30 December, 2007

كل سنه وانتم بخير


اخيرا السنه الجديده جت

قال يعنى هتكون احسن من اللى فاتت

طبعا احسن واجمل كمان ايه التشاؤم ده
مش صح برضه تشاؤم بتتكتب كده

يلا كله محصل بعضه انا اصلا كنت علمى وماليش فى العربى
:)

على العموم انتو وحشتونى اوى وبعتذر بشده عن الغياب عنكم كل الوقت ده
طبعا حسيتو بالفرق والمدونات كانت ضلمه من غيرى
;)

انا جيت خلاص خلاص ماتعيطوش
هليت عليكم بطلعتى البهيه

واشرقت عليكم من الافق العالى فاضات سمائكم بنورى


اااااااااااى اى
مين اللى بيحدف طوب
لا ايه ده مش طوب..... بتحدف طماطم وتجرى
ماشى
انا هاحرمك من الميراث




يااااااااااااااااااااه دا انا شكلى بخرف ولا ايه
يلا بقى تهيس اخر العام
ماحدش ليه حاجه عندى انا دلوقتى بلعب فى الوقت الضايع

احب اقولكم اعملو حسابكم عيد ميلادى اقرب
حوشوا عشان تجيبولى هديه

كل عام وانتم بخير واكتبو بقى امنيتكم فى العام الجديد
ويارب يجعله عام سعيد علينا كلنا

22 November, 2007

شعب فقرى وميستاهلكش

السلام عليكم
معلش بغيب عنكم
مع انكم واحشنى جدا
بس ظروف الدراسه

بس انا قريت الكلام ده وقلت نضحك شويه

منقووووووووووووووووووول


أحمد فؤاد نجم

والقصيدة بعنوان دا شعب فقرى

نظرًا لأن النعمة فاقت حدها
ولأننا مش قدها
ولأن فعلاً إنجازاتك
فوق طاقتنا نعدها
ولأننا غرقنا فى جمايل
مستحيل حنردها
نستحلفك.......نسترحمك
نستعطفك......نستكرمك
ترحمنا من طلعة جنابك
حبتين
عايزين نجرب خلقة تانية
ولو يومين
إسمع بقى
إحنا زهقنا من النعيم
ونفسنا فى يومين شقا
عايزين نجرب الإضطهاد
ونعوم ونغرق فى الفساد
بينى وبينك حضرتك
دا شعب فقرى مايستحقش جنتك
أنا عارف إنه شعب ماينفعوش
إلا شارون وبلير وبوش
عايز يجرب الإمتهان
ويعيش عميل للأمريكان
بيمد "غازُه" لإسرائيل
ويومين كمان ويمد النيل
أهو يعنى نشرب ميه واحدة
ندوب فى بعض
ماء وماء وماء
ونفض سيرة الإنتماء
وبلاها نعرة وطنطنة
وتبقى البلاد "مستوطنة "
متسلطنة ومتسرطنة
إيه اللى خدناه م الكرامة والإباء
حبة خطب وكلام...كلام
إحنا راهننا على النظام
ورضينا بخيار السلام
خيار حنسد عين الشمس بيه
علشان مايطلعش النهار
ويطلع لمين؟
حبة معارضة مغرضين؟
وحسب بيان السلطة
شلة مأجورين؟
ياعم فضك سيرة
وإرضى بقسمتك
دا شعب مش فاهم أكيد
يالا أُطرده من رحمتك
وإن كنت غاوى الحكم
خليك مطرحك
حاغطس وأقب وأعود
بشعب يريحك
راضى وعمره مايجرحك
أخرس وما بيسمعش
وأعميلك عينيه
مش كل قرش يبص فيه
مايقولش لأه، وفين، وليه
يضرب ينفض فى السليم
وعلى الصراط المستقيم
كل اللى يعرف ينطقه
عاش الزعيم
يحيا الزعيم

أحمد فؤاد نجم

11 November, 2007

TaaaaaaaaaaaaaaaaaaaaaaaaG

التاج ده جالى من احمد عيسوى

طبعا هو زمانه نسى انه بعتلى حاجه

لانه بقالى كتير عندى ومش عارفه اجاوبه

احمد انا جاوبت التاج اهو

لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟

هختار عصر الاحتلال الانجليزى

عشان لما ابقى حاسه بالظلم فى بلدى يبقى من حقى انى ادافع عن نفسى ضد اعدائى واعرف ازاى اخد حقى


اول اولويه فى حياتك عيلتك ولا شغلك ولا اصحابك؟

عيلتى—دراستى—اصحابى


ايه اكتر حاجه بتحبها فى رمضان؟

ده عشان التاج جالى من ايام رمضان؟؟؟؟؟؟؟؟

يلا مش مهم

انا بحب فى رمضان الروح بتعاعته

بتحس كده ان الناس هاديه وامراء وبيحبو بعض الى حد ما

وبحب صلاه التراوييح


اوصف ليا اجمل فطار ممكن تفطره

اى فطار حلو

مادام فيه قمر الدين وشوربه

والاكل سخن وبيطلع دخان

J


لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟

ده سؤال صعب شويه

لان العداله على واحد ممكن تبقى ظلم للتانى

بس اللى اقدر اعمله انى ابذل كل جهدى عشان كل الناس تاخد حقها

ولازم اعرف كل كبيره وصغيره عن المجموعه دى

ودى اصعب حاجه

لانى مش هاثق فى حد انه يوصلى المعلومات دى صراحة

بس اللى ممكن اعمله انى اسمعهم كلهم ومع بعض

وربنا يقدرنى

بس مسكونى انتو الحكم ومالكوش دعوه

(;


اللى بيبوظ الحكام .. نفسهم؟ ولا الشعب؟ ولا الحاشيه المقربه؟

كلهم ليهم دور

يعنى الحكام اعتمدوا على حاشيه غير صالحه

ومارعوش انهم يراجعوهم او يراقبوهم

والحاشيه المقربه سمحت لنفسها بالتلاعب والغش فى سبيل المكسب الخاص على حساب المصلحه العامه

والشعب طبعا ده اكبر قوه كون انه مستكين وساكت فده تقصير فى حق نفسه

ايه الكلام اللى انا بقوله ده

انتو هاتودونى فى داهيه

مافيش حاجه باظت ياعم

والضمان شغال والتوكيل بيوفر قطع غيار جديده كمان بدل الهالك


مين أكتر اعلامي مصري بتحترمه؟

مني الشاذلى فى برنامج العاشره مساء

برنامج حلو وبتفرج عليه ساعات


قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟

لا ماعرفش ايه الحكايه دى


لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟

ههو انا لااشتغلت اولانى ولا تانى

بس لو هاشتغل حاجه غير دكتوره يبقى اشتغل مكانيكى هههههههههه

اهو برضه تصليح

حقيقى مافكرتش قبل كده

يعنى انا هاشتغل ولا ادور على شغل تانىولا اربى العيال ولا ااكل ابوهم

سيبونى فى حالى انا هاقطع نفسى!!!!!!!


ايه تانى بلد تتمنى تعيش فيها بعد مصر؟

ماحبش اعيش فى بلد احس فيها انى ضيفه

اوصف ليا ترتيبات اجمل فرح ممكن تحضره؟؟

اجمل فرح هاحضره ......... هو فرحى طبعا

واحلى حاجه فيه انى هحس بكل حبايبى معايا

يعنى احلى حاجه فى اى مكان تجمع ان الناس اللى فيه تكون متفاهمه وبتحب بعض

ده مايمنعش طبعا انه يكون فيه اللاغانى اللى انا بحبها وماسمعش فيه اسم "سعد الصغير"ده خالص



بتراعي كلام الناس والقيل والقال؟ لو اه او لو لا قول لى ليه؟

الحقيقه

كلام الناس ما يهمنيش ابدا مادام انا شايفه ان اللى بعمله صح وفى مصلحتى ويرضينى

لان اصلا الناس دلوقتى بتشوف وتعمل حاجات غريبه انا مارضاش عنها

ومش معنى ان اللى بعمله مش عاجبهم يبقى مش صح

ودى نقطه خلاف بينى وبين ماما

دايما تقولى كل اللى يعجبك واللبس اللى يعجب الناس

وانا اقولها انا هاكل وهالبس اللى يعجبنى ومايهمنيش الناس

وساعتها بقى ببيبقى فى حاجات كده مش لازم تعرفوها يعنى



صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والاحصنه هتكون سعيد؟

سعيده بايه بقى؟؟؟؟؟؟؟؟؟؟؟؟؟؟

ده حتى الحمام يجيب انفلونزا

طيب قول مثلا مالقيتش الكليه ... مالقيتش امتحان

خلينا نتفائل خير يمكن ابواب السما تكون مفتوحه


السعاده هى؟

احساس صعب اوى انى احسه فى الوقت الحالى

مش عارفه ليه فقدت الحساس بالسعاده

وده شئ تاعبنى جدا


عندك أمل ؟؟ أسبابك ؟

اكيد عندي امل
لانى مؤمنه بالله الحمد لله

ولا حياة مع الياس ولا ياس مع الحياه

J



لما تحب تهرب من كل شئ بتروح فين؟

بروح اناااااااااااااااااااااااااام

ده لو سابونى انا من غير ماتخانق معاهم

مش هقولكم مين طبعا



امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟

انا حسيت انى كبرت لما شوفت ان

ولاد خالى اللى كنت بشيلهم على ايدى كبرو دخلة الجامعه


لما بتعمل عمل خيرى بيكون ايه هو دافعك الاول؟

اي خير بيتعمل بيبقي لوجه الله



بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟

انا اشرب سجاير......... يععععععععع

لو شفت ست او حتى شاب بيشرب سجاير

بقول ربنا يهديه

بس بعذره لسبب: انه شايف ان السجاير دى وسيله لانه يتمرد على اللى حواليه

وده انا حسيت بيه من شويه صغيرين

لما حسيت انى عايزه اتمرد عرفت هو بيعمل كده ليه


بتعرف ايدك اليمين من الشمال ازاي؟

ايه الاسئله الغريبه دى

بتخيل نفسى هاكل واشوف هاستخدم انهى ايد فيهم

هههههههههههههههههههههه




ايه اكتر اله موسيقيه بتحبها

انا بحب الموسيقى الهاديه

اللى تخلينى اسرح فيها كده وانام عليها وافتكر الذكريات



فى رأيك ليه الذوق والنخوه اتعدموا؟

هم ما تعدموش اوى لسه

بس هم شحين من السوق شويه

يعنى باعتبار ان ده التطور الطبيعى للحاجه الساقعه

نخوه ايه بس ده كان زماااااااااااااااان

بس الزمن بيغير كل حاجه والظروف المحيطه بتفرض لامبالاه كبيره اوى بين الناس

ده غير الحب اللى مابقاش موجود

لان كله بيقول يلا نفسى



ايه الحاجه اللى لو حصلتلك تبقى سعيد قوى؟؟؟

لما بحس ان فى حد بيحبنى وبيدور عليا

لما بكون بين اصحابى ونقضى يوم ظريف سوا

لما بقابل حد يفكرنى بايام زمان اللى كنت سعيده فيها جدا



تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟

كام عماره كده فى مكان حلو

ااجرهم واخد فلوسهم ابنى بيهم تانى

ايه رايكم بقى فى العقليه الاقتصاديه المعمليه الفزه دى

يلا كلكم ادونى فلوسكم استثمرها................... وحد يا ريت يحجزلى فى اول طياره هربانه بره البلد




البحر و لا النيل؟؟؟

البحر

!!

مركب و لا طياره؟؟

لا دى ولا دى

انا مش لاقيه عمرى

ولا انا قطه بسبع ارواح

لو عليا اخدها مشى احسن



مجنون و لا عاقل؟؟

يارتنى كنت مجنونه



تقرأ كتاب و لا تتفرج عليه فيلم؟

اقرا انت بتقولى اقرا

لااااااااااااااااااااا

ده مش ممكن يحصل ابدا


بتحب تمرر التاج ده لمين؟؟

بما انى جاوبته متاخر اوىىىىىىىىىىىى

فاى حد هافكر ابعتهوله هيكون جاوبه قبل كده اكيد

احسنلى اوفر على نفسى الضرب والدعا

وخليه هنا مستريح

06 November, 2007

معلش... ده برضه رسول البشريه

السلام عليكم يا شباب

كنت قريت الموضوع ده وانا ليا عليه تعليق خاص
فحبيت اخد رايكم

الموضوع

اختر الرسول (محمد صلى الله عليه وآله وسلم)


ادخل بسرعة

جريدة اسبانية تجري استفتاء حول أفضل الشخصيات ومن بينهم سيدنا محمد ( صلى الله عليه وآله وسلم)


حالياً تجري جريدة اسبانية استفتاء حول من هي الشخصية الكبيرة التي لها تأثير على البشرية ومن تلك الشخصيات الحبيب المصطفى صلى الله عليه واله وسلم وباقي الأنبياء كسيدنا عيسى وعدة شخصيات أخرى.


والشخصية الأعلى تصويتا سوف ينجز عنها برنامج خاص للتعريف بها وهذه هي الفرصة السانحة

كي يتعرف الأسبانيون والأوروبيون بالحبيب المصطفى


إخواني لا تبخلوا عن رسولكم وصوتوا له.


أنا اعرف أن المصطفى صلى الله عليه وآله وسلم أنبل وارفع عن هذه الاستفتاءات ولكن هذا الاستفتاء ورائه شيء آخر هوانجاز برنامج خاص عن الشخصية الفائزة


وهذا ما نريده من اجل التعريف برسول الله صلى الله عليه وآله وسلم


هذا هو الموقع واسم محمد (صلى الله عليه وآله سلم) بالاسبانية هو

Mahoma


ادخل على الموقع من خلال هذا الرابط

http://www.elmundo.es/elmundo/debate/2007/...aciones689.html


واختر

mahoma

ثم إضغط على

votar

في الأسفل

نصف دقيقة لا أكثر ..أرجوكم
أرسلوها لكل من تعرفوه ومن لا تعرفوه و جزاكم الله خيرا ووفقنا لصالح الأعمال

-----------------------------------



يعنى كنت بقول :


1- اعتقد انه لسه ماجاش اليوم اللى وصلنا فيه اننا نقول صوت لرسولك


2- الرسول عليه الصلاه والسلام ليس موضع مقارنه مع رؤساء الدول او لعيبه الكوره

عشان يدخلو فى مسابقه مين احسن شخصيه


3-انا اصلا مش عارفه اقرا ايه اللى مكتوب ولا مين هيعمل ايه بعد التصويت

لانه بالاسبانى


4- احنا ايه اللى يضمنا انهم حتى لو هينشروا السيره الذاتيه للرسول

عليه الصلاه والسلام

انهم هيكتبو حقائق صحيحه وليس تحريف او تشويه

او حتى يكتبوا الحقيقه بس من وجه نظرهم هم


5- ناس كتير بتقولى دى فرصه كبيره عشان نعرف الاوروبيين مين هو الرسول محمد

صلى الله عليه وسلم

ونعرفهم ان المسلميين متمسكين بدينهم ورسولهم

واننا اكبر عدد من الغرب

طيب ولحد امتى هانفضل نعتمد على غيرنا عشان يقوم بواجبنا احنا

المفروض ان ده واجب المسلمين واولى الامر والدعاه

يبقى ماينفعش اننا نجيب شركه او مجله اجنبيه ونديهم توكيل وحق النشر فى الموضوع ده



ولا عشان حاجه ببلاش

!!!!



01 November, 2007

تاخد حقك ولا تعيش؟؟؟

طبعا كلنا عايشين ومبسوطين
واللى مش مبسوط يبقى مش مقدر االرفاهيه اللى هو فيها
ويروح يتعالج


المهم ان انا هاحكيلكم النهارده عن احداث خياليه
من وحى خيالى انا
حيث انى حاسه بملل من كتر الهنا االى انا فيه وعايزه اقلب على نفسى المواجع

اه عايزه اتعالج

يعنى يحكى انه فى زمن من الازمنه الغابره
حيث كان يعيش الملوك
وتحت ايديهم العبيد
صدر فرمان عالى
ماعرفش منين
المهم صدر فرمان ان كل العبيد يتحرروا وتعيش كل الناس سواسيه

الناس كلها فرحت
بس بعد شويه حس العبيد المحررين دول انهم مستعبطين-يعنى حد مستعبطهم يعنى

لقو ان الملوك لسه برضو مشغلنهم عندهم
مهم مالهمش مصدر رزق غير ده
وياريتهم حتى بياخدو فلوس
لا
دول واخدينو اكل وعيشه
يعنى ماتغيرش حاجه

المهم جه بقى واحد وزته نفسه انه يقول
لا

وكانت هى ال لا
لا مش عايز اشتغل
لا مش عايز اتبهدل
لا انا عايز حقى
عايز فلوسى
عايز احترامى
عايز حريتى

تفتكرو ايه اللى حصل
؟
؟

ولا حاجه
قالو عليه مجنون
واتهم بالهرطقه
وحوكم بالاعدام شنقا
يلا كان كلب ومات


بقيت العبيد بقى
كان برضه فيهم ناس فيها الرمق
يعنى لسه بتفهم
وبتفكر
ومش راضيه عن اللى بيحصل
لا عن اوضاعهم ولا عن الراجل اللى راح فطيس ده

طيب يعملوا ايه؟
يطالبو بحقهم ويروحو فى خبر كان
"كان كلب وراح"و
ولا يسكتو ويعيشو


هو ده السؤال
تطالب بحقك وتضحى عشان غيرك يتحرك
ويحصل تاثير
وتغير
وناخد حقنا

ولا هنعيش كده ونموت كده
ونستنى اللى ياخدلنا حقنا
طبعا اللى كان بيسال كده
ده واحد من المجانين اياهم

تررررررررررررررررررررررررررررررررن
تررررررررررررررررررن
ايه الوش ده
مين اللى بيخبط عليا

اصحى يا بندقه هاتتاخرى على الكليه
ايوه يا ماما
صحتينى
ده انا كنت بحلم بالعصور السحييييييييييييييييييييييييقه

25 October, 2007

عايزه اشترى موبايل

السلام عليكم
شوفو بقى بعد طول انتظار قررت اشترى موبايل
بس عايزه اعرف منكم بقى ايه الحاجه الكويسه

انا عايزاه
يستحمل الشغل الكتير وضد الصدمات يعنى يستحمل لابعد الحدود

ويكون براديو اف ام

وشاشه الوان

ونغمات حلوه

ويكون سعره كده معقول
اوعى يعدى الاف جنيه
انا ورايا عيانين بياخدو فلوسى

وهاسهلها عليكم
اناعايزه نوكيا
مش اى ماركه تانيه


وعشان انا ماعرفش اى حاجه فى اى حاجه عن الموبايلات
يبقى لازم استعين بصديق
والصديق ده بقى يبقى انتم
اه اتدبستو وخلاص

هاااااااا كله بقى يقولى رايه

17 October, 2007

وجدتهاااااااااااااااااااااا :)


ساعتى حبيبتى
لاقيتها
ماما لاقيهالى
هاااااااااااااااااااااااااااااااااااااا
انا اصلا حلمت انى لاقيتها وصحيت لاقيت ماما بتقولى اهييييييييييه

انا دلوقتى مبسوطه اكتر من سيمون
انا ساعتى مظبوطه


اوعوا حد يقر عليها





فين ساعتى
يا حبيبتى يا ساعتى

ساعتى العزيزه(اللى مش شبه الصوره دى خالص)مش لاقياها
راحت فين ................. مش عارفه

ومش عارفه كمان انا حاتطها فين

كل اللى جاى على بالى دلوقتى
اغنيه سيمون:ماشيه بساعتى مش مظبوطه
لكن ماشيه وانا مبسوطه

يابختها معاها ساعه وانا لا


حدش شاف ساعه ماشيه يا ولاد الحلال

وااااااااااااااااااااااااااااااااااااااااء



محدش يقولى اجيبلك غيرها
لا
انا بحب ساعتى

04 October, 2007

وحشتونيييييييييييييييييييييييييى جدا


ياه ماكنتش اتصور انكم توحشونى كده
بس نعمل ايه بقى كل سنه وانتم طيبين
عارفين المشكله مش فى رمضان خالص
المشكله كلها فى الكليه
عارفين لو حكتلكم على المهازل اللى بتحصلنا مش هاتصدقو


بس يلا
رمضان كريم
والعيد قرب وماتنسوش الكحك والبيتيفور وصلاه العيد
ههههههههههههههههههه
سلام عليكم

08 September, 2007

تاج محل


سلام عليكم
التاج ده كان جالى من زماااااااااااااااان من والقادم اجمل
وهى صبرت عليا كتييييييييييييير
لحد ما هوندا
بعتتهولى تانى ...قلت لا كده انا هاضرب
هو تاج حلو وجديد
اسيبكم معاه بقى
محدش يقولى ايه علاقه الصوره بالتاج
هو ده تاج وده تاج محل
يعنى هم التنين من زماااااااااااااااان



1- اسم مدونتك؟
me,myself and the world

2- لماذا اخترته ..وماهي نيتك من وراء اختياره؟
لانى لما فكرت اعمل المدونه كنت حاسه انى اتنين ناس فى بعض واحد عايز يرضى الناس والتانى عايز يعمل اللى يعجبه هو وكنت زهقانه جدا وحاسه بانفصال فى الشخصيه وجه فى بالى الفيلم بتاع جيم كارى
me,myself and Ayrene

3- هل فكرت في إغلاق مدونتك؟ والسبب؟
لا لانى لسه عايزه اقول حاجات كتير فيها

4- صورتك في المدونة ورمزيتها ؟؟
انا كنت بدور على صوره بندقه عشان تليق عليا
بس مالقتش
وصوره البنت الاموره دى عاجبتنى فحططتها

5- لماذا دخلت عالم التدوين من الاساس؟
فى الاول كنت عايزه اقول اللى جوايا
وبعدين قولت اتكلم اشوف يمكن الاقى حد زيى ولا انا بس اللى فيا حاجه غلط

6- جمله قيلت لك فى وصف مدونتك؟
الحمد لله فى ناس كتير قالولى ان مدونتى لذيذه ودمها خفيف
فى ناس قالولى ان موضوعاتى حلوه
فى ناس اعجبت بشكل المدونه!!! حاجه غريبه مش كده
بس الحمد لله يا رب دايما تعجبكم

7- التعليقات بالنسبه لك ,اهميتها؟
مهمه جدا التعليقات.... ده انا اول بوست كتبته وماحدش رد عليه كنت زعلانه جدا وفكرت اقفل المدونه مادام ماحدش بيرد علياوكنت هاكتب فيها "اعملو حسابكم مافيش بوست جديد غير لما تعلقو على القديم" اه امال ايه بكتب عشان اعرف راى الناس واتكلم معاهم

8- احلى بوست كتبته ...ضع اللينك , ثم اذكر لماذا؟ !!!!!!!!!
بوست خير الاسماء....لانى كنت زعلانه اوى من الموضوع ده ونفسى يتغير
بس الاهم
قلولى انتم انهى موضوع عاجبكم اكتر


9- افضل بوست قراته؟وضع لينكه
بصراحة فى موضوعات كتير فى مدونات كتير جميله

10- أفضل مدونة قرأتها؟
كل المدونات اللى بتابعها حلوه واكيد فى حلو كتير لسه ماقابلتهوش

11- حد قل أدبه فى التعليق إيه رد فعلك؟
بحذف الرد ومش هارد عليه

12- أسوأ بوست أسوأ مدون؟
اسوأ مدونه هى اللى فيها كلام خارج .او صور تخدش الحياء.فى اى موضوع
وللاسف ده موجود

13- هيحصل ايه لإيميلك لما تموت ؟؟
ليه بس السيره دى......... ولا حاجه هيتنسى

14- اديت الباسوورد لحد قبل كده؟
ايوه

15- اسمك؟
بندقه.. اه ولا عايزين اسمى الحقيقى
لااااااا دى اسرار والمدونه متراقبه
بس هو الدلع بندقه وانا هاستغلكم واخليكم تدلعونى

16- المشهور بيه وسط اصحابك؟
ممكن تقول اللى مشهور بيه وسط المدونين "بندقه برضه"امال احنا بنحكى فى ايه من الصبح

16-عمرك؟
23

17-برجك؟
الجدى
18-مجال دراستك؟
طب.... يارب نخلص على خير

17- شخصيتك نوعها إيه؟
هانبدا بقى فى الاسئله الصعبه
بس بيقولو عليا طيبه اوى

18- السفر بالنسبة لك؟
فسحه وتغير جو وخروج عن الروتين

19- وقت فراغك بتعمل فيه إيه؟
النت .. اتعلم واخرب فى الكمبيوتر

20- المود بتاعك؟
عادة بكون هادئه وبحب الضحك اوى
بس بعيد عنكم فى ساعات بكون مش عايزه اكام حد ولا حد يكلمنى
وده بيزعل ماما منى كتير

21- الاكلة المفضلة؟
الفته والسبانخ ومحشى الكرنب
والحلوياااااااااااااااااااات
بس والله مش باكل كتير عشان ماتخنش
بس اللى يحب يعزمنى يعمل حسابه على الحجات دى

22- صفات اللي أخدتها من بابا؟
دمه الخفيف وحنيته"زى ما ماما بتقولى"

23- الصفات التي أخدتها من ماما ؟
الطيبه وتحمل المسؤوليه وحسن التصرف

24- اكتر ست حاجات بكرهها؟
الاستهتار
الغباء
الظلم
القراءه والسطور اللى تحت بعضيها
الفرانكواراب
الخيانه والغش

25- اكتر ست حاجات بحبها؟
الكمبيوتروالنت
الانجليزى
الرياضه رغم انى مش بلعب اى حاجه
التفوق فى اى مجال
الاطفال بس المهم يكونو هاديين مش زي الاطفال بتوع اليومين دول
بحب دراستى فى الطب
بحب الارقام والحسابات
الايس كريم

26- الشغل بالنسبة لك؟
وسيله توصل لهدفى والنجاح

27- الانترنت بالنسبه لك؟
عالم كبير احب انى اعرفه

امرره لمين؟؟؟؟؟؟؟؟؟؟؟؟؟؟؟
حقوق النشر غير محفوظه
اللى عايزه يتفضل بس يسيب 5 جنيه على باب المدونه

04 September, 2007

مذكر ام مؤنث


أحد مدرسي اللغة الإنجليزية يشرح لتلاميذه قاعدة المذكر والمؤنث في اللغة الإنجليزية. وذكر أثناء الشرح أن العواصف في وقت من الأوقات كانت تمنح أسماء مؤنثة فقط ، وأن السفن والطائرات اعتادوا أن يعتبروها مؤنثا. فسأله أحد التلاميذ " هل الكمبيوتر مؤنث أم مذكر؟"

لم يكن المدرس متأكدا من الإجابة ، فقام بتقسيم الفصل إلى مجموعتين : مجموعة الأولاد ومجموعة البنات ، وطلب من كل منهما أن يدلي برأيه مع إعطاء أربعة أسباب تثبت هذا الرأي


:ورأت مجموعة الأولاد أن الكمبيوتر مؤنث وذلك للأسباب التالية :


1-لا أحد يفهم المنطق الخاص به الا صانعه فقط .


2- لا يستطيع أحد أن يفهم اللغة الداخلية التي يعمل بها.


3- يحتفظ بأخطائك حتى البسيط منها ليسترجعها لاحقا.


4- عندما ترتبط بإحداهن ، تجد نفسك تنفق نصف مرتبك على الإكسسوارات والطلبات المفاجئة .



:رأت مجموعة البنات أن الكمبيوتر مذكر وذلك للأسباب التالية :


1- لكي تحصل على اهتمامه ،يجب أن تضغط على كل مفاتيحه.


2- لديه الكثير من المعلومات ،ولكن يصعب فهمه.

3- من المفروض أن يساعدك على حل مشكلاتك ، ولكن في أغلبالأحيان يكون هو المشكلة .


4- بعد الارتباط به ، تكتشف أنك لو انتظرت قليلا

لكان بإمكانك الحصول على أفضل منه .

أعجبتني وحبيت أشاركم بها ...


27 August, 2007

عرفتو ايه اللى بيحصل من ورانا

طبعا كلكم فاكرين انك لما بتقفل الجهاز خلاص مافيش حاجه ممكن تحصل

قال يعنى الكمبيوتر ساكت ولا بيرسل ولا يستقبل

انا برضه كنت فاكره كده................ لحد ماعرفت كلام جديد خالص

والكلام ده انا جبتهولكم عشان الامانه العلميه وانى مارضاش حد يحصله كده
اتفضلو ادخولو شوفو ايه اللى بيحصل

من هنا

احنا كلنا كنا مخدوعين

24 August, 2007

احساسك ايه؟؟؟؟؟؟؟؟؟؟

السلام عليكم

,سورى اتاخرت عليكم اصلى كنت اوت دورز

اصلى كنت فى تور بره .......

ابدا ماكنتش بصيف ولا حاجه ده يدوب يومين فى البلد كان فرح ماى مازرز كازن

بس بجد مسد يو جدا

كنت حاسه انى عايزه ارجع سو فاست عشان اكلمكو واخد رايكو فى سوم امبورتانت اشوز

بس بيليف ان الارياف اتغيرت جدا

يعنى بقت لايك تاون

الشوارع نظيفه و اولموست زى ما تكون بافد وايفين فى نت كافيه هناك

والبيوت كلها مبنيه بالطوب الاحمر ومتبيضه وجميله جدا

يعنى صوره الريف القديم و بيوت الطوب اللبن والحيوانات والفراخ والحاجات دى نو مور اجزيست

بس اللى خاوفنى هناك كان الافيان فلو

اصل الناس لسه عندها بيردز صحيح مكانها نظيف بس ماحدش ضامن

ريللى اتبسط اوى فى اليومين دول والفرح كان تحفه وقعد تل دوون والناس كلها صاحيه

ياه انا اتكلمت كتير اوى لدرجه انى فورجيت انا كنت هاكلمكو فى ايه اصلا

نو بروبلم لما اتفكر هاقلوكم تانى

سي يو باى





Yaaay tasawaro in fe nas fe3la tool alnahar betetkalem English fe 3araby keda


Ana te3bt menhom gdn….


Asly ba7b lma netkalem nera3y in fe nas momken mesh tekon fahma elenglish beta3na


Ya3ny hea elthaqafa matgeesh ela lma nekteb English bel 3araby


7aga 3'areba gedn


Wla anto eeh ra'euko??????????



Salamo 3aleko

16 August, 2007

دكتور ...........و...............دكتوره

السلام عليكم

دلوقتى وبعد ما كل دفعتنا فى الثانويه العامه خلصو كليه وداخلين على جواز
واحنا طبعا المجانين الوحدين اللى قررو يدخلو طب قال ايه ............هايبقو دكاترا

ماعلينا

المهم اننا بقى بنقول ان احنا لازم نرتبط بدكاترا زينا
هاتقولى بقى اشمعنا دكتور يعنى
اقولك
احنا برضه لينا وجه نظر
اولا:
الدكتور هيكون مجرب الكليه وعارف وجع دماغها وعارف ايه اللى بعد كده من مذاكره ودراسات عليا
وهيبقى مقدر يعنى وفاهم النظام يعنى مش هايقول انتى مش فاضيه ولا سايبانى ومشغوله عنى
ثانيا:
الدكتور المفروض انه هايشجع زوجته عشان تذاكر وتكبر معاه
ويهيبقى اكبر منها ويقدر يساعدها
لا والله مش داخلين على طمع ........ بس هيساعدنى وهو خبره برضه
ثالثا:
نفسى ارتبط بدكتور
ونخلف دكاترا صغيرين
ونعيش عائله طبيه جدا
رابعا:
لما احنا الاثنين نبقى دكاترا
هيكون مجال المناقشه مع بعض مفتوح لان مجال عملنا واحد
يعنى هنعيش احنا الاثنين جو واحد
هنكون مشغوليين سوا وفاهمين بعض وفاهمين احنا بنفكر فى ايه
------------------------------------------------------------

بس دى احلامنا
بسيطه وعاديه جدا
بس ده طبعا ما يغيرش انه لازم يكون ميسور الحال وقادر على تحمل مسؤوليه الزواج

-------------------------------------------------------------
بس لما تيجى بقى تشوف الدكاترا الرجاله وتساله انت نفسك تتزوج دكتوره؟
معظمهم يقولك لا............ " الخاين ..الغشاش
ليه بقى يا سيدي؟
قال ايه انا عايز واحده فاضيه مش مشغوله بغيرى
يعنى انا ممكن اتزوج دكتوره صيدليه
"مش بقولكو خاين"انتو دايما كده


مع انك ممكن تشوف اطباء كتير متزوجين من طبيبات وحياتهم سعيده
بس نعمل ايه فى اطباء اليومين دول


انتو رايكو ايه
يعنى هاتقولو ايه عشان تدافعو عن نفسكو
وانتو يا بنات عايزين تقولوهم ايه تانى
قولو قولو ...........ماتخلوش فى نفسكو حاجه

11 August, 2007

هل ممكن تكسب فلوس من النت


النهارده عيد ميلاد ماما ربنا يخليهالى
كل سنه وانت طيبه يا ماما
--------------------------
----------------------------

بعد ما قولتلكو ان النت اسعاره هاتنزل وتطلع فى نفس الوقت
حاجه غريبه اوى

لقيت موضوع غريب تانى
بس الموضوع المره دى مش دفع
تصدقو انكو هاتخدو فلوس
!!!!!!!!!!!!!!!!!

قال ايه فى موقع اعلانات جديد عايز اننا نشاركه فى نشر الاعلانات مقابل اننا هناخد حصه من الارباح
!!!!!!!!!!!!!!!!!!!!!
********************************************************

باختصار شديد ، الفكرة هي جمع عدد كبير من الأشخاص في شبكة على الانترنت لكي تكون محط أنظار شركات الإعلان و شركات البيع بالتجزئة وغيرها ، وأن يكون لهذه الشبكة عدة مصادر للدخل بالإضافة إلى دخل الإعلانات ، و90 بالمئة من هذا الدخل يوزع في نهاية المطاف على أعضاء هذه الشبكة وفقاً للجهود التي يبذلها كل عضو في إنجاحها

الاشتراك مجاني ومتاح لجميع مستخدمي الانترنت،والعمل المطلوب بسيط ولا يستغرق إلا عشر دقائق في اليوم ،أي خمس ساعات في الشهر ، ولأن نجاح هذه الشبكة يعتمد اعتماداً كبيراً على زيادة عدد أعضائها فإن من يعمل على ضم أعضاء أكثر للشبكة فإن أرباحه تتضاعف بتضاعف عدد الأفراد الذين ينجح في ضمهم وهنا في هذا الموقع فإننا نسعى لتسهيل القيام بذلك

************************************************************
الحكايه بتقول ان اشركه اسمها اجلوكو هى اللى بتعم ل النظام ده

أجلوكو هي شبكة اقتصادية أعلن عن إنشائها في نهاية شهر نوفمبر من عام 2006 وهي تخلق فرصة رائعة لجميع مستخدمي الانترنت لم يكونوا يحلموا بها و هي الشبكة الاقتصادية الأولى على مستوى الانترنت على غرار الشبكات الاجتماعية ،مثل ماي سبيس و يوتيوب و فيس بوك، ولكنها تختلف عنها في أنها مملوكة بالكامل لأعضائها ، فأعضاء هذه الشبكة سيكون لهم 90 بالمائة من أرباحها وأسهمها ، مقابل استخدامهم للانترنت كما يستخدمونها يومياً

كيف تحقق هذه الشبكة أرباحها؟
الجواب ببساطة ، أن عمالقة صناعة الإعلان ، ومحركات البحث و شركات البيع بالتجزئة التي تعمل على الانترنت يدفعون بلايين الدولارات سنوياً ، ليصلوا إلينا أثناء تصفحنا للانترنت فكم نصيبنا من تلك الأموال ؟
إذا كنت مثلي فجوابك سيكون لا شيء

، فشركات الإعلان تدفع لـ أجلوكو لكي تصل إلينا من خلال برنامج الفيوبار و أجلوكو تعيد توزيع تلك الأموال علينا ، نحن أعضاء الشبكة العالمية
اشترك مجاناً فالاشتراك في أجلوكو لا يكلف شيئاً ، أخبر أصدقائك عن هذه الفرصة ، حمل برنامج الفيوبار ثم ثبته في جهازك عندما يطرح في شهر مارس و من ثم استخدم الانترنت كما تستخدمها كل يوم

الفيوبار فيه خاصية البحث في الانترنت ، كل عضو من أعضاء أجلوكو يقوم بعملية بحث من خلال الفيوبار يكسب أجلوكو 10 سنت


الفيوبار هو برنامج صغير الحجم ، عند تشغيله يظهر في أسفل شاشة الكمبيوتر كما هو واضح في الصورة باللون الأزرق وهو مثل التول بار الذي تقدمه العديد من الشركات مثل جوجل و ياهو و غيرها، هذا البرنامج يتابع المواقع التي تزورها على الانترنت ومن ثم يظهر لك إعلانات تتوافق مع ميولك ، أي إعلانات لمواقع تشابه المواقع التي تهتم بها
وهذا البرنامج ليس مثل برامج التجسس التي تثبت في جهازك و أنت لا تدري وإنما هو برنامج تقوم بتشغيله وإيقافه بنفسك وتستطيع إزالته بكل سهولة إذا أردت ذلك ، في الوقت الحالي حددت أجلوكو خمس ساعات كحد أقصى في الشهر لكل عضو لمشاهدة الفيوبار ويحصل العضو على سهم واحد عن كل ساعة مشاهدة يقوم بها
********************************************************
وبعدين فى مثال كده شكله مغرى:

إذا وضعت على الطاولة أمامك مليون دولار نقداً على جهة
وعلى الجهة الأخرى وضعت سنتاً ،علماً بأن الدولار الواحد يساوي مئة سنت ، ولكن هذا السنت
يتضاعف في اليوم مرة ، لمدة ثلاثون يوماً
وخيرتك بينهما ، فأيهما ستختار؟


لا تستعجل ولا تنخدع ببريق المليون
فالسنت بعد ثلاثون يوماً ، سيصبح خمسة ملايين و ثلاثمائة وثمانية وستون ألفاً
انظر بنفسك
1 ، 2 ، 4 ، 8 ،16 ، 32 ، 64
في اليوم الثامن 1.28 دولار
في اليوم العاشر 5.12 دولار
في اليوم العشرون 5242.88 دولار
في اليوم الثلاثون 5368709.12 دولار


كم ممكن أن يكسب العضو من أجلوكو ؟

سؤال مهم وفي محله ، فوفقاً لتقرير أعد بناءاً على توقع أن يصل عدد أعضاء أجلوكو مليوني عضو، فإن من المتوقع أن يربح أي عضو لم يضم لفريقه أحداً
ما يقارب من 150 دولار من ملكية الشركة كأسهم بالإضافة للأرباح الشهرية التي ستوزعها الشركة والتي من المتوقع أن تتراوح ما بين 5 إلى 15 دولار شهرياً للشخص


ده شكل الشيك اللى بيقولو هايبعتو عليه الفلوس!!!!!!!!





طريقة الاشتراك في أجلوكو
www.agloco.com/r/BBGL2969

هتتبع تعليمات التسجيل زى اى موقع تانى
وهايجيلك ايميل تاكيد
ووبعدين هايطلب منك تغير الباسوورد


بكدا اقدر اقولك الف مبروك للاشتراك فى كبرى شركات الربح العالمية . دلوقتى انتا خلصت الاشتراك وفتحت حسابك كله تمام لسه حاجة واحدة كيفية تحميل الفيوبار واستخدامه وحصد الاموال.
ودلوقتى فاضل بس انك تحمل الفيوبار وده هاتلاقيه فى صفحه احساب بتاعك
اضغط على
alternate download

وهو ده شكله على الكمبيوتر
*************************************************

بس
ايه رايكو بقى فى الكلام ده؟؟؟؟؟؟؟؟؟
مش برضه شكله نصب واستعباط؟؟؟؟؟؟؟؟؟
مع ان اللى ناشرين الكلام ده بيقولو انه فعلا حقيقه وانهم كسبو منه
على العموم انا قلت اسألكو بما انكو اكتر منى خبره
يعنى لو مافيهاش ضرر يبقى نجرب
لو فيها اي مشاكل قلولى احسن بلاش

05 August, 2007

اول وتانى تاج مره واحده


انا لله وانا اليه راجعون
علمت من كام يوم ان صديقتنا شيكو صاحبه مدونه
shiko on line
توفت
اللهم ارحمها واسكنها فسيح جناتك
بجد زعلت جدا لانى رغم انى لم اعرفها لمده طويله ولكنى احسست انها فتاه طيبه
---------------------------------------------------------------------------

ثانيا
اخيرا جالى تاج

وده اول تاج وكان من الصديق ياسر
صاحب مدونه دينامو الاخوان

بعتذر ليك يا ياسر لانى اتاخرت اوى على ما رديته ولكن على ماعرفت النظام
هل تحرص بصدق علي تجديد النيه قبل الدخول علي النت؟؟؟
للاسف لا مابفتكرش
ربنا يسهل واجدد النيه فى المرات القادمه

ما رأيك في جريده الدستور؟؟؟
زى اى جريده بتهاجم وخلاص وماشوفناش اى عمل
بس هى لذيذه وفيها بغض النظر عن السياسه مواضيعها الاخرى حلوه

هل تثق في جريده الدستور؟؟؟
اثق فى ايه كله كلام جرايد

أنا بحبكو في الله..فهل تحبونني...ولا تنسوا الصدق؟؟
نعم فانت انسان محترم ومهذب

هل تعمل في السياسه والعمل العام أكثر من الربانيات والروحانيات؟؟؟
لا الحمد لله انا ماليش فى السياسه خالص

ده كان التاج الاول
--------------------------------
------------------------------------
التاج التانى خاص بحمله رفض تحديد الانترنت
وكان جايلى من هوندا صاحبه مدونه
رغايين سبووت

ما هو مدى أستخدامك للأنترنت ؟؟

مستخدم اعتيادى - ايميل - شات - العاب
- تحميل - العاب - برامج


كيف ترى هذى الحملة وما مدى تأثيرها على المستخدمين والمختصين ؟؟
1- ترجعنا للخلف
2- تفرض حصارا معلوماتيا على المتخصصين والطلبة والشعب

ما رأيك بقرار وزير الاتصالات الجديد ؟

قرار الوزير لا يؤدى لشئ سوى ازدياد الوصلات غير الشرعيه لانها غير محدده السرعه ومجالها اوسع


ما هى اسباب الوزير المعلنة والغير معلنة فى رأيك ؟؟؟؟
الوزير كما قال يريد ان يقلل السعر و يزيد عدد المشتركين .....هو بيقدم لينا خدمه

اما الهدف الخفى انه اكيد مافيش حد هاينفعه ال 2 جيجا دول وهيستخدم اكتر من كده بكتييييييييير وهايدفع اكتر والوزير عايز كده اننا ندفع اكتر والاسم بيقلل السعر
من هم المستهدفون بهذا القرار ؟
اعتقد ان المستهدف فى هذه الحمله ليس اشخاص معينه

ولكن هو عموم الشعب اللى هايدفع اكتر والبلد تستفيد واحنا مانشوفش حاجه من الفلوس دى

هل تهدف الحكومة من هكذا قرار بتطبيق المبدأ العربى الشهير الا وهو فرض الوصاية على هذا الشعب القاصر ( من وجهة نظر الحكومة ؟)
اكيد هو حكم القوى على الضعيف
كيف ستتراجع الحكومة عن قرارها ؟


الحكومه لن تتراجع الا اذا خسرت

يعنى لازم نقاطع او نرجع للوصلات الغير شرعيه اللى مش عاجباهم

يمكن ساعتها يفكرو ازاى يكسبو من غير استهبال على الناس


كيف تصف هذا الحدث ؟؟
سرقة واستغلال


هل يستحق وزير الاتصالات الائتمان على أمن مصر المعلوماتى وصناعة التكنلوجيا بمصر؟؟؟

من وجه نظر الشعب كل الوزراء يمشو احسن

من وجه نظر الحكومه اللى يجيب فلوس اكتر يقعد اكتر

ماذا تتوقع من تفاعل هذى الحملة عالميا وعربيا ومحليا ؟؟؟؟

عالميا :العالم ينظر لنا على اننا عاله عليهم ولا نستحق العيش

فلا يجب ان نعتمد عليهم فى اى شئ

لان اعتمادناعلى الغير لحل مشاكلنا هو ما ادى بنا الى هذه الحاله من كوننا عالم تالت

محليا : ارجو ان يستمع لنا احد وان كنت لا اعتقد هذا

هل أثبتت وزارة الاتصالات والمعلومات فى مصر جهلها العملى والمعلوماتى و سوء تقديرها للظروف المحلية والدوليه ... واستغلالها للوضع المحلى ؟؟؟
لا الوزاره تستغل الوضع الحالى بكل الطرق

وهذا ليس جهل ولكنه تستخدم الظروف لمصالحها وليس مصلحه الشعب
ما هو الحل فى رأيك ؟؟
الحملة وجمع التوقيعات
المقاطعة العامة لشركات الانترنت
لا نستطيع مقاطعه التليفون يجب ان نتكلم ونعمل بما هو معقول

قد نعيش بلا انترنت ولكن ليس التليفون خلينا واقعيين
هل ترى ان نجاح الحملة يتمثل فى
واسعه شويه وصعب تحقيقها اقالة الوزير الجاهل بمعايير صناعة التكنلوجيا ومواكبة التطور

:حل جيد ويرضى جميع الاطراف التراجع عن القرار
وضع نظامين تحت بند اختيارى:غير مضمونه لانهم ممكن يلغو النظام الاول فى اى وقت...... واخبطو دماغكم فى الحيط

ماذا ترى فى المناورة الاخيرة للحكومة تحت ضغط المرحلة الأولى من الحملة ؟؟؟؟
مناورة واضحة وكذب صريح

---------------------------------------------------------------
التاج ده لكل المدونين
للمشاركه فى الحمله
ومن عندى انا همرره ل
زحل الفلكى
دكتور ميستيكنص
مع نفسى
ممكن

مبحر فى ذات
فوكيره
والقادم اجمل

حكاوى وتخاريف
شبابيك على الحياه
بلاعه الحكومه
حصان برى
crazy boy

ولكل من يدخل المدونه
وارجو نشرها لكل من تعرف
ولعل وعسى يجيب نتيجه
والسلام عليكم
----------------------------------------------------
ان شاء الله عندى موضوع جديد
عايزه اعرف رأيكو فيه
هاكتبه قريب ان شاء الله

ومن يتقى الله يجعل له مخرجا

ومن يتقى الله يجعل له مخرجا

انت اهو ..... :)