01 July, 2018

الإرهاق النفسي

في نوع التعب والإرهاق بيكون فقط نفسيا
يعني إحساس بالتعب داخلي... عدم الرغبة اكتر منها عدم القدرة علي عمل أي حاجه
مشوش ومحتارة
وراكي ١٠٠ حاجة ومش عارفه ولا عايزة تعملي حاجة
حاسة أني عايزة اوفر وقتي ومجهودي لحاجات لسه هعملها 
......... 
هو ذا نفس الإرهاق اللي عند مراتك , وأنت كل اللي طالع عليك هو انتي بتعملي ايه اصلا
أنتي قاعدة في البيت وأنا اللي في الشارع وبشتغل
هي قاعدة في البيت آه بس قاعدة مع فريق القرود اللي انت جبتهم ورميتهم عليها
 مسوءليه كبيرة أنك تقعد تراقب افعـال وأقوال وعليك تصححها و تقومها.. مسؤلية مرهقة تفقدك متعه الحيـاة معاهم
........ 

السبب التاني للإرهاق النفسي هو أنك علي طول برة البيت
اللي بتصحي فيه بتنام فيه
 حياة رتيبه مملة..... سلسلة من العيال والمواعين والأكل والغسيل ولموا وروقوا

............ 

فقد الكلمة الحلوة واللمسه الهاديه واللمحة اللي تشجع علي الاستمرار

.......... 
و
يبقي بعد كدا لما تلاقيها قاعدة ماسكة الموبايل ومش بتعمل حاجه وتقولك تعبانه
ماتجيبش تقول من ايه ?!! وهو أنتي بتعملي حاجه

.. 

"رفقا بالقوارير"

صلي عليك الله يا رسول الله

27 June, 2018

Disconnected

مش عارفه منين جيبت الجرأة لكلامك دا
ومنين الثقة في رد فعلي وأني هوافقك
سبق وقلتلك وافتكر.... أنك رصيدك خاص 
وأنك في فترة السماح
بس تخيل
كمان فترة السماح خلصت
مواقف كتير أخيرة زعلتني..... و جيــت في فترة أنا أصلا نفسيتي مش حلوة
جيــت في وقت أنا أصلا عايزة اتغير
وكملت عليا..... غصبتني اتغير عليك
كان لازم أخذ قرارات وأتمسك بيها
وأخذتها لوحدي.... لأنك مش جنبي
صبرت كتير وزهقت
صبرت عشان الحياة تمشي بس تعبت
موقفك الأخير كان القشة اللي قصمت ظهر البعير 
كمان فقدت الثقة فيك..... مش عارفه ليه أثر فيا كدا.. مكنتش متخيلة أنــك بتخبي عليا.... وكل الوقت دا بتخبي عليا
فقدت الثقه أني أصدقك في أي حاجه حتي لو هايفه..... وخايفه أواجه نفسي 
أنك تكون مخبي حاجه اكبر
سيبها تمشي عشان عيالنا 
لو عقدتها اكتر..... فيه ايه تاني هيحصل ?! هنبعد اكتر من كدا ايه?! 
أنا بعدت 
فقدت الثقة
فقدت الرغبة
فقدت العشم
فقدت الانس
..... وماتقوليش الحب..... الحب لوحده مش ييعيش..... لازم المراعاه لازم التضحيه... لازم بالاهتمام
 واوعي تقول أنك ماخدتش عشان كدا مابتديش...... مانا عارفاها حجتك
عايز تفضل مصدقها براحتك برضه ماتفرقش معايا

ولو هتدافع عن نفسك وتقول بحب بطريقتي... يبقي أنا كمان هعيش بطريقتي 
سهلة أهي 
بسيطة ماتعقدهاش
أنا بطلت اطلب منك تراضيني من زمان
أنا بس بقولك 
نعيش من غير وجه دماغ

09 June, 2018

للتاريخ مش اكتر

في ٣٠ /٦ /٢٠١٥
الحكومة قررت توقف زيادات المرتبات السنويه للموظفين 
اللي ادعت انها "بتاكل" موازنه البلد
.

في٨/٢٠١٦ يعني بعد سنه واحدة
ذات نفس الحكومة قررت تعوم الجنيه وتبيع كل حاجه بالأسعار العالميه
وتبدأ " تأكل" مرتبات الموظفين اللي خسرت قيمتها بين يوم وليله

انت اهو ..... :)