16 August, 2007

دكتور ...........و...............دكتوره

السلام عليكم

دلوقتى وبعد ما كل دفعتنا فى الثانويه العامه خلصو كليه وداخلين على جواز
واحنا طبعا المجانين الوحدين اللى قررو يدخلو طب قال ايه ............هايبقو دكاترا

ماعلينا

المهم اننا بقى بنقول ان احنا لازم نرتبط بدكاترا زينا
هاتقولى بقى اشمعنا دكتور يعنى
اقولك
احنا برضه لينا وجه نظر
اولا:
الدكتور هيكون مجرب الكليه وعارف وجع دماغها وعارف ايه اللى بعد كده من مذاكره ودراسات عليا
وهيبقى مقدر يعنى وفاهم النظام يعنى مش هايقول انتى مش فاضيه ولا سايبانى ومشغوله عنى
ثانيا:
الدكتور المفروض انه هايشجع زوجته عشان تذاكر وتكبر معاه
ويهيبقى اكبر منها ويقدر يساعدها
لا والله مش داخلين على طمع ........ بس هيساعدنى وهو خبره برضه
ثالثا:
نفسى ارتبط بدكتور
ونخلف دكاترا صغيرين
ونعيش عائله طبيه جدا
رابعا:
لما احنا الاثنين نبقى دكاترا
هيكون مجال المناقشه مع بعض مفتوح لان مجال عملنا واحد
يعنى هنعيش احنا الاثنين جو واحد
هنكون مشغوليين سوا وفاهمين بعض وفاهمين احنا بنفكر فى ايه
------------------------------------------------------------

بس دى احلامنا
بسيطه وعاديه جدا
بس ده طبعا ما يغيرش انه لازم يكون ميسور الحال وقادر على تحمل مسؤوليه الزواج

-------------------------------------------------------------
بس لما تيجى بقى تشوف الدكاترا الرجاله وتساله انت نفسك تتزوج دكتوره؟
معظمهم يقولك لا............ " الخاين ..الغشاش
ليه بقى يا سيدي؟
قال ايه انا عايز واحده فاضيه مش مشغوله بغيرى
يعنى انا ممكن اتزوج دكتوره صيدليه
"مش بقولكو خاين"انتو دايما كده


مع انك ممكن تشوف اطباء كتير متزوجين من طبيبات وحياتهم سعيده
بس نعمل ايه فى اطباء اليومين دول


انتو رايكو ايه
يعنى هاتقولو ايه عشان تدافعو عن نفسكو
وانتو يا بنات عايزين تقولوهم ايه تانى
قولو قولو ...........ماتخلوش فى نفسكو حاجه

13 comments:

  1. السلام عليكم
    ربنا يوفقك وتخلصي وتبقي دكتورة كبيرة و شاطرة علشان نتعالج عندك ده اول حاجة ،الصراحة انا شايفة ان البنات بلاش يخشوا طب علشان هتتعب وياعيني هتطلع عنيها ده طبعا على اساس ان انا عيني مثلا مش بتطلع في كليتي (:، بس بجد ليه اقعد ادرس كل ده وفي الاخر ايه ، انا مش بحبذ طب للبنات هو صحيح في اقسام يفضل تكون بنات بس هتتجوز امتى وهتربي العيال ازاي والكلام ده وطبعا انا عارفة ان الجواز قسمة ونصيب ،بس بعدين الراجل المسكين مهما كان مقدر شغل زوجته مسيره يوم ويتعب وبزهق من نظام الحياة ده ، راحت المستشفى رجعت من المستشفى الواد تعبان وانت ولا دريانه عنه والعيال مش عارفه حصلهم ايه وكل الكلام اللى بنسمع عنه وبنشوفه ده ولا انت شايفة ايه .هو عامة ده مش قاعدة المهم ان الزوج والزوجة يكونوا متفاهمين مهما كان شغلهم ، بس مش كل الرجال حلوين كده (:
    وعلى فكرة انا كلية السن يعني بعيد عن مجال الطب ده بس لما بسمع اصحابي اللي في طب بيتكلمو عند الدراسة او ما بعد التخرج بحمدربنا ان انا في كلية اربع سنين .
    معلش اوي على الاطاله والله هو لسه في
    كلام بس كفايه كده..... وعموما ربنا يرزقك بابن الحلال ويكون دكتور لو عايزة و فيه كل الموصفات اللى بتحلمي بيها .............
    والسلام عليكم ورحمة الله

    ReplyDelete
  2. السلام عليكم ايتها العريفة بندقة من مهاجر طالب طب الى بندقة لو حصل انى بقيت فى عالم من الطبيبات وانا الوحيد الرجل ولازم اتجوز واحدة فيهم لاما يحدفونى لاودة فيها امنا الغولة وابو رجل مسلوخة و فرانكشتاين و كعبول و التنين الاحمر الناري و ابو لهب و ابرهة و اليهودي بتاع قصة تاجر البندقية فانا افضل الاودة و سادخلها بصدر رحب غير اسف و يا ريت بلاش حقد على بنات صيدلة عشان الامور دي مكشوفة و ربما فى عالم اخر موازي فى مجرة اخرى موازية برده ممكن الدكتور يفكر يجوز دكتورة و بمناسبة الاشاعات بتاعة سعادة الاسرة الطبية فى الزواج فانا ليا واحد صاحبى فى حقوق وممكن تتبهدلى فى المحاكم بسبب الاشاعات دي
    وشكرا لحسن اوسكلتاتكم=auscultation لنا

    ReplyDelete
  3. بعد التحيه اسمحيلى يا دكتوره ارد على منى والمهاجر
    استاذه منى هاتدرس كل ده وفى الاخر هاتكون طبيبه نافعه لنفسها وبيتها واهلهادا لو ما شتغلتش وبقت نافعه لمجتمعها كمان بازن الله لكن قوليلى انت بيتخرج من قسم لغات كام كل سنه من كلية اداب وتربيه وبنات والسن و لغات وترجمهوكليات ما انزل الله بها من سلطان لكن الطبيبه بتتخرج منين مافيش غير كلية الطب نيجى للراجل المسكين اللى ها تتجوزه اولا لو هو شايف انه مسكين مايتجوزهاش احسن لانها مترضاش ترتبط بانسان عاجز عن التقدير والفهم .هى لما ترتبط ها ترتبط بانسان فاهم واعى عارف انه مرتبط بانسانه زكيه واعيه هاتكون فهماه ومقدره دوره فى الحياه وهاتخلفله ولاد ازكياء بالوراثه ما يخافوش من الاقسام العلميه فى المدارس والكليات وانت خايفه قوى عليه كدا ليه هو فاضى ماهو وراه شغله هو كمان وولاده اللى بتقولى مش هاتعرف عنهم حاجه مين اقدر على رعايتهم وتوجيههم هى اللى عارفه معنى المزاكره والتفوق ولا ...ولو انت كافحتى وطلعتى معيده ودكتوره ان شاء الله يا ترى عاتعملى فى ولادك ايه وانت بتحضرى الماجستير والدكتوراه معلش برضه على الاطاله



    والمهاجر الذيذ اللى عايز يسيب البلد اللى علمته ويهج منها بعد التخرج اكيد مش هايكون ارحم على زوجته الطبيبه من بلده ويا سيدى لا تتجوز دكتوره ولا هى عايزه تتجوزك لانك انسان مش عارف يعني ايه طبيبه انت واخد الموضوع قرش هنا قرشين هناك افضل ..يعنى مالكيش عزيز المحاكم دى للى فاضيين واللى ما يعرفوش ربنا وانا ايه اللى يخلينى ارتبط بانسان ما يعرفش ربنا ورغم انى مش مصممه على الاتباط بطبيب بس بالعند بقه هاستناه وهايجى بازن الله وهايكون عارف يعنى ايه زوجته طبيبه وهايدخل معايا الجنه بازن الله وخليك انت بقى مع امنا الغوله وابو لهب واما عن الحقد على بنات صيدله دول يا حبيبى تجار وبنوك مالهمش فى الطب والدواء دول عارفين انهم مطلوبين فى سوق الزواج بفلوسهم علشان يملو عين الرجال اللى مابيشبعوش فلوس زى حضرتك كدا
    اسفه يا دكتوره للتطويل بس غصب عنى لانى دكتوره وناجحه وولادى الحمد لله نعمه وفضل من ربنا وزوجى الله اكبر
    بس مش هاقول انا مين علشان الحاسدين والحاقدين واللى مش فاهمين و
    وكل الحكايه توفيق من ربنا والله العزيز الحكيم قال
    "ومن يتقى الله يجعل له مخرجا"حبيبتى بندقه مش مهم تتزوجى طبيب او اى مهنه اخرى المهم تختارى الانسان اللى يقدرك ويفهمك ويفتخر بيكى وعند احتياجك لرجل تجديه بجوارك راجل واخ وصديق وزوج وحبيب
    وكل ده مش هايجى الا ان تكونى بحنانك اليه اقرب من حنان الام لابنها وصدقينى وراء كل امراه ناجحه رجل انجح منها لانه يكفى انه ساعدها على النجاح وخلى طريقك صادق مع نفسك ومع زوجك لانك لن تكونى سعيده بنجاحك الا لو كان بيتك سعيدالاول والاخرين سعداء بنجاحك وانتظريه الفارس الناجح الواعى فهو قادم بازن الله تحياتى لك

    ReplyDelete
  4. السلام عليكم
    @anonymous
    الاخت الفاضله ماشي في الاخر هى طبيبة وبعدين ..... مش بالضرورة كل من اتخرج من طب بيبقى ناجح وبيفهم والامثلة على دول كتير اوي وكلنا عارفين كده ، اما حكايةالارتباط وانه عارف انه مرتبط بانسانه زكية وواعيه فكنت عايزةاقول هو البنات اللى في طب بس هما الاذكياءوالواعين ولا ايه ؟ لا طبعا مش بالضرورة علشان هى في طب تبقى عبقرية ومحصلتش، وسبحان الله كمان هيخلفوا ولاد اذكياء بالوارثة وميخفوش من الاقسام العلمية ،وبعدين كل واحد بيخش القسم اللى هوشايف نفسه فيه مش عشان بابا وماما دكاترة يبقى هو كمان لازم يخش علمي ويكون زيهم ، وكمان يعني ايه هى عارفة معنى المذاكرة والتفوق هو اللى في باقي الكليات ميعرفوش يعني كده في كل كلية في ناس متفوقين وناس غير متفوقين وده حاجة طبيعية حتى في طب في كده ،في ناس دخلوا طب علشان اهليهم عايزين كده وعلشان مجموعهم كان عالي هتقولي مجموعهم عالي و ده دليل على الذكاء،هقول انا واحده من الناس مجموعي كان كبير ومدخلتش طب فيها حاجة بقى ،وماشي لو هى دليل على الذكاء فده فضل من ربنا عليه ،وبعدين تربية الاولاد مش محتاجة واحده تكون دارسة طب اكيد التعلم مهم علشان التربية بس في كتير اوي اهليهم مش متعلمين اصلا وكافحوا علشان اولادهم وماشاء الله طلعوا اولاد متعلمين وخير التربية ،احسن من ناس تانية كتير

    بس في الاخر اسمحيلي حضرتك دكتورة
    ومتزوجة ومتعلمة واكيد فاهمه انه الانسان مش بالكلية اللى هو فيها ولا مركزه والتفاخر انه طبيب ، الانسان بخلقه وشخصه قبل كل شئ.


    وياريت كنتي تقرأي ردي الاولاني قبل ماكنتي تردي علشان تفهمي وجهة نظري صح ، وعموما اختلاف الرأي لا يفسد للود قضية والسلام ختام

    ReplyDelete
  5. لما تيجى بقى تشوف الدكاترا الرجاله وتساله انت نفسك تتزوج دكتوره؟
    معظمهم يقولك لا............ " الخاين ..الغشاش"و
    ليه بقى يا سيدي؟
    قال ايه انا عايز واحده فاضيه مش مشغوله بغيرى
    يعنى انا ممكن اتزوج دكتوره صيدليه
    "مش بقولكو خاين"انتو دايما كده

    جبتيها من علي لساني

    وهندافع ليه؟
    ده طبيعي
    يعني احنا مشغولين وانتوا مشغولين
    طيب نودي العيال منحه لا ترد لحماتنا؟
    بصي يا بنتي
    انتوا لكم تخصصين مش هنناقشكم فيهم
    اشعه وتحاليل
    وجلديه
    وممكن انف واذن
    حاجه روقان كده
    وطبعا مفيش عياده
    دماغ شرقي بقي هتعملوا ايه؟

    مره كنا في درس جراحه والدكتور بيتكلم علي البنات اللي بتعنس في طب
    لقيت واحده انفجرت مره واحده بتقول:
    ماحنا لو اتجوزنا واحد اقل مننا الناس مش هتسيبنا من كلامهم
    والخونه اللي معانا في الكليه مش عاجبهم بنات طب
    حلها انتي بقي

    ReplyDelete
  6. السلام عليكم
    منى:
    اهلا بيكى فى مدونتى
    ربنا يسمع منك يارب

    زى مانت بتقولى احنا كده كده طالعه عنينا
    يبقى تطلع فى حاجه بنحبها احسن

    وياستى الزواج والاسره دى مسؤوليه مشتركه يعنى هم الاتنين يتعاونو عشان الحياه تمشى سواء كانت الزوجه طبيبه او لا
    انما الرجل اليومين دول مش عايز يشيل مسؤوليه خالص يعنى هو عايز يتجوز عشان يلاقى حد يدلعه وخلاص يعنى هو خسران ايه ولا زايد عليه ايه مهو كده كده راح الشغل ورجع اتغدى ونام زى ما يكون فى بيت والده تمام
    يشيل هم عياله ليه؟؟؟
    يعنى هو الواد اللى تعب ده مالوش اب زى ماله ام؟؟؟

    بس برضه اكيد فى ناس كويسين ربنا يوعدنا بحد منهم
    -------------------------------
    المهاجر:
    انتباه يا عسكرى
    حضرتك بتفكيرك ده تستاهل انك تستنى مع امنا الغوله ...ده لو هى رضيت يقعد معاك
    واحنا ياسيدى ما بنحقدش على بنات صيدله لانهم اصلا مش دكاتره
    ----------------------------------
    anonymous:
    شكرا ليكى جدا على دفاعك عنى بس حقيقى المساله مش حكايه طبيبه
    المساله ان الرجل اصلا مس مستعد انه يتحمل انه يساعد زوجته

    فعلا انا نفسى فى الرجل اللى يفهمنى ويكون ليا صديق واخ قبل ان يكون زوج
    وانا ماعنديش اى رفض انه يكون انجح منى بالعكس ده شئ يشرفنى انى ارتبط بانسان ناجح مادام يساعدنى على النجاح معه

    وان شاء الله اجده ويجدنى ودعواتك بقى وشرفتى مدونتى رغم انك ماقولتيش انتى مين
    -----------------------------
    منى:
    انت زعلتى ليه
    انتو الاتنين وجه نظركو مقبوله العيب مش فينا احنا
    لان الام والزوجه والمراه بوجه عام عندها القدره على العطاء والتضحيه وده اللى بيخليها تقدر تبنى اسره وتكون مسؤوله عنها سواء كانت طبيبه او لا
    وانا بتكلم عنى كطبيبه ولكن ممكن الكلام ده يحصل مع اى سيده تعمل وزوجها لا يساعدها

    بس على فكره الذكاء فعلا بيورث وفعلا بيجى من الام اكتر وده مش كلامى ..انا قراته قبل كده فى بحث علمى
    بس مش شرط انه عشان ماما وبابا دكاتره انى اكون دكتور ولكن بيأثر بنسبه 80% انه يدخل طب لانه تشبع بهذا الجو العلمى

    بس الرجاله اصلا بيشتكو على طول سيبك مهم

    وفعلا الاختلاف فى الراى لا يفسد للود قضيه والعبو مع بعض ما تتخانقوش
    من غير زعل
    --------------------------------
    حصان برى:

    حتى انت يا سبارتكوس
    ده كنت فاكراك هتقف فى صفى
    انا مافيش فايده انتو كده على طول دماغ شرقى فعلا

    بس شوفت طلعتو خونه فعلا مش انا لوحدى اللى بقول عليكو كده
    انتو اللى جبتوه لنفسكو
    سمعتكو بقت وحشه اوىىىىىىىىىى

    -----------------------------------

    ReplyDelete
  7. بصى يابنتى بيتهىء لك انتى ليه مقلتيش انه ممكن يبقا فى غيره ويغير من نجاحها فى ناس كدا وفى ناس بتحب تموت النجاح عموما انا رايى انه لو متفاهم الدنيا هتبقا فل حتى لو كان كليه ادابا عمرها ماكانت بالكليات لانها واضحه لكل الناس
    ثم انتى فى طب انا مكنتش اعرف
    طب من بقك هههههه

    ReplyDelete
  8. انا اهو مشروع دكتورة ان شاء الله
    لسه قي سنة سادسة
    لكن ابداااااا
    مش افضل ان اتجوز دكتور
    يابنتي العيشة مش ناقصة كآبة
    وانتي عارفة الكليه دي بتعمل كم كآبة قد ايه في البني آدم
    وبعدين مين قال انه شرط ان الدكتور يقدر ظروف مذاكرتنا وشغلنا
    أنا شايفة نماذج عكس كدا خاااالص
    دا بخلاف انه اصلا الدكاترة مش بيفضلوا يتجوزوا دكتورات
    معاهم حق
    هههههه
    يعني هو مشغول مستشفى وعيادة وتحضير
    وانتي كمان زيه..يعني من الآخر ولادكوا مش هيلاقوا حد يربيهم
    وهاينحرفوا ومش بعيد الشيطان يوزهم ويطلعوا دكاترة
    تحياتي يا جميل
    بجد موضوعك حلو وخلى الواحد يطلع الى في قلبه

    ReplyDelete
  9. ع فكرة انا عمرى ماهاخد

    دكتورة

    و لا تى اى واحدة ليها علاقة بالمجال الطبى


    لانهم بيبقوا دايما مكلكعين

    و عندهم عقد

    ومش بيقضوا اى مصلحة

    ههههههههههه


    بلادكاترة بلا هباب

    ReplyDelete
  10. هوندا:
    هى فعلا مش بالكليات
    المهم الانسان اللى قدامك
    ----------------------------------
    دكتوره روفى:
    ربنا يقويكى فى سنه سادسه
    انم السابقون ونحن الاحقون
    والله هى الكآبه دى اللى مضيعانا
    حلوه الشيطان بوزهم ويطلعو دكاتره دى
    بعد الشر عليهم
    -----------------------------------
    كفراوى:
    انت كنت لسه ما قولتش رايك
    ايه المواعيد دي

    احنا مكلكعين ومعقدين
    طيب قول فينا كلمه حلوه باسم الزماله ياساتر عليكم

    امال عايز تتجوز مين يقضيلك مصلحه
    وزير الصحه
    يلا باى

    ReplyDelete
  11. هاى بندقة
    انا يمكن دخلت المدونة صدفة
    بس فكرة و اللهى بردة
    بس تعرفى
    انا شايفة ان لازم يكون فى اختلاف . يعنى مش علاشن انتى دكتورة يبقى لازم يجيلك دكتور امال اللى بتحلم ان يجيلها دكتور و هى مش دكتورة تعمل اية
    على العموم مدام انت نفسك فى دكتور علشان انتى دكتورة , مفيش اى مشاكل
    ربنا يوعدك بدكتور حليوة كدة و ماطأط
    هههههههههههههه
    تحياتى
    تمرحنة

    ReplyDelete
  12. تمر حنه:

    نورت المدونه وياريت الصدف تستمر على طول

    حقيقى هى القضيه مش فى الدكتور هو اهم شئ انه يكون انسان محترم ومتفاهم

    ReplyDelete
  13. سلام عليكم
    انا دخلت الموضوع بالصدفه
    ايه ده يا بندقه الناس جرالها ايه مفيش دم
    يابنتى احنا اللى يستاهلنا انسان واثق من نفسه و جدير بيكى يكون اى حاجه مش مهم
    الراجل ميحبش ست تبقى احسن منه ولازم يقلل من شئنها
    الدكتور اللى يتجوز دكتوره ده انسان منفتح و عاقل و شايفها عشرين سنه فى الكليه وعارف سلوكها
    فى الاخر يطلع يخطب من بره
    قطييييييييييييعه
    وقال احنا مكلكعين قال

    هههههههههههههه
    ده مفيش اطعم مننا

    ده هما اللى مينفعوناش
    وربنا يرزقك باللى يستهلك

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)