27 July, 2007

هذا ما يريدوه لنا

فى وسط كلام وزير الاتصالات عن النت وتوفره لجميع الفئات
ربنا يهده

واللى سمعته ان ال 2 جيجا دول يادوب يكفو الشات

دخلت الشات عشان استفيد من حمله النت للجميع

ورغم انى دائما ادخل الروم الاسلامى الا انى وجدت شئ غريب اوى
ولا غريب ليه ..... دلوقتى كله عادى

عادة بلاقى دروس دينيه او خطبه او حتى مسابقه على المايك
ده بغض النظر عن الكلام اللى بيتكتب والاحاديث اللطيفه بين الشيعه والسنه

المهم دخلت لاقيت واحده بتتكلم تقريبا بتدى درس ولا موعظه
المهم سمعت..... كانت بتتكلم عن الحور العين والجنه
وشويه ولاقيتها قلبت واديتها خمارات
ايوه خماره
بالالف مش خمار لا خمّاره البتاعه دى اللى كانت فى افلام زمان
المهم قلت دى ست مجنونه وبتخرف وعملت "ميوت

بعد شويه بفتح لاقيت اللى بتزعق فينا
اييييييييييه ما تفوقو لنفسكو
اصحو بقه ودورو على الهكم قبل ما تموتو

استغربت اوى دى مجنونه فعلا
اتارى الست هانم فاتحه معهد تكفير وماشيه تكفر الناس
وتقنعهم بعدم وجود الله عز وجل

مش ده اللى زعلنى قد انى لاقيت ناس فعلا بتتكلم معاها
يعنى عادة بيعملو اجنور وماحدش بيعبر الناس اللى زى دى

لا وايه الست حافظه الاحاديث والقراّن وبتتكلم كويس جدا يعنى انا اول ما سمعتها اخذت عليها بس انها واحده ست وبتتكلم فى المايك مع الرجاله بس قلت ...يمكن

-----------------------------

ويجى مفتى الديار ربنا يعمر بيته
يقول للناس من حق المسلم انه يترك دين الاسلام لو ده مايأثرش على المجتمع
قصده انهى مجتمع بقى؟؟؟؟؟؟؟؟؟
المجتمع الاقتصادى ولا السياسى و لا السياحى ولا ايه بالظبط

حاجه غريبه اوى
قال ايه يقدم طلب للمحكمه والمحكمه تنظر فى امره
هل يضر المجتمع بشئ
"هو يعنى كان فاده بأيه من الاول عشان يضره دلوقتى"و
وبعدين تديله صلاحيه :انت دلوقتى مش مسلم...ادهب فانت من الطلقاء

-----------------------------

وواحد تانى فكر يجرب الاتنين
كان مسيحى وزهق
راح اسلم....وجرب يومين
لقاه مش لذيذ فرجع للمسيحيه
وبعدين زهق من مراته راح قلها انا هاسيبلك البيت والدين كمان
انا راجع مسلم تانى
وساب عياله وطفش

بقى هو الاسلام قالك تعمل كده ولا هى دى اخلاق مسلمين
ما علينا


المهم الباشا بعد اربع سنين فى المحاكم مع مراته
افتكر ان فى ورقه ممكن تكون فى صفه ....العيال

قام رايح يبلغ المدرسه انا ولادى مسلمين ولازم يمتحنو دين اسلامى


مش مهم بقه كل ده
المهم ان العيال اللى فى اولى اعدادى
راحو الامتحان كتبو انا ديانتى مسيحى


بس
واللى مش عاجبه يخبط دماغه فى الحيط

------------------------


حاجات غريبه بتحصل فى عالم غريب
بس اللى ثابت فيها
ان المسلمين بقو خايبين اوى اوى

يعنى انا مش بعيب على الست اللى فى النت دى
دى مؤمنه ان مافيش اله وبتدافع عن فكرتها وبتنشرها

الولدين دول مبسوطين انهم مسيحين ومش عايزين يغيرو
برضه حقهم

المفتى ده ماحدش يقدر يتكلم عنه

انما المشترك انه مافيش صوت مسلم

اللهم ارحمنا برحمتك
ولا تحملنا مالاطاقة لنا به
واعفو عنا يارب

9 comments:

  1. و الله يا بندقه هو الفكره اننا يمكن بعدنا شويه عن الدين بتاعنا
    و بعدنا ده خلانا مش عارفين دينا كويس
    و هى دى المنطقه الى بيدخلنا منها الى عوزين يدمرو الاسلام
    و يجدلو
    و بما اننا مش عدنا ثقه فى اسلامنا لاننا بيعدا عنه
    ف بنتلغبط و ممكن نسيب الاسلام

    و الله مره دخلت على صحبى كان على شات و كان فى واحد بلاش اقول ديانته و كان قاعد يكفر فى الاسلام و المسلين
    و احنا نرد عليه و هو زى ما تقولى حافظ القرأن و عارف النقط الضعيف الى احنا فهمنها غلط و يدخل منها ف الواحد يقعد يتشكك

    لكن هنقول ايه مش هنرجع لينا كيان تاتى لما نرجع لاسلامنا الاول


    بــــــــس
    :)

    ReplyDelete
  2. ليكي تاج عندي وأكون سعيد لو رديتي

    ReplyDelete
  3. لسه مصممه تدخلي الشات
    جبتيه لنفسك :)
    يابنتي كل واحد فاكر الدين ده خانه في بطاقه بيغيرها زي مابيغير القميص
    ده غير بقي نوعيه الست اللي بتحكي عنها
    تحسي انها كانت تجلس تحت شجره تين فتساقطت تحت قدميها هموم الدنيا واكتشفت اننا عايشين بلا هدف وبلا اله

    دول نفسيات مريضه بيدوروا علي حد يسمعهم

    اه الوزير مصمم ان ال2 جيجا كويسين وزي الفل
    الراجل ده شكله فعلا مقضيها شات وهضبطه في روم مره
    تحياتي يا جميل

    ReplyDelete
  4. مامادو:
    فعلا الناس اللى بتتكلم فى الموضوع ده بيبقو قاريين كويس اوى
    وكلامهم فعلا مقنع لانهم بيحللوه على مزاجهم

    اللى يغيظ ان فى ناس فعلا سامعالهم
    بس انا ماعرفتش اعمل حاجه غير انى اقول يارب اهدى شباب المسلمين
    وانصر الاسلام وارفع رايته عاليه
    ------------------------------------
    ياسر :
    والله انا شفت التاج بتاعك بس ماعرفش بتاعى انا فين
    اصل انا اول مره حد يقولى كده
    وماعرفش اعمل ايه!!!
    -----------------------------------
    حصان برى:
    هم اذا كانو نفسيات مريضه ... فى نفوس مريضه اخرى بتسمعلهم

    لولاقيت الوزير ابقى دخلنى معاكم كونفرنس
    ههههههههههههه

    ReplyDelete
  5. _النت_

    فليقضى اللة امرا كان مفعولا


    _الشات_

    نصيحة....اجتنبى مواطن الشبهات


    _المفتى_

    اهو بيفتى .........!!!!


    _تغيير الديانة و العقيدة

    انما اجرة على اللة



    تحياتى ليكى و لمدونتك الجميلة
    تحياتى مرة اخرى ع البروفيل

    ReplyDelete
  6. موضوع الشات ده موضوع قديم ولو كان في مسلم متخصص موجود كان زمانه خلي الست دي زي الكتكوت المبلول أسف بس دي كانت حاتبقي حالتها فعلا لو صادفت وجود مسلم دارس أو متعود علي مواجهه الناس دي وبالنسبه للمفتي كلنا عارفين أنه ديكور للأسف السلطه الدينيه في مصر بقت ديكور

    ReplyDelete
  7. This comment has been removed by the author.

    ReplyDelete
  8. السلاااااام عليكمممم

    ازى الحال بندقة..اتمنى تكونى بخير

    واسفين جدا يافندم على الزيارة المتأخرة دى..بإذن الله مش هتكون اخر مرة

    موضوعك دا مهم جدااا وللاسف ماحدش بقى يدرس الدين كويس وكتير بقوا يتأثرو بأى كلام يسمعوه

    ويقطع الشات ياختى وسنينه اللى خرب عقول الناس وربنا يستر

    ReplyDelete
  9. السلام عليكم ازيك يابندقه عامله ايه يارب تكونى بخير
    بصى ياستى هو واد جدا فى اى وفت وفى اى مكان ان يبقا فى ناس زى ست الكتكوتة بس هيا المشكله مش فيها المشكله فى الناس الى بتسمعلها وبكدا بتشجعها انها تنشر افكارها وده بيرجع لضعف ايمان الناس دى او جهلها بالدين لان اصلا الامة الاسلامية فيها حوالى 80% امية دينية يعنى مسلمين كلام بس وده طبعا بيبقا زى فريسة لاى افكار تتنافى مع ايمانا

    ReplyDelete

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)