السلام
خيار حنسد عين الشمس بيه
علشان مايطلعش النهار
ويطلع لمين؟
حبة معارضة مغرضين؟
وحسب بيان السلطة
شلة مأجورين؟
ياعم فضك سيرة
وإرضى بقسمتك
دا شعب مش فاهم أكيد
يالا أُطرده من رحمتك
وإن كنت غاوى الحكم
خليك مطرحك
حاغطس وأقب وأعود
بشعب يريحك
راضى وعمره مايجرحك
أخرس وما بيسمعش
وأعميلك عينيه
مش كل قرش يبص فيه
مايقولش لأه، وفين، وليه
يضرب ينفض فى السليم
وعلى الصراط المستقيم
كل اللى يعرف ينطقه
عاش الزعيم
يحيا الزعيم

أحمد فؤاد نجم

11 comments:

  1. ان لله وانا اليه لراجعون
    استقاله الريس ................متقال يا جدع

    ReplyDelete
  2. هههههههه
    جميله والله
    الراجل ده بيعجبنى جدا
    ربنا يشفيه يارب ويقومه بالسلامه عشان يمتعنا كمان
    وبحييكى على اختيارك

    ReplyDelete
  3. تامر حسين:
    هو مين اللى مات؟
    !!!
    ------------------------------------
    لماضه:
    ربنا يشفيه طبعا
    هو احنا لينا غيره
    :)

    ReplyDelete

  4. فعلا

    شعب فقري قوي

    :))

    ربنا يوفقك

    تحياتي من ماناساس البلد

    ReplyDelete
  5. فعلا
    شر البلية ما يضحك
    اول مرة بتشرف بزيارة المدونة الجميلة دي
    تحياتي واحتراماتي

    ReplyDelete
  6. هههههههههههههه

    جميلة اووووووووووووي

    تسلمي يا بندقة

    :)

    ربنا يسعدك يا جميلة

    ReplyDelete
  7. هههههههههههههههههههههههه
    بجد بوست قال كل حاجه ربنا يشفيه يارب

    ReplyDelete
  8. هيييييييييييييييييييييييييييييييه
    عظمه على عظمه

    بس وبعدين
    كلمات كلمات وكمان كلمات

    بس مافيش افعال

    انا بشكر الظروف اللى احنا فيها علشان بجد خرجت لينا اساتذه وادباءوالراجل ده بصفه خاصه

    ربنا يشفيه

    شعب فقرى اه .. قوى لا
    بجد بتعجبنى اختياراتك لمواضيعك ولاقتباساتك

    استمرى ومتعينا

    ReplyDelete
  9. حاغطس وأقب وأعود
    بشعب يريحك
    راضى وعمره مايجرحك
    أخرس وما بيسمعش
    وأعميلك عينيه
    مش كل قرش يبص فيه

    صحيح
    عاش الزعيم
    يحيا الزعيم

    احنا فعلا مابنعرفش نتحكم
    والراجل طهقان معانا مره بالذوق ومره بالعافيه
    ولا تعديل الدستور نافع ولا امن دوله نافع
    لا وهيضحي بابنه برضه ويجيبله ضغط وسكر من الشعب ده
    قول قول يا عم نجم

    اختيار جامد يا بندقه

    ReplyDelete
  10. و اللة و انا كمان نفسى ياعمنا

    يا نجم

    ReplyDelete
  11. السلام عليكم ورحمه الله
    اولا طولتى قوى بين البوستات يارب يكون المانع خير
    ثانيا كل سنه وانتى طيبه بمناسبه عيد الاضحى المبارك تنعاد عليكى الايام بخير

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)